અમદાવાદમાં ગુજરાતી દિગંબર જૈન સમાજ મહાસંઘ ઉત્તર ગુજરાત ઝોન અંતર્ગત અમદાવાદ ડિવિઝન દ્વારા ગુણ ગૌરવ સમારંભ 2024નું આયોજન કરવામાં આવ્યું હતું. આ કાર્યક્રમમાં ઉત્તર ગુજરાત ઝોનના વિવિધ વિસ્તારોમાંથી શૈક્ષણિક વર્ષ 2023-24માં ધોરણ 8થી 12 અને ઉચ્ચ અભ્યાસમાં ઉત્તીર્ણ થયેલા 155 વિદ્યાર્થીઓને સન્માનિત કરવામાં આવ્યા હતા. સમારંભમાં પ્રત્યેક વિદ્યાર્થીને પ્રમાણપત્ર, શીલ્ડ અને ભેટ આપીને તેમની શૈક્ષણિક સિદ્ધિઓની કદર કરવામાં આવી. કાર્યક્રમના મુખ્ય વક્તા તરીકે જાણીતા સાહિત્યકાર અને કટાર લેખક ડૉ. શરદભાઈ ઠાકરે વિદ્યાર્થીઓને કરિયર વિકાસ અંગે મહત્વપૂર્ણ માર્ગદર્શન આપ્યું હતું. તેમણે વિદ્યાર્થીઓને ભવિષ્યમાં સફળતા મેળવવા માટેની મૂલ્યવાન સલાહ અને વ્યવહારિક ટિપ્સ આપી હતી. આ પ્રસંગે જૈન સમાજના મોટી સંખ્યામાં સભ્યો ઉપસ્થિત રહ્યા હતા, જેમણે વિદ્યાર્થીઓના ઉજ્જવળ ભવિષ્ય માટે શુભેચ્છાઓ પાઠવી હતી. આ કાર્યક્રમ દ્વારા શૈક્ષણિક ક્ષેત્રે ઉત્કૃષ્ટ પ્રદર્શન કરનારા વિદ્યાર્થીઓને પ્રોત્સાહન આપવામાં આવ્યું હતું.
