નડિયાદમાં અતિભરચક વિસ્તાર ગણાતા નટપુર બેંકથી સિંદુશી પોળ સુધીનો RCC રોડ સવા વર્ષ પહેલા બન્યો અને ઠેકઠેકાણે તૂટી જતાં શહેર (જિ) કોંગ્રેસે આ રોડ પર ભ્રષ્ટાચાર થયો હોવાના આક્ષેપો કરી આજે સૂત્રોચ્ચાર સાથે રેલી કાઢી હતી. આ ઉપરાંત ઠેકઠેકાણે રોડ પર ભ્રષ્ટાચાર લખી દેખાવો કર્યા છે. નડિયાદ શહેરમાં મુખ્ય બજાર ગણાતા એવા નટપુર બેંકથી સિંદુશી પોળ સુધીનો રસ્તો તાજેતરમાં એટલે કે, સવા વર્ષ અગાઉ જ બન્યો હતો. તૂટેલ અને ઉબડખાબડ રોડ RCC થતાં રાહદારીઓ અને સ્થાનિકોએ રાહતનો શ્વાસ લીધો હતો. પરંતુ આ રોડ તૂટી ગયાનો અક્ષેપ શહેર (જિ) કોંગ્રેસે લગાવ્યો છે. આ રોડ બનાવવામાં ભ્રષ્ટાચાર આચર્યો હોવાનું જણાવી આજે બુધવારે સૂત્રોચ્ચાર સાથેની આ રોડ પર રેલી કાઢી હતી. આ ઉપરાંત ભ્રષ્ટાચારના પ્લેકાર્ડ સાથે રાખી વિરોધ દર્શાવ્યો અને દેખાવો કર્યા છે. કોઈ અનિચ્છનીય બનાવ ન બને તે હેતુસર આ સમયે નડિયાદ ટાઉન પોલીસનો કાફલો પણ ખડકી દેવાયો હતો. નડિયાદ શહેર કોંગ્રેસ પ્રમુખ હાર્દિક ભટ્ટે જણાવ્યું હતું કે, આ રોડ સવા વર્ષ પહેલા જ બન્યો હતો અને ઠેકઠેકાણે તૂટતા અમે આજે સૂત્રોચ્ચાર સાથે આ રોડ પર દેખાવો કરી રેલી કાઢી હતી. અમારી માંગણી છે કે, આ કોન્ટ્રાક્ટરને બ્લેક લિસ્ટ કરવો જોઈએ. વધુમાં તેમણે આ રોડ પર ભ્રષ્ટાચાર થયાના આક્ષેપો કર્યા છે.
