પાકિસ્તાન- ઈમરાન ખાનને તોશાખાનાના બીજા કેસમાં જામીન મળ્યા:મુક્તિને લઈને સ્થિતિ સ્પષ્ટ નથી; 474 દિવસથી જેલમાં બંધ છે પૂર્વ PM

જેલમાં બંધ પાકિસ્તાનના પૂર્વ વડાપ્રધાન ઈમરાન ખાનને તોશાખાના (તોશાખાના કેસ-2) સંબંધિત બીજા કેસમાં જામીન મળી ગયા છે. ઈસ્લામાબાદ હાઈકોર્ટે જામીન તરીકે 10 લાખ પાકિસ્તાની રૂપિયાના બોન્ડ જમા કરવાનો આદેશ આપ્યો છે. ઈમરાન ખાન ગયા વર્ષે 5 ઓગસ્ટથી જેલમાં છે. જો કે હજુ સુધી એ સ્પષ્ટ નથી થયું કે જામીન મળ્યા બાદ ઈમરાનને મુક્ત કરવામાં આવશે કે નહીં. પહેલેથી જ જેલમાં બંધ ઈમરાન ખાન અને તેની પત્ની બુશરા બીબીની આ વર્ષે 13 જુલાઈના રોજ તોશાખાના કેસ-2માં જેલમાંથી ધરપકડ કરવામાં આવી હતી. જો કે ગયા મહિને 24 ઓક્ટોબરે બુશરા બીબીને ઈસ્લામાબાદ હાઈકોર્ટમાંથી જામીન મળી ગયા હતા. ગયા અઠવાડિયે ગુરુવારે પાકિસ્તાનની કોર્ટમાં તોશાખાના કેસ-2માં ઈમરાન અને બુશરાને નિર્દોષ જાહેર કરવા માટે સુનાવણી હાથ ધરવામાં આવી હતી. જોકે કોર્ટે આ અરજી ફગાવી દીધી હતી. ઈમરાન 474 દિવસથી જેલમાં
ઈમરાન અલગ-અલગ કેસમાં 474 દિવસથી રાવલપિંડીની અદિયાલા જેલમાં બંધ છે. ઈસ્લામાબાદની સ્થાનિક કોર્ટે 5 ઓગસ્ટ, 2023ના રોજ તોશાખાના કેસમાં તેને દોષિત ઠેરવ્યો હતો. આ પછી તેને ઈસ્લામાબાદના જમાન પાર્ક સ્થિત ઘરમાંથી ધરપકડ કરીને જેલમાં મોકલી દેવામાં આવ્યો હતો. બાદમાં તેને વધુ 2 કેસમાં દોષિત ઠેરવવામાં આવ્યો હતો. જો કે આ તમામ કેસમાં ઈમરાનને નિર્દોષ જાહેર કરવામાં આવ્યો છે. 13 જુલાઈના રોજ નકલી નિકાહ કેસમાં છૂટ્યા પછી, તોશાખાના કેસ-2 કેસમાં તેની ધરપકડ કરવામાં આવી હતી. ઈમરાન ખાન સંબંધિત મોટા કેસોની વિગતો કેસ- 1: બુશરા બીબીના પૂર્વ પતિ ખાવર ફરીદ માણેકાએ બુશરા અને ઈમરાન પર ગેર-ઈસ્લામિક લગ્ન કરવાનો આરોપ લગાવ્યો હતો. બુશરાના છૂટાછેડા પછી, ખાને ઇદ્દતનો સમયગાળો પૂરો થાય તે પહેલાં તેની સાથે લગ્ન કર્યા. આ કેસમાં બુશરા અને ઈમરાનને 3 ફેબ્રુઆરીએ દોષિત ઠેરવવામાં આવ્યા હતા. તેને 7 વર્ષની જેલ અને 5 લાખ પાકિસ્તાની રૂપિયાનો દંડ ફટકારવામાં આવ્યો હતો. આ કેસમાં બંનેને 13 જુલાઈના રોજ છોડી મૂકવામાં આવ્યા હતા. કેસ-2: અગાઉ 3 જૂને ઈસ્લામાબાદ હાઈકોર્ટે ઈમરાન ખાનને પુરાવાના અભાવે સાઈફર કેસ (ગુપ્ત પત્ર ચોરી)માં નિર્દોષ જાહેર કર્યા હતા. ઈસ્લામાબાદની વિશેષ અદાલતે તેને 10 વર્ષની સજા સંભળાવી હતી. ઈમરાન ખાનને 29 ઓગસ્ટ 2023ના રોજ સાયફર ગેટ કૌભાંડમાં અટકાયતમાં લેવામાં આવ્યો હતો. કેસ-3: તોશાખાના કેસમાં ખાનને 1 એપ્રિલે ​​​​​​​મુક્ત કરવામાં આવ્યો હતો. તેની 14 વર્ષની સજા રદ કરવામાં આવી હતી. કેસ-4: તોશાખાના સંબંધિત બીજા કેસમાં 13 જુલાઈએ ઈમરાનની ધરપકડ કરવામાં આવી હતી. આ કેસ તોષાખાનાના પ્રથમ કેસનો ફોલો-અપ હતો. પહેલા કેસમાં, ઈમરાન ખાન અને તેની પત્ની બુશરા પર અન્ય દેશોના રાષ્ટ્રાધ્યક્ષો પાસેથી મળેલી ભેટની માહિતી છુપાવવાનો અને તેને બજારમાં વેચવાનો આરોપ હતો. આજે એટલે કે 20મી નવેમ્બરે તેમને આ કેસમાં જામીન મળી ગયા છે.