બ્રિટનમાં પ્રથમ શરિયા અદાલતની સ્થાપના 1982માં થઈ હતી, જેની સંખ્યા હવે વધીને 85 થઈ ગઈ છે. તેમનો ધાર્મિક પ્રભાવ ખૂબ જ મજબૂત છે. આ અદાલતોની વધતી સંખ્યાને કારણે એવો દાવો કરવામાં આવી રહ્યો છે કે, બ્રિટન શરિયા કાયદાની પશ્ચિમી રાજધાની બની રહ્યું છે. ધ ટાઈમ્સ અનુસાર, નેશનલ સેક્યુલર સોસાયટીએ આ સમાંતર કાયદાકીય વ્યવસ્થા પર ચિંતા વ્યક્ત કરી છે. આ અદાલતો લગ્નથી માંડીને પારિવારિક બાબતો પર નિર્ણયો આપે છે. મીડિયા અહેવાલો અનુસાર આ અદાલતો મુતાહ એટલે કે પ્લેજર મેરેજ અથવા આનંદ લગ્ન જેવા મહિલા વિરોધી વિચારોને પણ પ્રોત્સાહન આપે છે. શરિયા કાયદાને લઈને એક મોબાઈલ એપ પણ છે, જેના દ્વારા ઈંગ્લેન્ડ અને વેલ્સમાં રહેતા મુસ્લિમો તેમના વિસ્તાર માટે ઈસ્લામિક કાયદા બનાવી શકે છે. આના દ્વારા પુરુષો એ પણ પસંદ કરી શકે છે કે તેમની પાસે કેટલી પત્નીઓ હશે, જે 1 થી 4 સુધીની હોઈ શકે છે. આ મોબાઈલ એપને શરિયા કોર્ટની પણ મંજૂરી છે. બ્રિટન અને ઉત્તરી આયર્લેન્ડની ઇસ્લામિક શરિયા કાઉન્સિલ પૂર્વ લંડનના લેટનમાં સ્થિત છે. તે રજિસ્ટર્ડ ચેરિટી છે જે નિકાહ, તલાક અને ખુલા જેવી બાબતો પર સેવાઓ પૂરી પાડે છે. શરિયા કાયદો શું છે?
શરિયાને ઇસ્લામિક કાયદો પણ કહેવામાં આવે છે. કુરાન, હદીસ અને પયગંબર મોહમ્મદની સુન્નાહ પર આધારિત નૈતિક અને કાનૂની માળખાને શરિયા કહેવામાં આવે છે. જો સરળ ભાષામાં સમજીએ તો, શરિયાને ઇસ્લામિક કાયદાઓ અને રિવાજો અનુસાર જીવન જીવવાની રીત કહી શકાય. આ અદાલતોથી મહિલાઓ અને બાળકોના અધિકારો નબળા પડે છે
મીડિયા રિપોર્ટ્સ અનુસાર, બ્રિટનમાં લગભગ 1 લાખ ઇસ્લામિક લગ્નો થયા છે, જેની સિવિલ ઓથોરિટી દ્વારા નોંધણી કરવામાં આવી નથી. નેશનલ સેક્યુલર સોસાયટીના ચીફ એક્ઝિક્યુટિવ સ્ટીફન ઇવાન્સે આવી અદાલતો સામે ચેતવણી જારી કરી છે. ઇવાન્સે કહ્યું- આ અદાલતો બધા માટે એક કાયદાના સિદ્ધાંતને નબળી પાડે છે. તેનાથી મહિલાઓ અને બાળકોના અધિકારો નબળા પડે છે. ઇવાન્સે વધુમાં કહ્યું કે, આપણે યાદ રાખવું જોઈએ કે શરિયા અદાલતો માત્ર એટલા માટે અસ્તિત્વ ધરાવે છે કારણ કે મુસ્લિમ મહિલાઓને ઈસ્લામિક તલાક મેળવવા માટે તેમની જરૂર છે. બીજી તરફ, મુસ્લિમ પુરુષો આ અદાલતો વિના પણ એકતરફી તલાક લઈ શકે છે.
બ્રિટનમાં ચાલી રહી છે 85 શરિયા અદાલતો:લગ્નથી લઈને તલાક સુધીના આપે છે તમામ નિર્ણયો; મહિલા વિરોધી વિચારોને પ્રોત્સાહન આપવાનો પણ આરોપ
