કોમેન્ટેટરે બુમરાહને વાંદરો કહ્યો, પછી માફી માગી:ઇંગ્લેન્ડની ઈશાએ તેને મોસ્ટ વેલ્યૂએબલ પ્રાઈમેટ કહ્યો, બીજા દિવસે કહ્યું – ઈરાદો ખોટો ન હતો

ઇંગ્લેન્ડની ભૂતપૂર્વ ક્રિકેટર અને ફોક્સ સ્પોર્ટ્સ કોમેન્ટેટર ઈશા ગુહાએ જસપ્રીત બુમરાહની વંશીય ટિપ્પણી બદલ માફી માગી છે. ઈશાએ બોર્ડર-ગાવસ્કર ટ્રોફીની ગાબા ટેસ્ટના બીજા દિવસે રવિવાર, 15 ડિસેમ્બરના રોજ કોમેન્ટ્રી દરમિયાન બુમરાહ માટે પ્રાઈમેટ શબ્દનો ઉપયોગ કર્યો હતો. પ્રાઈમેટનો અર્થ વાંદરો પણ થાય છે. આ પછી મામલો વધુ જોર પકડવા લાગ્યો અને ઈશાએ બુમરાહની માફી માગી. ઈશા ગુહા અત્યારે શ્રેષ્ઠ મહિલા કોમેન્ટેટર છે. તે વિશ્વભરની લીગ, સિરીઝ અને ICC ટુર્નામેન્ટમાં કોમેન્ટ્રી કરતી જોવા મળે છે. જો મારા શબ્દોથી તમને દુઃખ થયું હોય તો મને માફ કરશો- ઈશા
ઈશાએ બીજા દિવસે ગાબા ખાતે બુમરાહની પ્રશંસા કરી અને તેને ‘મોસ્ટ વેલ્યૂએબલ પ્રાઈમેટ’ કહ્યો. આ પછી ત્રીજા દિવસની રમત શરૂ થતાં જ ઈશાએ માફી માગી લીધી હતી. તેણે કહ્યું, ‘રવિવારે કોમેન્ટ્રી દરમિયાન મેં એક શબ્દનો ઉપયોગ કર્યો જેના ઘણા અર્થ છે. સૌ પ્રથમ હું માફી માગુ છું. જો મેં કંઈક ખોટું કહ્યું હોય અથવા કોઈને દુઃખ પહોંચાડ્યું હોય, તો મને માફ કરશો.’ તેણે આગળ કહ્યું, ‘હું દરેકનું સન્માન કરું છું, જો તમે કોમેન્ટ્રીની સંપૂર્ણ ટ્રાન્સક્રિપ્ટ સાંભળશો, તો તમે જોશો કે હું ભારતના મહાન ખેલાડીઓની પ્રશંસા કરી રહી હતી. હું સમાનતામાં માનું છું. હું માત્ર બુમરાહની સફળતા અને સિદ્ધિઓ વિશે વાત કરી રહી હતી. મેં કદાચ તેના માટે ખોટો શબ્દ વાપર્યો છે, જેના માટે હું માફી માગુ છું.’ ઈશાએ 16 વર્ષની ઉંમરે આંતરરાષ્ટ્રીય ક્રિકેટમાં પ્રવેશ કર્યો હતો
ઈશા ગુહા ઇંગ્લેન્ડની ભૂતપૂર્વ ફાસ્ટ બોલર છે. તેણે 16 વર્ષની ઉંમરે આંતરરાષ્ટ્રીય ક્રિકેટમાં પ્રવેશ કર્યો હતો. ઈશાએ ઇંગ્લેન્ડ માટે 8 ટેસ્ટમાં 29 વિકેટ લીધી હતી. આ સાથે જ તેણે 83 વન-ડેમાં 101 વિકેટ ઝડપી હતી. ઈશાએ T20માં 18 વિકેટ લીધી છે. બીજી મેચમાં સિરાજ અને હેડ વચ્ચે દલીલ થઈ હતી
આ મેચ પહેલા, બીજી મેચની ઓસ્ટ્રેલિયાની પ્રથમ ઇનિંગ દરમિયાન ભારતીય ઝડપી બોલર મોહમ્મદ સિરાજ અને ઓસ્ટ્રેલિયાના બેટર ટ્રેવિસ હેડ વચ્ચે બોલાચાલી થઈ હતી. સિરાજની ઓવરમાં હેડે સિક્સર ફટકારી, પછીના જ બોલ પર સિરાજે તેને બોલ્ડ કર્યો. આ પછી હેડે કંઈક કહ્યું જે પછી સિરાજે પણ થોડા શબ્દો કહ્યા અને તેને સેન્ડઑફ આપ્યો (બહાર જવાનો સંકેત). પછી હેડે જતી વખતે સિરાજને કંઈક કહ્યું. ઓવર પછી સિરાજને ઓસ્ટ્રેલિયન પ્રેક્ષકોના હૂટિંગનો પણ સામનો કરવો પડ્યો હતો. ICCએ બંને ખેલાડીઓને 1-1 ડીમેરિટ પોઈન્ટ આપ્યા હતા. તે જ સમયે, સિરાજ પર મેચ ફીના 20% દંડ પણ ફટકાર્યો હતો. મંકીગેટની ઘટના 2008ની સિરીઝ દરમિયાન બની હતી
2007-08માં ભારતીય ટીમના ઓસ્ટ્રેલિયા પ્રવાસ દરમિયાન હરભજન સિંહ અને એન્ડ્ર્યુ સાયમન્ડ્સ વચ્ચે બોલાચાલી થઈ હતી. આ મેચ સિડની ક્રિકેટ ગ્રાઉન્ડ (SCG) ખાતે રમાઈ રહી હતી. સાયમન્ડ્સનો આરોપ છે કે ભજ્જીએ તેને મંકી કહ્યો હતો. આ ઘટનાને ‘મંકીગેટ’ કહેવામાં આવે છે. સાયમન્ડ્સ સિડની ટેસ્ટમાં બેટિંગ કરી રહ્યો હતો. હરભજન સિંહ સાથે તેની બોલાચાલી થઈ હતી. આ દરમિયાન બંને વચ્ચે ઉગ્ર ચર્ચા થઈ હતી. સાયમન્ડ્સે બાદમાં આરોપ લગાવ્યો હતો કે ભજ્જીએ તેને મંકી કહ્યો હતો. ICCના નિયમો અનુસાર આ વંશીય ટિપ્પણી હતી. પછી આખી સિરીઝ જોખમમાં હતી. મેચ રેફરીની સામે સુનાવણી થઈ. હરભજનને ક્લીનચીટ મળી છે. આ હોવા છતાં, આ મુદ્દો હજુ પણ પ્રસંગોપાત ઉઠાવવામાં આવે છે.