કાર લાયસન્સ પર 7500kg વાહન ચલાવવા પર કોઈ પ્રતિબંધ નહીં:સુપ્રીમ કોર્ટે 2017ના નિર્ણયને માન્ય રાખ્યો, કહ્યું- આ રોજીરોટી સાથે જોડાયેલો મુદ્દો

સુપ્રીમ કોર્ટે કાર લાયસન્સ એટલે કે લાઇટ મોટર વ્હીકલ (LMV) લાયસન્સ ધારકોને 7,500 કિલો સુધીના વજનના વાહનો ચલાવવાની પરવાનગી આપી છે. બુધવારે સુનાવણી દરમિયાન, કોર્ટે કહ્યું કે એવો કોઈ ડેટા નથી જે સાબિત કરે કે LMV ડ્રાઇવિંગ લાઇસન્સ ધારકો દેશમાં વધી રહેલા માર્ગ અકસ્માતો માટે જવાબદાર છે. ચુકાદો આપતી વખતે, મુખ્ય ન્યાયાધીશ ડીવાય ચંદ્રચુડની આગેવાની હેઠળની પાંચ જજોની બેંચે કહ્યું કે, આ મુદ્દો એલએમવી ડ્રાઇવિંગ લાઇસન્સ ધરાવતા ડ્રાઇવરોની આજીવિકા સાથે સંબંધિત છે. કોર્ટે કેન્દ્રને કાયદામાં સુધારાની પ્રક્રિયા જલ્દી પૂર્ણ કરવા પણ કહ્યું છે. સુપ્રીમ કોર્ટના આ નિર્ણયને વીમા કંપનીઓ માટે ફટકો માનવામાં આવી રહ્યો છે. જો અમુક ચોક્કસ વજનના પરિવહન વાહનો અકસ્માતમાં સામેલ હોય અને ડ્રાઇવરોને નિયમો અનુસાર ચલાવવા માટે અધિકૃત ન હોય તો વીમા કંપનીઓ દાવાને નકારી કાઢતી હતી. 18 જુલાઈ, 2023 ના રોજ સુપ્રીમ કોર્ટની બંધારણીય બેંચે આ કાયદાકીય સવાલ સાથે સંબંધિત 76 અરજીઓની સુનાવણી શરૂ કરી. મુખ્ય અરજી બજાજ એલાયન્સ જનરલ ઈન્સ્યોરન્સ કંપની લિમિટેડ વતી દાખલ કરવામાં આવી હતી. સુપ્રીમ કોર્ટના નિર્ણય વિશે 3 ખાસ વાતો આ સવાલ 2017ના એક કેસ પરથી ઉઠાવવામાં આવ્યો હતો
હકીકતમાં, આ સવાલ ત્યારે ઊભો થયો જ્યારે 2017માં સુપ્રીમ કોર્ટની ત્રણ જજોની બેંચે મુકુંદ દેવાંગન વિરુદ્ધ ઓરિએન્ટલ ઇન્સ્યોરન્સ કંપની લિમિટેડના કેસમાં નિર્ણય આપ્યો હતો. ત્યારે કોર્ટે કહ્યું હતું કે, આવા પરિવહન વાહનો જેનું કુલ વજન 7,500 કિલોથી વધુ ન હોય તેને LMV એટલે કે લાઇટ મોટર વ્હીકલની વ્યાખ્યામાંથી બાકાત કરી શકાય નહીં. વીમા કંપનીઓએ ક્લેમ ટ્રિબ્યુનલ અને કોર્ટમાં આરોપ લગાવ્યા હતા
વીમા કંપનીઓએ આરોપ મૂક્યો હતો કે મોટર એક્સિડન્ટ ક્લેઈમ ટ્રિબ્યુનલ (MACT) અને અદાલતો LMV ડ્રાઇવિંગ લાયસન્સ અંગેના તેમના વાંધાને અવગણીને તેમને વીમાના દાવા ચૂકવવાના આદેશો પસાર કરી રહી છે. વીમા કંપનીઓએ કહ્યું હતું કે, વીમા દાવા વિવાદોનો નિર્ણય કરતી વખતે અદાલતો વીમાધારકની તરફેણમાં ચુકાદો આપી રહી હતી.