ખો-ખોમાં ભારતીય મહિલા ટીમ વર્લ્ડ ચેમ્પિયન:ફાઇનલમાં નેપાળને 78-40થી હરાવ્યું; ટૂર્નામેન્ટમાં ભારતીય ટીમ એક પણ મેચ નથી હારી

ભારતની મહિલા ટીમે ખો-ખોનો પ્રથમ વર્લ્ડ કપ જીત્યો છે. ટૂર્નામેન્ટની ફાઈનલ રવિવારે ઈન્દિરા ગાંધી ઈન્ડોર સ્ટેડિયમ, નવી દિલ્હી ખાતે રમાઈ હતી. ભારતે નેપાળને 78-40ના વિશાળ અંતરથી હરાવીને ટાઈટલ પર કબજો કર્યો હતો. ખો-ખો વર્લ્ડ કપ 13થી 19 જાન્યુઆરી દરમિયાન નવી દિલ્હીમાં રમાયો હતો. ભારતીય ટીમ ટુર્નામેન્ટમાં અજેય રહી હતી, જ્યારે નેપાળને ફાઇનલમાં જ પ્રથમ હારનો સામનો કરવો પડ્યો હતો. મેન્સ ટીમ ઈન્ડિયા પણ ફાઇનલમાં પહોંચી ગઈ છે, તેનો સામનો પણ નેપાળ સામે છે. ભારતે ચેઝ સાથે શરૂઆત કરી હતી
મહિલા ખો-ખો વર્લ્ડ કપની ફાઈનલ રવિવારે સાંજે 6 કલાકે શરૂ થઈ હતી. નેપાળે ટોસ જીતીને ડિફેન્સ કરવાનું પસંદ કર્યું હતું. ભારતે પ્રથમ દાવમાં એકતરફી વર્ચસ્વ દર્શાવ્યું અને 34 પોઈન્ટ મેળવ્યાં. બીજા દાવમાં નેપાળે ચેઝ કરીને 24 પોઈન્ટ મેળવ્યાં, આ ટર્નમાં ભારતને પણ એક પોઈન્ટ મળ્યો. હાફ ટાઈમ બાદ ભારતે 35-24ના માર્જિનથી લીડ જાળવી રાખી હતી. ચારેય ઇનિંગ્સમાં ભારતનો દબદબો
ત્રીજી ઈનિંગમાં ભારતે લીડમાં વધુ વધારો કર્યો હતો. આ ટર્નમાં ટીમે 38 પોઈન્ટ બનાવ્યા અને સ્કોર 73-24ને પોતાની તરફેણમાં બનાવ્યો. ચોથી અને છેલ્લી ઈનિંગમાં નેપાળ માત્ર 16 પોઈન્ટ જ મેળવી શક્યું, જ્યારે ભારતે 5 પોઈન્ટ મેળવ્યાં. ફાઈનલ 78-40ની સ્કોર લાઈન સાથે સમાપ્ત થઈ અને ભારત મહિલા ટીમ પ્રથમ વિશ્વ કપ ચેમ્પિયન બની. 19 ટીમો વચ્ચે અણનમ રહી
મહિલા ગ્રુપમાં 19 ટીમોએ ભાગ લીધો હતો. ભારતીય મહિલા ગ્રુપ Aમાં ઈરાન, મલેશિયા અને દક્ષિણ કોરિયા સાથે હતી. ટીમે દક્ષિણ કોરિયાને 176-18, ઈરાનને 100-16 અને મલેશિયાને 100-20થી હરાવ્યું હતું. ટીમે ગ્રુપ સ્ટેજમાં ટોપ પર રહીને ક્વાર્ટર ફાઇનલમાં જગ્યા બનાવી હતી. ક્વાર્ટર ફાઇનલમાં ભારતે બાંગ્લાદેશને 109-16ના માર્જિનથી હરાવ્યું હતું. સેમિફાઇનલમાં તેણે દક્ષિણ આફ્રિકા સામેની મેચ 66-16થી જીતી લીધી હતી. ફાઈનલમાં પણ ભારતીય મહિલાનો દબદબો જોવા મળ્યો હતો અને ટીમે 78-40ના માર્જીનથી મેચ જીતી લીધી હતી. સમગ્ર ટુર્નામેન્ટમાં નેપાળ એકમાત્ર એવી ટીમ હતી જેની ભારત સામે હારનું માર્જીન 50 પોઈન્ટથી ઓછું હતું. પુરુષોની ટીમ પણ ફાઇનલમાં નેપાળ સામે ટકરાશે
ખો-ખો વર્લ્ડ કપની પુરુષ અને મહિલા બંને ઈવેન્ટ્સમાં ભારતનો દબદબો હતો. પુરુષોની ટીમ પણ અપરાજિત રહી અને ફાઇનલમાં જગ્યા બનાવી, ટીમની ટાઈટલ મેચ નેપાળ સામે છે. ટૂર્નામેન્ટમાં નેપાળની એકમાત્ર હાર ગ્રુપ સ્ટેજમાં ભારત સામે થઈ હતી. ભારતના જૂથમાં પેરુ, બ્રાઝિલ, ભૂટાન અને નેપાળનો સમાવેશ થાય છે. ટીમે નેપાળને 42-37થી, બ્રાઝિલને 66-34થી, પેરુને 70-38થી અને ભૂટાનને 71-34થી હરાવ્યું હતું. ક્વાર્ટર ફાઇનલમાં ભારતે શ્રીલંકા સામે 100-40ના માર્જિનથી જીત મેળવી હતી. તે જ સમયે ટીમે સેમિફાઇનલમાં દક્ષિણ આફ્રિકાને 62-42થી હરાવ્યું હતું.