કુમકુમ મંદિરના સાધુ પ્રેમવત્સલદાસજીએ મનુષ્ય જીવનની અમૂલ્યતા વિશે મહત્વપૂર્ણ સંદેશ આપ્યો છે. તેમણે જણાવ્યું કે, ભગવાને આપણને મનુષ્ય જીવન એક વિશેષ કૃપા તરીકે આપ્યું છે, જેનો શ્રેષ્ઠ ઉપયોગ કરવો આપણી જવાબદારી છે. સાધુજીએ જીવનને ઘડિયાળ સાથે સરખાવ્યું, જેને માત્ર એક વાર ચાવી આપવામાં આવે છે. કોઈ નથી જાણતું કે આ જીવનરૂપી ઘડિયાળ ક્યારે અટકી જશે – મધરાતે, વહેલી સવારે કે બપોરે. તેથી વર્તમાન ક્ષણનો મહત્તમ ઉપયોગ કરવાનું મહત્વ સમજાવ્યું. શ્રી સ્વામિનારાયણ ભગવાનના વચનામૃતનો ઉલ્લેખ કરતા તેમણે કહ્યું કે, પાંચ દિવસનું આયુષ્ય બાકી હોય તો પણ મોક્ષ માટેનાં કાર્યો કરી લેવા જોઈએ. આ મનુષ્ય દેહ મળ્યો છે ત્યારે ભગવાનનું ભજન કરી, જીવનને સાર્થક બનાવી, ભગવદ્ ધામની પ્રાપ્તિ કરવા માટેના પ્રયત્નો કરવા જોઈએ. સાધુજીએ ભારપૂર્વક જણાવ્યું કે, આવતીકાલના ભરોસે ન રહેતા, સભાનતાપૂર્વક અને સતત પ્રયત્નશીલ રહી જીવનને સાર્થક બનાવવું એ જ મનુષ્ય જીવનનો સાર છે.
