ટ્રમ્પના શપથ ગ્રહણમાં મોદી હાજરી નહીં આપે:ભારત તરફથી વિદેશ મંત્રી જયશંકર ભાગ લેશે, ચીનના રાષ્ટ્રપતિ જિનપિંગ સહિત વૈશ્વિક નેતાઓને આમંત્રણ

વિદેશ મંત્રી જયશંકર 20 જાન્યુઆરીએ અમેરિકાના પ્રવાસે છે. તેઓ અહીં અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પના શપથ ગ્રહણમાં હાજરી આપશે. શપથગ્રહણ આયોજક સમિતિએ આ માટે ભારતને આમંત્રણ મોકલ્યું છે. વિદેશ મંત્રાલયે X પર આ માહિતી પોસ્ટ કરી. ટ્રમ્પે ચીનના રાષ્ટ્રપતિ શી જિનપિંગ સહિત અનેક વૈશ્વિક નેતાઓને તેમના શપથ ગ્રહણ સમારોહમાં હાજરી આપવા આમંત્રણ આપ્યું છે. જોકે, આ ભારત તરફથી વડાપ્રધાન નરેન્દ્ર મોદીની જગ્યાએ વિદેશમંત્રીની હાજરી રાજકીય વર્તુળોમાં ચર્ચાનો વિષય બન્યો છે. જયશંકર ટ્રમ્પ વહીવટીતંત્રમાં સામેલ થનારા મંત્રીઓ અને અન્ય દેશોના નેતાઓને પણ મળશે. ડોનાલ્ડ ટ્રમ્પ અમેરિકાના 47માં રાષ્ટ્રપતિ તરીકે શપથ લેવાના છે. તેમણે કમલા હેરિસને હરાવીને રાષ્ટ્રપતિની ચૂંટણી જીતી છે. ડોનાલ્ડ ટ્રમ્પને ચૂંટણીમાં 312 ઈલેક્ટોરલ વોટ મળ્યા જ્યારે કમલા હેરિસને માત્ર 226 વોટ મળ્યા. ચૂંટણી જીતવા માટે ઉમેદવારને 270 ઈલેક્ટોરલ વોટની જરૂર હોય છે. શપથ ગ્રહણમાં મોદી કેમ નહીં જાય?
ગયા વર્ષે સપ્ટેમ્બરમાં, જ્યારે ડોનાલ્ડ ટ્રમ્પ અને કમલા હેરિસ યુએસ રાષ્ટ્રપતિ પદની રેસમાં સામસામે હતા, ત્યારે વડાપ્રધાન નરેન્દ્ર મોદી સંયુક્ત રાષ્ટ્ર મહાસભામાં હાજરી આપવા માટે ન્યૂયોર્ક ગયા હતા. તે સમયે ટ્રમ્પે એક પ્રેસ કોન્ફરન્સમાં વડાપ્રધાન મોદીને મળવાની ઇચ્છા વ્યક્ત કરી હતી. ટ્રમ્પનું માનવું હતું કે મોદી સાથેની હાઇ-પ્રોફાઇલ મુલાકાત તેમની ચૂંટણી છબીને મજબૂત બનાવશે. આર્જેન્ટિનાના રાષ્ટ્રપતિ જાવિયર મિલી, હંગેરીના વડાપ્રધાન વિક્ટર ઓર્બન અને ઇટાલીના વડાપ્રધાન જ્યોર્જિયા મેલોની જેવા વૈશ્વિક નેતાઓ કાં તો ટ્રમ્પને ટેકો આપી રહ્યા હતા અથવા તેમને મળી રહ્યા હતા. મોદી સાથેની મુલાકાત ટ્રમ્પ સમર્થકો અને સામાન્ય અમેરિકન જનતાને મોટો સંદેશ આપતી. ભારત-અમેરિકા સંબંધો માટે ભારતે રાજદ્વારી નિર્ણય લીધો
જ્યારે ટ્રમ્પે મોદીને મળવાની ઇચ્છા વ્યક્ત કરી, ત્યારે ભારતીય રાજદ્વારીઓ સમક્ષ એક મુશ્કેલ પ્રશ્ન ઉભો થયો. 2019માં ‘હાઉડી મોદી’ કાર્યક્રમ દરમિયાન ટ્રમ્પની પરોક્ષ ચૂંટણી લીડને રાજદ્વારી ભૂલ માનવામાં આવી હતી. ભારતીય વિદેશ મંત્રાલયે નિર્ણય લીધો કે અમેરિકન રાષ્ટ્રપતિ પદના ઉમેદવારોથી અંતર જાળવી રાખવું ભારતના લાંબા ગાળાના હિતમાં રહેશે. જો મોદી ટ્રમ્પને મળ્યા હોત અને કમલા હેરિસ ચૂંટણી જીતી ગયા હોત, તો ભારત-અમેરિકા સંબંધો પર તેની નકારાત્મક અસર પડી શકી હોત. આ જ કારણ હતું કે મોદી ટ્રમ્પને મળ્યા નહીં. ટ્રમ્પની નારાજગી અને શપથ ગ્રહણ સમારોહનું આમંત્રણ
ટ્રમ્પ એ વાતથી નાખુશ હતા કે મોદી સાથેની મુલાકાત તેમને ચૂંટણીમાં ફાયદો આપી શકી હોત, પરંતુ ભારતે તે ટાળ્યું. જોકે, ટ્રમ્પ ચૂંટણી જીતી ગયા અને હવે તેઓ ફરીથી રાષ્ટ્રપતિ તરીકે શપથ લેવા જઈ રહ્યા છે. ટ્રમ્પે શપથ ગ્રહણ સમારોહમાં મોટાભાગે એવા નેતાઓને આમંત્રણ આપ્યું છે જેઓ વૈચારિક રીતે તેમની નજીક છે અથવા જેમણે ખુલ્લેઆમ તેમનું સમર્થન કર્યું છે. ચીન સાથે બગડતા સંબંધોને ધ્યાનમાં રાખીને ટ્રમ્પે ખાસ કરીને રાષ્ટ્રપતિ શી જિનપિંગને આમંત્રણ આપ્યું હતું, જોકે જિનપિંગે તેમના એક વરિષ્ઠ પ્રતિનિધિને મોકલવાનો નિર્ણય લીધો છે. શપથ ગ્રહણ કેવી રીતે થશે?
