સર્બિયાના સ્ટાર ટેનિસ ખેલાડી નોવાક યોકોવિચે દાવો કર્યો છે કે જાન્યુઆરી 2022માં ઓસ્ટ્રેલિયામાં તેને ઝેર આપ્યું હતું. તેણે આ દાવો વર્ષની પ્રથમ ગ્રાન્ડ સ્લેમ ઓસ્ટ્રેલિયન ઓપનની શરૂઆત પહેલા કર્યો છે. ઓસ્ટ્રેલિયન ઓપન 2025 12 જાન્યુઆરીથી શરૂ થશે. કોવિડ-19ની રસી ન લીધી કારણે યોકોવિચને 2022માં ઓસ્ટ્રેલિયન ઓપનમાં ભાગ લેવાથી પ્રતિબંધિત કર્યો હતો. તેણે ઓસ્ટ્રેલિયન ઓપન 2022 પહેલા ટ્રાવેલ ડોક્યુમેન્ટ્સમાં ખોટી માહિતી આપી હતી. આ માટે તેની મેલબોર્નમાં અટકાયત કરવામાં આવી હતી. આ પછી તેના વિઝા કેન્સલ કરીને ઓસ્ટ્રેલિયાથી પરત મોકલી દેવામાં આવ્યો હતો. કાયદાકીય કાર્યવાહી દરમિયાન તેને મેલબોર્નની એક હોટલમાં રાખ્યો હતો. તે કહે છે કે અહીં જ તેને ઝેર આપવામાં આવ્યું હતું. 24 વખતના ગ્રાન્ડ સ્લેમ ચેમ્પિયન યોકોવિચે GQ સાથે વાત કરતા કહ્યું મને કેટલીક સ્વાસ્થ્ય સમસ્યાઓ હતી અને મને સમજાયું કે મેલબોર્નની તે હોટલમાં મને જે ખોરાક આપવામાં આવ્યો હતો તે ઝેરથી ભરેલું હતું. જ્યારે હું સર્બિયા પાછો આવ્યો ત્યારે મને કેટલીક બાબતોનો અહેસાસ થયો. મેં આ વાત ક્યારેય કોઈને જાહેરમાં કહી નથી, પરંતુ તે બહાર આવ્યું છે કે મારા શરીરમાં હેવી મેટલનું સ્તર ખૂબ જ ઊંચું હતું. મારા શરીરમાં સીસું હતું, સીસા અને પારાના ખૂબ ઊંચા સ્તરો.
યોકોવિચ પાસે 24 ગ્રાન્ડ સ્લેમ છે
યોકોવિચ 24 ગ્રાન્ડ સ્લેમ જીતનાર પ્રથમ ખેલાડી છે. યોકોવિચે 2008માં ઓસ્ટ્રેલિયન ઓપનના રૂપમાં તેનું પ્રથમ ગ્રાન્ડ સ્લેમ જીત્યું હતું. તેણે 2023 સુધી 10 વખત જીત મેળવી હતી. યોકોવિચ 3 વખત ફ્રેન્ચ ઓપન અને 4 વખત યુએસ ઓપન જીતી ચૂક્યો છે. તે 7 વખતનો વિમ્બલ્ડન ચેમ્પિયન પણ છે. કારકિર્દી ગોલ્ડન સ્લેમ જીતનાર પાંચમો ખેલાડી
યોકોવિચે ગોલ્ડન સ્લેમ પણ જીત્યો છે. આવું કરનાર તે પાંચમો ખેલાડી છે. તેના પહેલા માત્ર સ્પેનના રાફેલ નડાલ, અમેરિકાના સેરેના વિલિયમ્સ, અમેરિકાના આન્દ્રે અગાસી અને જર્મનીના સ્ટેફી ગ્રાફ જ કરિયર ગોલ્ડન સ્લેમ જીતી શક્યા છે. ટેનિસમાં, જે વ્યક્તિ ચારેય ગ્રાન્ડ સ્લેમ અને ઓલિમ્પિક ગોલ્ડ જીતે છે તેને ગોલ્ડન સ્લેમ વિજેતા કહેવામાં આવે છે.
યોકોવિચનો દાવો- તેને ઓસ્ટ્રેલિયામાં ઝેર આપ્યું હતું:2022 ઓસ્ટ્રેલિયન ઓપન રમવાની મંજૂરી નહોતી, હોટલમાં રાખ્યો, ત્યાં જ ભોજનમાં ઝેર દીધું
