હરિયાણાના અંશુલ કંબોજે રણજી ટ્રોફી 2024-25ના પાંચમા રાઉન્ડમાં કેરળ સામે પહેલી ઇનિંગમાં 10 વિકેટ લીધી હતી. તે ટુર્નામેન્ટના ઈતિહાસમાં એક ઇનિંગમાં 10 વિકેટ લેનારો ત્રીજો બોલર બની ગયો છે. કેરળ સામે લાહલીમાં રમાઈ રહેલી રણજી મેચમાં તેણે પહેલી ઇનિંગમાં 49 રન આપીને તમામ ખેલાડીઓને પેવેલિયન મોકલી દીધા હતા. કંબોજે ગુરુવારે રણજીના બીજા દિવસની રમતના અંત સુધીમાં કેરળના આઠ ખેલાડીઓને પેવેલિયનમાં મોકલી દીધા હતા. શુક્રવારે સવારે, તેણે થમ્પીને પ્રથમ ઓવરમાં આઉટ કરીને તેની નવમી વિકેટ લીધી અને શોન રોજરને આઉટ કરીને તેની 10મી વિકેટ પૂરી કરી, જેના કારણે કેરળની ટીમ પહેલી ઇનિંગમાં 291 રનમાં ઓલઆઉટ થઈ ગઈ હતી. કંબોજ પહેલા રણજીમાં બે ખેલાડીઓએ પહેલી ઇનિંગમાં 10 વિકેટ લેવાની સિદ્ધિ મેળવી હતી. બંગાળના પ્રેમાંગસુ મોહન ચેટર્જી 1956-57 સિઝનમાં આ સિદ્ધિ હાંસલ કરનાર પ્રથમ બોલર હતા. જ્યારે રાજસ્થાનના પ્રદીપ સુંદરમે 1985-86ની સિઝનમાં વિદર્ભ સામેની મેચમાં એક ઇનિંગમાં તમામ 10 વિકેટો લીધી હતી. કંબોજ ફર્સ્ટ ક્લાસમાં આવું કરનાર છઠ્ઠો બોલર
કંબોજ ફર્સ્ટ ક્લાસમાં 10 વિકેટ લેનારો માત્ર છઠ્ઠો ભારતીય બોલર છે, તેના પહેલા અનુભવી લેગ સ્પિનર અનિલ કુંબલે, સુભાષ ગુપ્તે અને દેવાશીષ મોહંતી આ યાદીમાં સામેલ છે. ઇમર્જિંગ એશિયા કપમાં ઈન્ડિયા-Aનું પ્રતિનિધિત્વ કર્યું છે
કંબોજે ગયા મહિને યોજાયેલા ઇમર્જિંગ એશિયા કપમાં ઈન્ડિયા-A નું પ્રતિનિધિત્વ કર્યું છે. તેણે ટુર્નામેન્ટમાં રમાયેલી ત્રણ મેચમાં 10ના ઈકોનોમી રેટથી બોલિંગ કરી અને 4 વિકેટ પણ લીધી. કંબોજે આ વર્ષે રમાયેલી દુલીપ ટ્રોફીમાં પણ શાનદાર પ્રદર્શન કર્યું હતું. તે સૌથી વધુ વિકેટ લેનાર બોલર હતો. ઈન્ડિયા-C તરફથી રમતા, તેણે 3 મેચમાં 3.19ની ઈકોનોમી સાથે બોલિંગ કરી અને 16 વિકેટ લીધી. તેણે ટુર્નામેન્ટમાં તેની બીજી મેચમાં આઠ વિકેટ ઝડપી હતી. આ રીતે, તે દુલીપ ટ્રોફીની મેચમાં આઠ વિકેટ લેનારો ત્રીજો ઝડપી બોલર બન્યો. તેમની પહેલાં મોહંતી (10/46) અને અશોક ડિંડા (8/123) હતા. કંબોજ છેલ્લી ડોમેસ્ટિક સિઝન દરમિયાન ચર્ચામાં આવ્યો હતો અને તેને મુંબઈ ઈન્ડિયન્સે IPL 2024 સિઝન માટે પસંદ કર્યો હતો. ગયા વર્ષે, કંબોજે હરિયાણાને પહેલીવાર વિજય ટ્રોફી જીતાડવામાં મહત્વની ભૂમિકા ભજવી હતી. તે 10 મેચમાં 17 વિકેટ સાથે સૌથી વધુ વિકેટ લેનારા બોલરોમાં સામેલ હતો. કંબોજે 15 લિસ્ટ-A મેચમાં 23 વિકેટ ઝડપી છે. રણજી ટ્રોફી સાથે જોડાયેલા આ સમાચાર પણ વાંચો… એક જ મેચમાં બે પ્લેયર્સે ટ્રિપલ સેન્ચુરી ફટકારી: ગોવાના કૌથનકર-બાકલે વચ્ચે 606 રનની મેરેથોન પાર્ટનરશિપ, રણજી ટ્રોફીમાં ઐતિહાસિક રેકોર્ડ; અર્જુન તેંડુલકરે પણ પરાક્રમ કર્યું ગોવા અને અરુણાચલ પ્રદેશ વચ્ચેની રણજી મેચમાં એક એવું પરાક્રમ થયું છે, જેણે વિશ્વ ક્રિકેટને ચોંકાવી દીધું છે. હકીકતમાં ગોવાના મિડલ ઓર્ડર બેટર કશ્યપ બાકલે 269 બોલમાં 300 રનની અણનમ ઇનિંગ રમી હતી, જ્યારે સ્નેહલ કૌથાનકરે માત્ર 215 બોલમાં 45 ફોર અને 4 સિક્સરની મદદથી અણનમ 314 રન બનાવ્યા હતા. બંનેએ સાથે મળીને ત્રીજી વિકેટ માટે 448 બોલમાં 606 રનની અણનમ ભાગીદારી કરી હતી. આમ કરીને બંનેએ ઐતિહાસિક રેકોર્ડ બનાવ્યો છે. સંપૂર્ણ સમાચાર વાંચો…
હરિયાણાના અંશુલે કેરળ સામે એક ઇનિંગમાં 10 વિકેટ ઝડપી:રણજીમાં આવું કરનાર ત્રીજો બોલર; કેરળ પહેલી ઇનિંગમાં 291 રનમાં ઓલઆઉટ થયું
