ચીનના સોશિયલ મીડિયા પર ચીનના રાષ્ટ્રપતિ શી જિનપિંગને સ્ટ્રોક આવ્યો હોવાના સમાચાર અંગે ખૂબ ચર્ચા થઈ રહી છે. એવું કહેવામાં આવી રહ્યું છે કે, CCP મીટિંગ દરમિયાન રાષ્ટ્રપતિ જિનપિંગને સ્ટ્રોક આવ્યો હતો. જો કે હાલમાં આ અંગે કોઈ સત્તાવાર સમર્થન નથી. પરંતુ આ વાયરલ સમાચારે હલચલ મચાવી દીધી છે.
ચીનની રાજનીતિ માટે આ બેઠક ઘણી મહત્વપૂર્ણ માનવામાં આવે છે. પાંચ વર્ષમાં એક વખત યોજાતી આ બેઠકમાં ચીનની ભાવિ દિશા નક્કી કરવામાં આવે છે. એવું કહેવામાં આવી રહ્યું છે કે, આ CCP બેઠક સોમવારથી શરૂ થઈ હતી અને ગુરુવારે સમાપ્ત થવાની હતી.
ચીનની અર્થવ્યવસ્થાએ છેલ્લા પાંચ ત્રિમાસિક ગાળામાં સૌથી ખરાબ પ્રદર્શન કર્યું છે. જેને લઈને ચીન ખૂબ જ ચિંતિત છે. આવી સ્થિતિમાં ચીનના રાષ્ટ્રપતિ પર દબાણ વધી રહ્યું છે.
ચીનનો વિકાસ દર ઘટ્યો
15મી જુલાઈએ ચીનની સરકારે બીજા ક્વાર્ટરના આંકડા જાહેર કર્યા હતા. જેમાં વિકાસ દર 4.7 ટકા હતો. આ આંકડા અપેક્ષા કરતા ઘણા ઓછા હતા. પ્રથમ ક્વાર્ટરમાં આ દર 5.3 ટકા હતો. આવી સ્થિતિમાં આ ત્રિમાસિક ગાળામાં આ દર વધુ રહેવાની ધારણા હતી. જો કે, આવું બન્યું ન હતું. રાષ્ટ્રપતિ જિનપિંગ માટે આ બાબત ખૂબ જ ચિંતાનો વિષય છે.
ઘટતી અર્થવ્યવસ્થા પર ચર્ચા
આ ચિંતા વચ્ચે શી જિનપિંગે એક બેઠક બોલાવી છે, જેમાં ચીનની ઘટતી અર્થવ્યવસ્થા પર ચર્ચા કરવામાં આવી રહી છે. આ બેઠકને થર્ડ પ્લેનમ તરીકે ઓળખવામાં આવે છે. જેમાં દેશની આર્થિક નીતિઓ પર ચર્ચા કરવામાં આવી છે. હાલમાં ચીનની કથળતી અર્થવ્યવસ્થા તેના માટે કોઈ મોટા પડકારથી ઓછી નથી. આવી સ્થિતિમાં ચીન અર્થવ્યવસ્થાને પાટા પર લાવવા માટે તમામ શક્ય પ્રયાસો કરી રહ્યું છે.
હકીકતમાં, કોરોના પછી ચીનની હાલત પહેલા કરતા ઘણી ખરાબ થઈ રહી છે. દેશમાં યુવાનોની સંખ્યા ઓછી છે અને વૃદ્ધોની સંખ્યામાં વધારો થયો છે. જેના કારણે ગ્રાહકોમાં ઘટાડો થયો છે. દરેક ક્ષેત્રની હાલત ખરાબ છે. ચીનમાં જેટલો સામાન બની રહ્યો છે તેટલો વાપરવા માટે પૂરતા લોકો નથી. જેની અસર સીધી અર્થવ્યવસ્થાને થઈ રહી છે.
