ઇલોન મસ્કે 3 પાર્ટનર, 11 બાળક માટે ઘર બનાવ્યું:કિંમત 294 કરોડ; અબજોપતિએ કહ્યું- બધા સાથે રહેશે તો હું સરળતાથી તેમને મળી શકીશ

ટેસ્લાના માલિક ઈલોન મસ્ક તેમના 11 બાળકો અને તેમની 3 માતાઓને એક છત નીચે રાખવાની યોજના બનાવી રહ્યા છે. આ માટે તેમણે ટેક્સાસના ઓસ્ટિનમાં 14 હજાર 400 સ્ક્વેર ફૂટનો બંગલો ખરીદ્યો છે. તેની બાજુમાં જ મસ્કે 6 બેડરૂમ ધરાવતું બીજું ઘર પણ ખરીદ્યું છે. આ બંને પ્રોપર્ટીની કિંમત લગભગ 294 કરોડ રૂપિયા છે. ન્યૂયોર્ક ટાઈમ્સ અનુસાર, આ બંગલો મસ્કના ટેક્સાસના ઘરથી માત્ર 10 મિનિટના અંતરે છે. મસ્કનું માનવું છે કે જો બધા બાળકો સાથે રહે તો તેમને એકબીજાને જાણવાની તક મળશે. આ ઉપરાંત, તેઓ પોતે અલગ-અલગ સમયે તેમને વધુ સરળતાથી મળી શકશે. મસ્કના બંગલાને ટસ્કન પ્રેરિત ડિઝાઇન આપવામાં આવી છે. મસ્કના કુલ 12 બાળકો છે, જેમાંથી તેમના પ્રથમ પુત્ર જસ્ટિન મસ્કનું જન્મના 10 અઠવાડિયા પછી જ મૃત્યુ થયું હતું. 2008માં તેમની પ્રથમ પત્નીને છૂટાછેડા આપતા પહેલા આ દંપતીને IVF દ્વારા 5 બાળકો થયા. મસ્કે અત્યાર સુધીમાં બે વાર લગ્ન કર્યા છે
2008માં ઈલોને બ્રિટિશ સ્ટાર તાલુલાહ રિલેને ડેટ કરવાનું શરૂ કર્યું. બંનેએ 2010માં લગ્ન કર્યા. જો કે 2012માં બંનેએ છૂટાછેડા લીધા હતા. આગામી ઉનાળા સુધીમાં તેમણે ફરીથી લગ્ન કર્યા. ડિસેમ્બર 2014માં તાલુલાહે બીજી વખત છૂટાછેડા માટે અરજી કરી, પરંતુ તે પછીના વર્ષે પરત ખેંચી લીધી હતી. માર્ચ 2016માં તાલુલાહે ત્રીજી વખત છૂટાછેડા માટે અરજી કરી હતી. દંપતીને કોઈ સંતાન નથી. ઇલોન અને સિંગર ગ્રિમ્સે મેટ ગાલામાં રેડ કાર્પેટ ડેબ્યુ કર્યું તેના એક મહિના પહેલા એપ્રિલ 2018માં ડેટિંગ કરવાનું શરૂ કર્યું. મે 2020માં દંપતીએ તેમના પ્રથમ બાળકનું સ્વાગત કર્યું. તેને X Æ A-12 નામ આપવામાં આવ્યું. ડિસેમ્બર 2021માં તેઓએ સરોગેટ દ્વારા પુત્રી એક્સા ડાર્ક સાઇડરેલનું સ્વાગત કર્યું. 2022માં બંને અલગ થઈ ગયા. ગયા વર્ષે એવું પણ બહાર આવ્યું હતું કે દંપતીનું ત્રીજું બાળક ટેકનો મિકેનિકસ છે. બાળક વિશે તેની ચોક્કસ જન્મ તારીખ સહિત થોડી માહિતી અસ્તિત્વમાં છે. આ સિવાય મસ્કને ન્યુરાલિંક કંપનીના એક્ઝિક્યુટિવ શિવોન જિલિસ સાથે પણ 3 બાળકો છે. મસ્ક વધુ બાળકો પેદા કરવાના હિમાયતી
મસ્ક માને છે કે વિશ્વ હાલમાં ઓછી વસતિની કટોકટીનો સામનો કરી રહ્યું છે અને સારા આઈક્યુ ધરાવતા લોકોને બાળકો હોવા જોઈએ. તેમણે 2021માં કહ્યું હતું કે જો લોકો વધુ બાળકો પેદા નહીં કરે તો આપણી સભ્યતા ખતમ થઈ જશે. થોડા મહિના પહેલા અમેરિકન અખબાર વોલ સ્ટ્રીટ જર્નલે તેના અહેવાલમાં જણાવ્યું હતું કે મસ્ક મહિલા કર્મચારીઓ પર સંતાન પેદા કરવા માટે દબાણ કરતા હતા. ત્યારબાદ આ કેસમાં ત્રણ મહિલાઓ આગળ આવી, જેમાંથી બેએ દાવો કર્યો કે મસ્ક અને તેમની વચ્ચે શારીરિક સંબંધો હતા. એક મહિલાએ જણાવ્યું કે મસ્કે તેને ઘણી વખત પોતાના સંતાનો હોવાની વાત કરી હતી. આમાંથી એક મહિલા સ્પેસ-એક્સમાં ઈન્ટર્ન હતી. મહિલા કર્મચારીઓનો આરોપ- સ્પેસ-એક્સે બાળકો પેદા કરવાની ના પાડતા પગાર ન આપ્યો
મહિલાઓએ જણાવ્યું હતું કે જ્યારે તેઓએ મસ્ક સાથે બાળકો પેદા કરવાનો ઇનકાર કર્યો ત્યારે તેમને પગાર આપવાનો ઇનકાર કરવામાં આવ્યો હતો. આટલું જ નહીં તેમનું પ્રદર્શન પણ જાણી જોઈને બગાડવામાં આવ્યું હતું. બીજી તરફ ઈલોન મસ્કના વકીલોએ વોલ સ્ટ્રીટ જર્નલના અહેવાલને ફગાવી દીધો હતો. તેમણે કહ્યું કે આ રિપોર્ટ ખોટો છે અને તેમાં ખોટા આરોપો લગાવવામાં આવ્યા છે. આ સિવાય સ્પેસ-એક્સના પ્રમુખ ગ્વેને શોટવેલે પણ આ આરોપોને ખોટા ગણાવ્યા છે.