ટ્રમ્પ અમેરિકાની રાજધાની વોશિંગ્ટન ડીસીમાં સોમવારે 20 જાન્યુઆરીએ બપોરે 12 વાગ્યે શપથ લેશે. આ દરમિયાન યુએસ સુપ્રીમ કોર્ટના ચીફ જસ્ટિસ જોન રોબર્ટ્સ તેમને પદના શપથ લેવડાવશે. 21મી સદીમાં આવું પહેલીવાર બનશે જ્યારે કોઈ અમેરિકન રાષ્ટ્રપતિ રજાના દિવસે પદના શપથ લેશે. ટ્રમ્પ ઉપરાંત જેડી વેન્સ ઉપરાષ્ટ્રપતિ તરીકે શપથ લેશે. સામાન્ય રીતે ઉપરાષ્ટ્રપતિ રાષ્ટ્રપતિ સમક્ષ શપથ લે છે. ટ્રમ્પની જીત પર મહોર લાગી
રાષ્ટ્રપતિની ચૂંટણીમાં ડોનાલ્ડ ટ્રમ્પની જીત પર મહોર લાગી ગઈ છે. 6 જાન્યુઆરીના રોજ યુએસ સંસદમાં રાષ્ટ્રપતિની ચૂંટણી માટે ઈલેક્ટોરલ કોલેજના મતોની ગણતરી કરવામાં આવી હતી. મતગણતરી બાદ ઉપરાષ્ટ્રપતિ કમલા હેરિસે સત્તાવાર રીતે ટ્રમ્પની જીતની જાહેરાત કરી હતી. અગાઉ, અમેરિકી રાષ્ટ્રપતિની ચૂંટણી માટે 5 નવેમ્બરે મતદાન થયું હતું. આગામી 24 કલાકમાં ચૂંટણીના પરિણામો સ્પષ્ટ થઈ ગયા. જોકે ચૂંટણીના 2 મહિના બાદ કમલા હેરિસે ટ્રમ્પની જીતની પુષ્ટિ કરી છે. કેપિટોલ હિલની આસપાસ ફેન્સિંગ લગાવવામાં આવી હતી અને યુએસ સંસદના સંયુક્ત સત્ર અને આ મહિનાના અંતમાં ટ્રમ્પના શપથ ગ્રહણ સમારોહ માટે ભારે સુરક્ષા વ્યવસ્થા કરવામાં આવી હતી. સજા પામનાર પહેલા અમેરિકન રાષ્ટ્રપતિ
ડોનાલ્ડ ટ્રમ્પ અમેરિકન ઈતિહાસમાં દોષિત ઠરનારા પ્રથમ રાષ્ટ્રપતિ બન્યા છે. 10 ડિસેમ્બરે, તેમને પોર્ન સ્ટારને ચૂપ કરવા માટે ચૂકવણી કરવાના કેસ સાથે સંબંધિત 34 આરોપોમાં સજા કરવામાં આવી હતી. હાલમાં ન્યૂયોર્કની મેનહટન કોર્ટે ટ્રમ્પને જેલમાં મોકલ્યા વિના બિનશરતી નિર્દોષ છોડી મૂક્યા છે. ટ્રમ્પ વીડિયો કોન્ફરન્સિંગ દ્વારા કોર્ટમાં હાજર થયા હતા. કોર્ટરૂમમાં ચાર મોટી સ્ક્રીન લગાવવામાં આવી હતી, સજા સંભળાવતા સમયે ટ્રમ્પ તેના પર જોવા મળ્યા હતા. ચુકાદો આપતા જસ્ટિસ જુઆન માર્ચેને કહ્યું, ‘હું તમને તમારા બીજા કાર્યકાળમાં સફળતાની કામના કરું છું.’