શ્રીલંકાના રાષ્ટ્રપતિ અનુરા કુમાર દિસાનાયકે સોમવારે દિલ્હીમાં હૈદરાબાદ હાઉસ ખાતે વડાપ્રધાન નરેન્દ્ર મોદીને મળ્યા હતા. રાષ્ટ્રપતિ દ્રૌપદી મુર્મુ અને વડાપ્રધાન નરેન્દ્ર મોદીએ રાષ્ટ્રપતિ ભવન ખાતે દિસાનાયકેનું સ્વાગત કર્યું હતું. આ દરમિયાન જોઈન્ટ ડિફેન્સ ફોર્સે શ્રીલંકાના રાષ્ટ્રપતિને ગાર્ડ ઓફ ઓનર આપ્યું હતું. દિસાનાયકે સાથેના સંયુક્ત નિવેદનમાં પીએમ મોદીએ કહ્યું કે હું શ્રીલંકાના રાષ્ટ્રપતિનું ભારતમાં હાર્દિક સ્વાગત કરું છું. મને ખુશી છે કે રાષ્ટ્રપતિ બન્યા બાદ તેમણે તેમની પ્રથમ વિદેશ યાત્રા માટે ભારતની પસંદગી કરી છે. આ મુલાકાત બંને દેશોના સંબંધોમાં નવી ઉર્જાને સર્જન કરી રહી છે. અમે અમારી ભાગીદારી માટે ભવિષ્યવાદી વિઝન અપનાવ્યું છે. પીએમએ કહ્યું- અમે અમારી આર્થિક ભાગીદારીમાં ઈન્વેસ્ટમેન્ટથી ગ્રોથ અને કનેક્ટિવિટી પર ભાર મૂક્યો છે અને નક્કી કર્યું છે કે ડિજિટલ, ભૌતિક અને ઊર્જા કનેક્ટિવિટી અમારી ભાગીદારીના મહત્ત્વના સ્તંભ હશે. બંને દેશો વચ્ચે વીજળી ગ્રીડ કનેક્ટિવિટી અને મલ્ટિ-પ્રોડક્ટ પેટ્રોલ પાઈપલાઈન સ્થાપિત કરવા પર ધ્યાન કેન્દ્રિત કરવામાં આવશે. બંને દેશો વચ્ચે સોલાર પાવર પ્રોજેક્ટ પર પણ ભાર મૂકવામાં આવશે. રાષ્ટ્રપતિ બન્યા બાદ દિસાનાયકેની આ પ્રથમ ભારત મુલાકાત છે. તેઓ 15 ડિસેમ્બરથી 17 ડિસેમ્બર સુધી ભારતની રાજકીય યાત્રા પર છે. આ પહેલા રાષ્ટ્રપતિ દિસાનાયકે સોમવારે રાજઘાટ પર મહાત્મા ગાંધીને શ્રદ્ધાંજલિ આપી હતી. તેમની સાથે કેન્દ્રીય માહિતી અને પ્રસારણ રાજ્ય મંત્રી એલ. મુરુગન પણ હાજર રહ્યા હતા. વિદેશ મંત્રાલયના પ્રવક્તા રણધીર જયસ્વાલે પોસ્ટમાં કહ્યું- શ્રીલંકાના રાષ્ટ્રપતિ અનુરા કુમાર દિસાનાયકે આજે સવારે રાજઘાટ પર મહાત્મા ગાંધીને શ્રદ્ધાંજલિ આપી. બાપુના સત્ય અને અહિંસાના શાશ્વત મૂલ્યો સમગ્ર વિશ્વમાં માનવતાને પ્રેરણા આપતા રહે છે. નાણામંત્રી અને વિદેશ મંત્રીને પણ મળ્યા આ પહેલા રવિવારે શ્રીલંકાના રાષ્ટ્રપતિએ નાણા મંત્રી નિર્મલા સીતારમણ સાથે મુલાકાત કરી હતી. આ દરમિયાન બંને દેશો વચ્ચે આર્થિક સહયોગને મજબૂત કરવા પર ચર્ચા થઈ હતી. દિસાનાયકેએ જણાવ્યું હતું કે તેઓએ ભારત-શ્રીલંકા આર્થિક સહયોગને મજબૂત કરવા, રોકાણની તકો વિસ્તારવા અને પ્રાદેશિક સુરક્ષાને વધારવા અંગે ચર્ચા કરી હતી. દિસાનાયકે X પોસ્ટમાં કહ્યું- મારી ભારતની સત્તાવાર મુલાકાત દરમિયાન મને નાણામંત્રી નિર્મલા સીતારમણ, વિદેશ મંત્રી એસ જયશંકર અને રાષ્ટ્રીય સુરક્ષા સલાહકાર અજીત ડોભાલ સાથે વાત કરવાની તક મળી. અમારી વાતચીત ભારત-શ્રીલંકા આર્થિક સહયોગને મજબૂત કરવા, રોકાણની તકો વધારવા, પ્રાદેશિક સુરક્ષા વધારવા, પર્યટન અને એનર્જી જેવા મુદ્દાઓ પર કેન્દ્રિત હતી. પીએમ મોદી સાથેની વાતચીતથી દિલ્હી-કોલંબો સહયોગ વધશે
રવિવારે, શ્રીલંકાના રાષ્ટ્રપતિ સાથેની મુલાકાત દરમિયાન, વિદેશ મંત્રી જયશંકરે ભારતની નેબર ફર્સ્ટ પોલિસી અને સાગર આઉટલુકમાં શ્રીલંકાનું મહત્વ સમજાવ્યું. જયશંકરે કહ્યું કે વડાપ્રધાન મોદી સાથેની વાતચીતથી નવી દિલ્હી અને કોલંબો વચ્ચે સહયોગ વધશે.
શ્રીલંકાના રાષ્ટ્રપતિએ PM મોદી સાથે મુલાકાત કરી:ગાર્ડ ઓફ ઓનર આપી સ્વાગત કરાયું, રાષ્ટ્રપતિ બન્યા બાદ દિસાનાયકે ભારતની પ્રથમ મુલાકાતે
