સ્ટાર પ્લસનો લોકપ્રિય શો ‘અનુપમા’ હંમેશા ટીઆરપી અને સ્ટોરીને લઈને સમાચારોમાં રહે છે. પરંતુ આ વખતે આ ટીવી શો એક મોટી દુર્ઘટનાને કારણે હેડલાઇન્સમાં છે. વાસ્તવમાં રૂપાલી ગાંગુલી સ્ટારર ટીવી શો ‘અનુપમા’ના ક્રૂ મેમ્બરનું ઈલેક્ટ્રીક શોક લાગવાથી મોત થયું છે. વીજ કરંટ લાગતાં તેને તાત્કાલિક હોસ્પિટલમાં લઈ જવામાં આવ્યો હતો, પરંતુ સારવાર દરમિયાન તેનું મોત નીપજ્યું હતું. આ દુર્ઘટના ત્યારે થઈ જ્યારે ક્રૂ મેમ્બર કેટલીક ટેકનિકલ વસ્તુઓ સંભાળી રહ્યો હતો અને તે દરમિયાન તેણે અકસ્માતે વીજ વાયરને સ્પર્શ કર્યો. FWICE તપાસ કરી રહી છે
દિવ્ય ભાસ્કરે આ અંગે ફેડરેશન ઓફ વેસ્ટર્ન ઈન્ડિયા સિને એમ્પ્લોઈઝ (FWICE)ના પ્રમુખ બીએન તિવારી સાથે વાત કરી હતી. બીએન તિવારીએ કહ્યું- ગુરુવારે રાત્રે 9.30 વાગ્યે અનુપમા સિરિયલના સેટ પર શોર્ટ સર્કિટના કારણે એક લાઇટમેનનું મોત થયું હતું. અમે સમગ્ર મામલો જાણવાનો પ્રયાસ કરી રહ્યા છીએ. અત્યારે અમને તે લાઇટમેનનું નામ પણ જણાવવામાં આવ્યું નથી. પ્રોડક્શન ટીમ આ બાબતને કેમ છુપાવવા માંગે છે તેની તપાસ કરવામાં આવી રહી છે. જો બેદરકારી હશે તો તેને સાંખી લેવામાં આવશે નહીં. જો કે, હજુ સુધી રાજન શાહીની પ્રોડક્શન ટીમ ‘ડિરેક્ટર્સ કટ પ્રોડક્શન’એ આ સમગ્ર મામલે કોઈ નિવેદન આપ્યું નથી. પ્રોડક્શન ટીમે હજુ સુધી વ્યક્તિનું નામ અને ઉંમર જાહેર કરી નથી. આ શો ટીઆરપી લિસ્ટમાં પાછળ રહી ગયો
શોની ટીઆરપીની વાત કરીએ તો આ વખતે ‘અનુપમા’ ટીઆરપી લિસ્ટમાં બીજા સ્થાને પહોંચી ગઈ છે. લાંબા સમયથી ટોપ પર રહેલો આ શો આ વખતે 2.2 ટીઆરપી સાથે પાછળ રહી ગયો છે, જ્યારે ‘યે રિશ્તા ક્યા કહેલાતા હૈ’ ટીઆરપી લિસ્ટમાં ટોપ પર છે. રૂપાલી ગાંગુલીનો તેની સાવકી પુત્રી સાથે ચાલી રહેલો વિવાદ
‘અનુપમા’ની લીડ એક્ટ્રેસ રૂપાલી ગાંગુલી હાલમાં તેની સાવકી દીકરી ઈશા વર્માને લઈને વિવાદમાં છે. તાજેતરમાં, સોશિયલ મીડિયા પર એક પોસ્ટ શેર કરતી વખતે, ઈશાએ અભિનેત્રી પર તેની માતાના ઘરેણાં ચોરી કરવાનો અને તેના માતાપિતાના લગ્ન તોડવાનો આરોપ લગાવ્યો હતો. ‘અનુપમા’ શોના નિર્માતા રાજન શાહીએ આ મામલે રૂપાલી ગાંગુલીનું સમર્થન કર્યું હતું. નિર્માતાએ પણ એક પોસ્ટ શેર કરીને રૂપાલીને સમર્થન આપ્યું હતું.
‘અનુપમા’ સિરિયલના સેટ પર લાઇટમેનનું મોત:શોની પ્રોડક્શન ટીમ વ્યક્તિની ઓળખ જાહેર કરી રહી નથી, FWICE તરફથી તપાસ શરુ
