‘અમે તેમને ખૂદથી અલગ નથી કર્યા’:ચિન્મય પ્રભુ અંગે બાંગ્લાદેશ ઇસ્કોનની સ્પષ્ટતા; ગઈકાલે કહ્યું હતું- ચિન્મય સાથે અમારો કોઈ સંબંધ નથી

ઈન્ટરનેશનલ સોસાયટી ફોર ક્રિષ્ના કોન્શિયસનેસ (ઇસ્કોન) એ ધાર્મિક નેતા ચિન્મય કૃષ્ણ પ્રભુ દાસને લઈને પોતાનું વલણ સ્પષ્ટ કર્યું છે. ઇસ્કોને શુક્રવારે રાત્રે સોશિયલ મીડિયા પર એક નિવેદન જારી કરીને કહ્યું કે, ચિન્મય પ્રભુ સંસ્થાના સત્તાવાર સભ્ય નથી, પરંતુ તેઓ તેમના અધિકારો અને સ્વતંત્રતાનું સમર્થન કરે છે. સંસ્થાએ ચિન્મય પ્રભુથી પોતાને દૂર કર્યા નથી અને કરશે પણ નહીં. ચિન્મય પ્રભુની દેશદ્રોહના આરોપમાં બાંગ્લાદેશમાં ધરપકડ કરવામાં આવી છે. તેમની ધરપકડ બાદ સમગ્ર દેશમાં તણાવનું વાતાવરણ છે. તેમની જામીન અરજી રદ થવાને કારણે ઘણી જગ્યાએ હિંસા પણ થઈ હતી. આ પછી ગુરુવારે ઇસ્કોન બાંગ્લાદેશે ચિન્મય પ્રભુથી પોતાને દૂર કર્યા. ઇસ્કોન બાંગ્લાદેશના જનરલ સેક્રેટરી ચારુ ચંદ્ર દાસ બ્રહ્મચારીએ કહ્યું હતું કે, ચિન્મયને શિસ્તના ભંગને કારણે સંસ્થાના તમામ હોદ્દા પરથી હટાવી દેવામાં આવ્યા છે. તેઓ તેમના કોઈપણ નિવેદનો અથવા પ્રતિક્રિયાઓની જવાબદારી લેતા નથી. ત્યારથી ઇસ્કોનની ટીકા થઈ રહી હતી. ચિન્મય પ્રભુની જામીન અરજી ફગાવી દેવાયા બાદ હિંસા ફાટી નીકળી હતી
26 નવેમ્બરના રોજ ચટગાંવમાં ઇસ્કોન ચીફના જામીન ફગાવી દેવામાં આવ્યા હતા, જેના પગલે વકીલ સૈફુલ ઇસ્લામે હિંસામાં જીવ ગુમાવ્યો હતો. આ પછી 27 નવેમ્બરે બાંગ્લાદેશ હાઈકોર્ટમાં અરજી દાખલ કરીને ઇસ્કોન પર પ્રતિબંધ લગાવવાની માગ કરવામાં આવી હતી. અરજી દાખલ કરનાર વકીલે કોર્ટને જણાવ્યું હતું કે, સૈફુલના મોત પાછળ ઇસ્કોનના લોકોનો હાથ છે. આવી સ્થિતિમાં આ સંગઠન પર પ્રતિબંધ મુકવો જોઈએ. આ અરજીમાં ચટગાંવમાં ઈમરજન્સી જાહેર કરવાની પણ માગ કરવામાં આવી હતી. આ અરજી પર બાંગ્લાદેશના એટર્ની જનરલ મુહમ્મદ અસદુઝમાને ઇસ્કોનને ધાર્મિક કટ્ટરવાદી સંગઠન ગણાવ્યું હતું. ઢાકા હાઈકોર્ટે ઇસ્કોન પર પ્રતિબંધ મૂકવાનો ઈન્કાર કર્યો
