યૂટ્યૂબર જ ‘ડિજિટલ અરેસ્ટ’ના સંકજામાં ફસાવ્યો!:સ્કેમર્સે 40 કલાક સુધી હોટલમાં બંધ રાખ્યો, અંકુશ બહુગુણા કહ્યું- રડતાં-રડતાં હું મદદની ભીખ માગતો રહ્યો

યૂટ્યૂબર અંકુશ બહુગુણાએ સોશિયલ મીડિયા પર વીડિયો પોસ્ટ કરીને જાણકારી આપી કે તેને સ્કેમર્સે 40 કલાક સુધી ડિજિટલ અરેસ્ટ રાખ્યો હતો. અંકુશે આ વીડિયોમાં કહ્યું- હું હજી પણ સદમામાં છું. મેં પૈસાની સાથે-સાથે મારી માનસિક શાંતિ પણ ગુમાવી. હું માની નથી શકતો કે મારી સાથે આવું બન્યું છે. અન્ય લોકો સાથે આવું ન થાય તે માટે હું આ વીડિયો પોસ્ટ કરી રહ્યો છું. અંકુશે કહ્યું- તમારામાંથી ઘણા લોકો તેના વિશે જાણે છે પરંતુ ઘણાને ખબર નથી કે સ્કેમર્સ તમને કંટ્રોલ કરવા માટે કઈ હદ સુધી જઈ શકે છે. ઘણી વખત તમે થોડી સેકંડમાં કૌભાંડ શોધી કાઢો છો પરંતુ જો તમે મારા જેવા છો તો જાળમાં ફસાઈ શકો છો. અંકુશ બહુગુણાના YouTube પર 745K એટલે કે 7.45 લાખ સબસ્ક્રાઈબર્સ છે. તેઓ કોમેડી અને મેકઅપ ટિપ્સના વીડિયો બનાવે છે. આખો મામલો વિગતવાર સમજો… સ્કેમર્સ પોલીસ યુનિફોર્મમાં હતા, ગુનેગારોના નામ લઈને પૂછપરછ કરવામાં આવી રહી હતી
અંકુશે કહ્યું- જ્યારે હું જીમમાંથી પાછો આવ્યો ત્યારે મને એક ખૂબ જ વિચિત્ર નંબર પરથી ફોન આવ્યો. તે આંતરરાષ્ટ્રીય નંબર જેવો દેખાતો હતો. મેં વધારે વિચાર્યા વગર ફોન ઉપાડ્યો. તે એક ઓટોમેટેડ કોલ હતો, એક ઓટોમેટેડ કોલ જે કહેતો હતો કે મારા કુરિયરની ડિલિવરી રદ કરવામાં આવી છે. મદદ માટે શૂન્ય દબાવો. મેં કોઈને કંઈ પણ કુરિયન કર્યું નથી છતાં મેં શૂન્ય દબાવ્યું. ત્યાંથી કસ્ટમર કેરે જવાબ આપ્યો કે તમારા પેકેજમાં ગેરકાયદેસર વસ્તુઓ મળી આવી છે. તમે જે પેકેટ ચીન મોકલતા હતા તે કસ્ટમ દ્વારા જપ્ત કરવામાં આવ્યું છે. હું ડરી ગયો હતો, મેં કહ્યું કે મેં કશું મોકલ્યું નથી. તેણે કહ્યું કે મારું નામ, મારો આધાર નંબર, બધું પેકેટ પર લખેલું છે. આ એક ગંભીર કેસ છે. તમારા નામ પર પહેલેથી જ વોરંટ છે, તમને ‘ડિજિટલ અરેસ્ટ’ કરવામાં આવે છે. આ પછી, મને ખબર નથી કે વોઈસ કોલ વોટ્સએપ વીડિયો કોલમાં કેવી રીતે બદલાઈ ગયો. વીડિયો કોલમાં સ્કેમર્સ પોલીસની વર્દીમાં જોવા મળ્યા હતા. તેઓએ કહ્યું કે તમારા નામ પર મની લોન્ડરિંગ, ડ્રગ્સની હેરાફેરી જેવા સીરિયલ કેસ છે. કેટલાક ગુનેગારોના નામ લઈને મારી પૂછપરછ શરૂ કરી. સતત 40 કલાક સુધી કોલ ચાલુ રહ્યો, કોઈનો સંપર્ક થઈ શકતો નહતો
