સુરતમાં BRTS સેવામાં ફરી એકવાર હિંસક ઘટના સામે આવી છે. કડોદરાથી સ્ટેશન તરફ જતી BRTS બસમાં સ્મીમેર હોસ્પિટલ નજીક અજાણ્યા વાહનચાલકે પથ્થર મારી તોડફોડ કરી હતી. માત્ર હોર્ન મારવા બાબતે યુવક ઉશ્કેરાઈ ગયો હતો અને ડ્રાઇવરને માર મારી દાદાગીરી પણ કરી હતી. આ ઘટના બસના સીસીટીવીમાં કેદ થઈ છે. વાહનચાલકો BRTS રૂટમાં ઘૂસી ગયા હતા
આજરોજ કડોદરાથી સ્ટેશન તરફ જઈ રહેલી BRTS બસ પર સ્મીમેર હોસ્પિટલ નજીક પહોંચી હતી. જ્યાં વાહનચાલકો BRTS રૂટમાં ઘૂસી ગયા હતા અને થોડો ટ્રાફિક થઈ ગયો હતો. જેના પગલે BRTS બસના ચાલકે આગળ રહેલા વાહનચાલકને હોર્ન માર્યું હતું. ત્યારબાદ વાહનચાલક ઉશ્કેરાઈ ગયો હતો અને ડ્રાઇવર સાથે અપશબ્દો સાથે દાદાગીરી કરવા લાગ્યો હતો. સુરતમાં વારંવાર બનતી ઘટનાથી લોકોમાં રોષ
બસ ડ્રાઇવરના જણાવ્યા મુજબ, તેણે બસ ડ્રાઇવરને નીચે ઉતારી માર માર્યો હતો. ત્યારબાદ મુસાફરો ભરેલી BRTS બસના આગળના કાચમાં પથ્થર મારી તોડફોડ કરી હતી. આ ઘટનામાં બસની કાચ પણ તૂટી ગઈ હતી. આ ઘટના બનતા બસમાં સવાર મુસાફરોમાં ભાગદોડ મચી ગઈ હતી. આવી ઘટનાઓ સુરતમાં વારંવાર બનતી હોવાથી લોકોમાં રોષ જોવા મળી રહ્યો છે.
એક તો ભૂલ ને ઉપરથી દાદાગીરી, CCTV:સુરતમાં ફરીવાર BRTS બસના ડ્રાઇવર સાથે મારામારી, વાહનચાલકને હોર્ન મારતા બસમાં પથ્થર મારી તોડફોડ, મુસાફરોમાં ભાગદોડ