28 સપ્ટેમ્બરે ઢાકા હાઈકોર્ટે ઇસ્કોન પર પ્રતિબંધ મૂકવાની માગને ફગાવી દીધી હતી. બાંગ્લાદેશની વચગાળાની સરકારે કોર્ટમાં કહ્યું કે, અમે ઇસ્કોનની ગતિવિધિઓ સામે જરૂરી પગલાં લીધા છે. આ મુદ્દો સરકારની પ્રાથમિકતા છે. સરકારે કહ્યું કે, ઇસ્કોન કેસમાં અત્યાર સુધીમાં 3 કેસ નોંધાયા છે અને 33 લોકોની ધરપકડ કરવામાં આવી છે. દેશમાં કોઈપણ પ્રકારની અશાંતિને રોકવા માટે સેના તૈનાત કરવામાં આવી છે. સુનાવણી દરમિયાન, અરજી દાખલ કરનાર વકીલે કહ્યું- ઇસ્કોન પર પ્રતિબંધ મૂકવાનો આ યોગ્ય સમય છે. તેના પર કોર્ટે કહ્યું કે આનો નિર્ણય સરકાર કરશે. દાવો- બાંગ્લાદેશ ઇસ્કોન મુદ્દે મોદી-જયશંકરની મુલાકાત
મીડિયા રિપોર્ટ્સ અનુસાર, બાંગ્લાદેશમાં ઇસ્કોન મુદ્દે ગુરુવારે પીએમ નરેન્દ્ર મોદી અને વિદેશ મંત્રી એસ જયશંકર વચ્ચે વાતચીત થઈ હતી. વિદેશ મંત્રીએ તેમને ત્યાંની સ્થિતિ વિશે માહિતી આપી હતી. તે જ સમયે, પશ્ચિમ બંગાળના મુખ્યમંત્રી મમતા બેનર્જીએ કહ્યું હતું કે, તેઓ આ મામલે કેન્દ્રની સાથે છે. શેખ હસીનાએ પણ ચિન્મયની મુક્તિની માંગણી કરી હતી
બાંગ્લાદેશના ભૂતપૂર્વ વડાપ્રધાન શેખ હસીનાએ પણ ગુરુવારે ઇસ્કોનના ચિન્મય પ્રભુની ધરપકડની નિંદા કરી હતી અને વચગાળાની સરકારને તેમને તાત્કાલિક મુક્ત કરવા જણાવ્યું હતું. હસીનાએ કહ્યું કે, સનાતન ધર્મના એક અગ્રણી નેતાની અન્યાયી રીતે ધરપકડ કરવામાં આવી છે. હસીનાએ કહ્યું કે ચટગાંવમાં એક મંદિર સળગાવવામાં આવ્યું. આ પહેલા અહમદિયા સમુદાયના લોકોના મસ્જિદો, ચર્ચ અને ઘરો પર હુમલા કરવામાં આવ્યા હતા. હસીનાએ તમામ સમુદાયના લોકોની ધાર્મિક સ્વતંત્રતા, સુરક્ષા અને સંપત્તિની સુરક્ષા સુનિશ્ચિત કરવા કહ્યું છે. હસીનાનું આ નિવેદન તેની પાર્ટી અવામી લીગે X પર પોસ્ટ કર્યું હતું. કોણ છે ચિન્મય પ્રભુ, જેમની ધરપકડ પર ભારત બાંગ્લાદેશ પર ગુસ્સે થયું?
ચિન્મય કૃષ્ણ દાસ બ્રહ્મચારીનું સાચું નામ ચંદન કુમાર ધર છે. તેઓ ચટગાંવ ઇસ્કોનના વડા છે. બાંગ્લાદેશમાં ચાલી રહેલી હિંસા વચ્ચે પીએમ શેખ હસીનાએ 5 ઓગસ્ટ, 2024ના રોજ દેશ છોડી દીધો હતો. આ પછી હિન્દુઓ વિરુદ્ધ મોટા પાયે હિંસક ઘટનાઓ બની. આ પછી બાંગ્લાદેશી હિંદુઓ અને લઘુમતીઓના હિતોની રક્ષા માટે સનાતન જાગરણ મંચની રચના કરવામાં આવી. ચિન્મય પ્રભુ તેના પ્રવક્તા બન્યા. સનાતન જાગરણ મંચ દ્વારા ચિન્મયે ચટગાંવ અને રંગપુરમાં ઘણી રેલીઓને સંબોધિત કરી. જેમાં હજારો લોકોએ ભાગ લીધો હતો. શા માટે ચિન્મય પ્રભુની ધરપકડ કરવામાં આવી?
