સલમાન ખાનની ફિલ્મ ‘મૈંને પ્યાર કિયા’ના ગીત ‘કહે તોસે સજના’ અને ‘ગેંગ્સ ઓફ વાસેપુર’ના ગીત ‘તાર બિજલી સે પતલે’ને અવાજ આપનાર પ્રખ્યાત લોક ગાયિકા શારદા સિંહા વેન્ટિલેટર સપોર્ટ પર છે. પદ્મશ્રી અને પદ્મ ભૂષણથી સન્માનિત સિંગર 25 ઓક્ટોબરથી હોસ્પિટલમાં દાખલ છે, જ્યાં તેમની હાલત નાજુક છે. તાજેતરમાં તેમના પુત્રએ સોશિયલ મીડિયા પર લાઇવ કર્યું અને તેમની માતા માટે પ્રાર્થના કરવાની અપીલ કરી. શારદા સિંહાના પુત્ર અંશુમન સિંહાનો એક વીડિયો સોશિયલ મીડિયા પ્લેટફોર્મ X પર સામે આવ્યો છે, જેમાં તેણે કહ્યું છે કે, ‘મા વેન્ટિલેટર પર છે. મેં હમણાં જ કંસેન્ટ પર સહી કરી છે. પ્રાર્થના કરતા રહો. મા એક મોટી લડાઈમાં ગઈ છે. આ સમય ઘણો મુશ્કેલ છે. બસ પ્રાર્થના કરો કે તેઓ લડીને બહાર આવે. હું હમણાં જ તેમને મળ્યો છું. ડૉક્ટરોએ કહ્યું છે કે તેમની તબિયત અચાનક ખરાબ થઈ ગઈ છે અને હવે બધા તેમને બચાવવાનો પ્રયાસ કરી રહ્યા છે. અંશુમને આગળ કહ્યું, ‘હું આ સમયે લાઈવ આવી રહ્યો છું અને માહિતી આપી રહ્યો છું, જેથી કોઈ ખોટી માહિતી ન મૂકે. અમે બધા પ્રાર્થના કરીએ છીએ કે માતા કોઈક રીતે બચી જાય. તેઓ પણ ખૂબ પીડામાં છે. આપ સૌને વિનંતિ છે કે તેઓને તમારી પૂજામાં સામેલ કરો. તેમણે તેમના દેશ અને રાજ્યને ઘણો લાંબો સમય આપ્યો છે, તેથી તે જરૂરી છે કે આપણે બધા તેમના માટે પ્રાર્થના કરીએ કે તેમને થોડો વધુ સમય મળે. શારદાજી આ સમયે વેન્ટિલેટર પર છે. જો રિપોર્ટ્સનું માનીએ તો શારદા સિંહાને 25 ઓક્ટોબરે દિલ્હીની એમ્સમાં દાખલ કરવામાં આવી હતી. ત્યારથી તેમની તબિયત નાજુક છે. શારદા સિંહા બિહારની પ્રખ્યાત લોક ગાયિકા છે, જેમના છઠ પર ગાયેલા ગીતો ખૂબ જ પ્રખ્યાત છે. બિહારના નાઇટિંગેલ તરીકે ઓળખાતા શારદાએ ભોજપુરી, મૈથિલી, માગહી સહિત ઘણી ભાષાઓમાં લોકગીતો ગાયા છે. શારદા દેવીએ 1989માં રિલીઝ થયેલી બોલિવૂડ ફિલ્મ ‘મૈંને પ્યાર કિ’યા’ના ‘કહે તોસે સજના’ ગીતો અને ‘ગેંગ્સ ઓફ વાસેપુર’ના પ્રખ્યાત ગીત ‘તાર બિજલી સે પતલેને અવાજ આપ્યો છે. તેમને 1991માં પદ્મશ્રી અને 2018માં પદ્મ ભૂષણથી નવાજવામાં આવ્યા હતા.
