આજકાલ લોકો ફૂડ હાઈજીનનું ખૂબ ધ્યાન રાખે છે. તે જરૂરી પણ છે, કારણ કે થોડી બેદરકારી પણ જીવલેણ સાબિત થઈ શકે છે. હાલમાં બહારના ફૂડ સ્ટોલ અને રેસ્ટોરન્ટમાં મળતા ખોરાકને લઈને દરરોજ ફરિયાદો મળી રહી છે. ક્યારેક ખોરાક ગંદો હોય છે તો ક્યારેક ખોરાકમાં જંતુઓ જોવા મળે છે. હવે ભારતીય રેલ્વેની લક્ઝરી ટ્રેનોમાં પણ આવું જ થવા લાગ્યું છે. વંદે ભારત એક્સપ્રેસ ટ્રેન, જેના ભોજનમાં ફરી એકવાર જંતુ જોવા મળ્યો છે. જ્યારે પેસેન્જરે ફરિયાદ નોંધાવી ત્યારે IRCTCએ કેટરિંગ સર્વિસને દંડ ફટકાર્યો હતો. તમને જણાવી દઈએ કે નવેમ્બર મહિનામાં પણ વંદે ભારત ટ્રેનના ખોરાકમાં જંતુ મળી આવ્યો હતો અને ત્યારે પણ દંડ ફટકાર્યો હતો. શાકભાજીની અંદર ફરતો જોવા મળ્યું જંતુ
મીડિયા રિપોર્ટ્સ અનુસાર, વિકાસ કુમાર વારાણસીથી નવી દિલ્હી જતી વંદે ભારત (22415) એક્સપ્રેસ ટ્રેનમાં મુસાફરી કરી રહ્યો હતો. જ્યારે તેને ટ્રેનની કેટરિંગ સર્વિસે ભોજન પીરસ્યું ત્યારે તેને શાકભાજીમાં જંતુ જોવા મળ્યો. તેણે અન્ય મુસાફરોને પણ શાકમાં જંતુ ફરતું બતાવ્યું. જેના કારણે મુસાફરોએ ભારે હોબાળો મચાવ્યો હતો. ટીટીઈ અને ટ્રેન સ્ટાફે તેને સમજાવવાનો પ્રયાસ કર્યો, પરંતુ તે માન્યા નહીં. તેણે IRCTCને આ બાબતે ફરિયાદ નોંધાવી હતી. વિકાસે જણાવ્યું કે આ ઘટના ફતેહપુર પાસે બની હતી. ટ્રેનમાં કેટરિંગ સેવા દિલ્હીના આરકે એસોસિએટ્સ દ્વારા આપવામાં આવે છે, તેથી તેણે કંપની વિરુદ્ધ ફરિયાદ નોંધાવી છે. તે જ સમયે, IRCTCએ ફરિયાદને ગંભીરતાથી લીધી અને કેટરિંગ સર્વિસની સાઇડ જાણ્યા પછી તેમણે કહ્યું કે દંડ લાદવામાં આવશે. અગાઉ પણ ખોરાકમાં મળી આવ્યા છે જંતુ
તમને જણાવી દઈએ કે આ પહેલા સપ્ટેમ્બર મહિનામાં પણ વંદે ભારત ટ્રેનના નાસ્તામાં એક જંતુ મળી આવ્યો હતો. પેસેન્જરે નાસ્તામાં ઓમેલેટ માગી હતી અને જ્યારે તે ઓમલેટ ખાવા લાગ્યો ત્યારે તેણે તેમાં એક વંદો જોયો. આગ્રા હઝરત નિઝામુદ્દીન વંદે ભારત ટ્રેન, શિરડીથી મુંબઈ વંદે ભારત ટ્રેન અને તિરુનેલવેલી અને ચેન્નઈ વચ્ચે ચાલતી વંદે ભારત ટ્રેનમાં પણ જંતુઓ અને કોકરોચ જોવા મળ્યા છે. તમામ કેસોમાં ભારતીય રેલવે કેટરિંગ ટુરિઝમ (IRCTC)એ કેટરિંગ સર્વિસ પર દંડ લાદ્યો છે.
IRCTCએ વંદે ભારતને દંડ ફટકાર્યો:ભોજનમાંથી ફરી જંતુ મળી આવ્યું; પેસેન્જરે ફરિયાદ દાખલ કરી; અગાઉ સપ્ટેમ્બર મહિનામાં પણ કોકરોચ મળી આવ્યો હતો