25 ઓક્ટોબરના રોજ સનાતન જાગરણ મંચે 8 મુદ્દાની માંગણીઓ સાથે ચટગાંવના લાલદીઘી મેદાનમાં રેલી યોજી હતી. ચિન્મય કૃષ્ણ દાસે આમાં વક્તવ્ય આપ્યું હતું. આ દરમિયાન કેટલાક લોકોએ ન્યૂ માર્કેટ ચોકમાં આઝાદી સ્તંભ પર ભગવો ધ્વજ ફરકાવ્યો હતો. આ ધ્વજ પર ‘આમી સનાતની’ લખેલું હતું. રેલી બાદ 31 ઓક્ટોબરે બેગમ ખાલિદા જિયાની BNP પાર્ટીના નેતા ફિરોઝ ખાને ચટગાંવમાં ચિન્મય કૃષ્ણ દાસ સહિત 19 લોકો વિરુદ્ધ દેશદ્રોહનો કેસ દાખલ કર્યો હતો. તેના પર રાષ્ટ્રધ્વજનું અપમાન કરવાનો આરોપ છે. ચિન્મય પ્રભુની ધરપકડ કેવી રીતે થઈ?
બાંગ્લાદેશ પોલીસે સોમવારે ઢાકાના હઝરત શાહજલાલ ઈન્ટરનેશનલ એરપોર્ટ પરથી ચિન્મય કૃષ્ણ દાસ બ્રહ્મચારીની ધરપકડ કરી હતી. તેઓ ચટગાંવ જઈ રહ્યા હતા. ઘટનાસ્થળે હાજર ઇસ્કોનના સભ્યોએ જણાવ્યું હતું કે ડીબી પોલીસે કોઈ ધરપકડ વોરંટ દર્શાવ્યું નથી. તેઓએ ફક્ત કહ્યું કે તેઓ વાત કરવા માગે છે. આ પછી તેઓ તેમને બસમાં લઈ ગયા. ઢાકા મેટ્રોપોલિટન પોલીસની ડિટેક્ટિવ બ્રાન્ચ (ડીબી)ના એડિશનલ પોલીસ કમિશનર રેઝાઉલ કરીમ મલિકે જણાવ્યું હતું કે, પોલીસની વિનંતીને પગલે ચિન્મય કૃષ્ણ દાસની ધરપકડ કરવામાં આવી હતી. ચિન્મય દાસને કાયદાકીય પ્રક્રિયા માટે સંબંધિત પોલીસ સ્ટેશનને સોંપવામાં આવશે. ચિન્મય પ્રભુની ધરપકડ અંગે ભારતનું વલણ શું?
ચિન્મય પ્રભુની ધરપકડ પર ભારતે નારાજગી વ્યક્ત કરી હતી. ભારતના વિદેશ મંત્રાલયે મંગળવારે જારી એક નિવેદનમાં કહ્યું કે અમે ચિન્મય કૃષ્ણ દાસની ધરપકડથી ચિંતિત છીએ. વિદેશ મંત્રાલયે કહ્યું હતું કે તે દુર્ભાગ્યપૂર્ણ છે કે ગુનેગારો મુક્તપણે ફરે છે, પરંતુ શાંતિપૂર્ણ સભાઓ દ્વારા યોગ્ય માગણીઓ ઉઠાવનારા ધાર્મિક નેતા વિરુદ્ધ કેસ ચાલી રહ્યા છે. ચિન્મય પ્રભુની ધરપકડ પર ભારતના નિવેદનના મહત્વના મુદ્દા… બાંગ્લાદેશે પણ આપ્યો જવાબ, કહ્યું- તથ્યો ખોટી રીતે રજૂ કરવામાં આવ્યા
બાંગ્લાદેશે પણ ભારતીય વિદેશ મંત્રાલય દ્વારા જારી કરાયેલા નિવેદન પર પ્રતિક્રિયા આપી છે. બાંગ્લાદેશના વિદેશ મંત્રાલયે મંગળવારે કહ્યું, “તે ખૂબ જ દુઃખદ છે કે ચિન્મય કૃષ્ણ દાસની ધરપકડને કેટલાક લોકો દ્વારા ખોટી રીતે રજૂ કરવામાં આવી છે.” મંત્રાલયે કહ્યું કે, આવા નિવેદનો માત્ર તથ્યોને ખોટી રીતે રજૂ કરતા નથી, પરંતુ તે બંને પાડોશી દેશો વચ્ચે મિત્રતા અને પરસ્પર સમજણની ભાવનાની પણ વિરુદ્ધ છે. બાંગ્લાદેશ સરકાર પુનરોચ્ચાર કરવા માંગે છે કે દેશની ન્યાયતંત્ર સંપૂર્ણપણે સ્વતંત્ર છે અને સરકાર તેમના કામકાજમાં દખલ કરતી નથી.