અંકુશે કહ્યું- હું આ બધાથી ખૂબ ડરી ગયો હતો. હું જાણતો હતો કે મેં કંઈ ખોટું કર્યું નથી પરંતુ સ્કેમર્સ એવી સ્થિતિ સર્જે છે કે તમે કંઈપણ વિચારી શકતા નથી. આ પછી, હું આગામી 40 કલાક સુધી ડિજિટલ અરેસ્ટમાં રહ્યો. હું કૉલ ડિસ્કનેક્ટ કરી શકતો નહોતો કે કોઈનો સંપર્ક કરી શકતો નહતો. લાંબા સમય પછી તેઓએ મને બેંકમાં જઈને કેટલાક ખાતામાં પૈસા ટ્રાન્સફર કરવાનું કહ્યું પરંતુ હું પહોંચ્યો ત્યાં સુધીમાં બેંક બંધ થઈ ગઈ હતી. આ પછી તેઓએ મને ઘરે જવાને બદલે હોટલમાં રહેવા કહ્યું. આ સમય દરમિયાન મારા મિત્રો મને ફોન અને મેસેજ કરી રહ્યા હતા, પરંતુ હું બધાને કહી રહ્યો હતો કે હું ઠીક છું. કોલ ડિસકનેક્ટ થયા પછી પણ લાગે છે કે કોઈ ફોલો તો નથી કરી રહ્યું
અંકુશે જણાવ્યું કે હોટલ પહોંચ્યા પછી તે સૂઈ ગયો. થોડા સમય પછી હું અચાનક જાગી ગયો અને મારા ફોન પર એક મિત્રનો મેસેજ જોયો કે એવું લાગે છે કે તમે નજરકેદ છો, જો એવું કંઈક છે તો તે છેતરપિંડી છે. જ્યારે કૌભાંડીઓને આ વિશે ખબર પડી, ત્યારે તેઓએ મારી પૂછપરછ શરૂ કરી, પરંતુ હું પહેલેથી જ શંકાસ્પદ હતો. મેં તેમને કહ્યું કે હું અહીં સુરક્ષિત નથી અનુભવતો, હું પોલીસ સ્ટેશન આવવા માંગુ છું. તેના પર તેઓએ કહ્યું કે તમારી સુરક્ષા માટે અમારી પાસે હોટલની નીચે લોકો છે. આ સાંભળીને હું વધુ ગભરાઈ ગયો. પછી મેં હિંમત ભેગી કરી અને કોલ ડિસ્કનેક્ટ કર્યો અને હોટેલની બહાર આવ્યો. મારા મિત્રને ફોન કરીને બધી વાત કહી. ઓટોમાં બેઠા પછી પણ મને ડર હતો કે કોઈ મારી પાછળ આવી રહ્યું છે. આ પછી મેં પોલીસમાં ફરિયાદ કરી છે. 10 વર્ષમાં ડિજિટલ ફ્રોડને કારણે ₹4.69 લાખ કરોડનું નુકસાન
રિઝર્વ બેંકના રિપોર્ટમાં ખુલાસો થયો છે કે 2023 દરમિયાન દેશમાં 30 હજાર કરોડ રૂપિયાથી વધુની છેતરપિંડી થઈ હતી. નજરકેદ દરમિયાન નકલી પોલીસ સ્ટેશનો, સરકારી કચેરીઓ બનાવવા અને પોલીસનો યુનિફોર્મ પહેરવા જેવી યુક્તિઓ પણ અપનાવવામાં આવે છે. છેલ્લા એક દાયકામાં ભારતીય બેંકોએ છેતરપિંડીના 65,017 કેસ નોંધ્યા છે. જેના કારણે કુલ 4.69 લાખ કરોડ રૂપિયાનું નુકસાન થયું છે. સાયબર ગુનેગારો UPI, ક્રેડિટ કાર્ડ, OTP, જોબ અને ડિલિવરી સ્કેમ સહિત શંકાસ્પદ લોકોને છેતરવા માટે વિવિધ પદ્ધતિઓનો ઉપયોગ કરે છે.