ચાણોદ રેલવે ફાટક પાસે ટ્રેન અડફેટે 3 વર્ષની દીપડીનું મોત:મૃતદેહ પર નજર જતાં સ્થાનિકોએ ફોરેસ્ટ વિભાગને જાણ કરી; પોસ્ટમોર્ટમ બાદ અગ્નિસંસ્કાર કરાયા

જિલ્લાના ચાંણોદ રેલવે ફાટક પર ટ્રેનની અડફેટે એક દીપડીનું મોત નીપજ્યું હતું.વન વિભાગે મૃતદેહનો કબજો લઇ પોસ્ટમોર્ટમની કાર્યવાહી હાથ ધરી હતી. પોસ્ટમોર્ટમ થઇ ગયા બાદ નિયમ મુજબ દીપડીના અંતિમ સંસ્કાર કરવામાં આવ્યા હતા. આ ઘટનાએ પંથકમાં ચકચાર જગાવી મુકી છે. ટ્રેનની અડફેટે સાડા ત્રણ વર્ષની દીપડીનું મોત
મળેલી માહિતી પ્રમાણે, ડભોઇ તાલુકાના ચાણોદ નજીક ઓરસંગ ગામડી અને ભાલોદ્રા ગામડી વચ્ચે રેલવે બ્રિજ આવેલો છે. શિકારની શોધમાં માનવ વસ્તી તરફ આવી ગયેલી દીપડી પસાર થતી ટ્રેનની અડફેટે આવી જતાં મોતને ભેટી હતી. સવારે આ ઘટના અંગે સ્થાનિક લોકોએ ફોરેસ્ટ વિભાગને જાણ કરતાં તુરંત જ ટીમ ઘટના સ્થળે દોડી આવી હતી અને મૃત દીપડીનો કબજો લઇ કાર્યવાહી હાથ ધરી હતી. દીપડીનું મોત થતા વન વિભાગ દ્વારા દીપડીના મૃતદેહને પી.એમ માટે ડભોઇ પશુ હોસ્પિટલ ખાતે લાવવામાં આવ્યો હતો. હોસ્પિટલ લાવ્યા બાદ પોસ્ટમોર્ટમ કરવામાં આવ્યું
ડભોઇના આર.એફ.ઓ. કલ્યાણી ચૌધરીએ જણાવ્યું હતું કે, આજે સવારે અમને ઘટનાની જાણ થતાં અમારી ટીમ સ્થળ ઉપર પહોંચી ગઇ હતી અને મૃતદેહને ડભોઇ પશુ હોસ્પિટલ ખાતે લઇ આવ્યા હતા. મૃતક દીપડી હતી અને તેની ઉંમર સાડા ત્રણ વર્ષની હતી. હોસ્પિટલ ખાતે લાવ્યા બાદ પોસ્ટમોર્ટમ કરવામાં આવ્યું હતું.જે બાદ અગ્નિસંસ્કાર કરવામાં આવ્યા હતા.