ભારતીય કેપ્ટન રોહિત શર્મા, વિરાટ કોહલી અને શુભમન ગિલને ICC ટેસ્ટ ટીમ ઓફ ધ યરમાં સ્થાન મળ્યું નથી. ઇન્ટરનેશનલ ક્રિકેટ કાઉન્સિલે શુક્રવારે આ ટીમને રિલીઝ કરી હતી. પેટ કમિન્સને આ ટીમનો કેપ્ટન બનાવવામાં આવ્યો છે. તેમજ યશસ્વી જયસ્વાલ, જસપ્રીત બુમરાહ અને રવીન્દ્ર જાડેજાને સ્થાન આપ્યું છે. ICC એ ટેસ્ટ ટીમ સાથે 2024 માટે મેન્સ ODI ટીમ ઓફ ધ યર પણ બહાર પાડી છે. તેમાં ભારત, ઓસ્ટ્રેલિયા, ઇંગ્લેન્ડ, ન્યુઝીલેન્ડ અને આફ્રિકાનો કોઈ ખેલાડી સામેલ નથી. શ્રીલંકાના સૌથી વધુ 4 ખેલાડીઓને ટીમમાં તક મળી છે. પાકિસ્તાન અને અફઘાનિસ્તાનના 3-3 ખેલાડીઓ સામેલ છે. વેસ્ટ ઈન્ડિઝના શેરફેન રધરફોર્ડને પણ સ્થાન મળ્યું છે. શ્રીલંકાના કેપ્ટન ચરિથ અસલંકાને ટીમની કમાન સોંપવામાં આવી છે. સૈમ અયુબ (પાકિસ્તાન)
પાકિસ્તાનના આ ડાબા હાથના બેટ્સમેન માટે 2024ની સિઝન શાનદાર રહી છે. સૈમે નવેમ્બરમાં જ ડેબ્યૂ કર્યું હતું. તેણે ઓસ્ટ્રેલિયામાં ત્રણ વન-ડેમાં કુલ 125 રન બનાવ્યા, ત્યારબાદ ટૂંક સમયમાં ઝિમ્બાબ્વેમાં તેની પ્રથમ વન-ડે સદી ફટકારી. તેણે તેની છેલ્લી પાંચ ઇનિંગ્સમાંથી ત્રણમાં સદી ફટકારી છે, જેમાં ડિસેમ્બરમાં દક્ષિણ આફ્રિકામાં બે ઇનિંગ્સનો સમાવેશ થાય છે. રહેમાનુલ્લા ગુરબાઝ (અફઘાનિસ્તાન)
રહેમાનુલ્લા ગુરબાઝે 2021માં ડેબ્યૂ કર્યું હતું. અફઘાનિસ્તાને 2024માં શ્રીલંકા, આયર્લેન્ડ, દક્ષિણ આફ્રિકા અને બાંગ્લાદેશ સામે શ્રેણી રમી હતી અને તે તમામમાં ગુરબાઝે સારું પ્રદર્શન કર્યું હતું. પથુમ નિસાંકા (શ્રીલંકા)
ફેબ્રુઆરીમાં અફઘાનિસ્તાન સામે નિસાંકાના અણનમ 210 રન ODI ઇતિહાસમાં ઓપનર તરીકે છઠ્ઠો સર્વોચ્ચ સ્કોર હતો. નિસાંકા 2024માં સૌથી વધુ ODI આંતરરાષ્ટ્રીય રન બનાવનાર બીજો ખેલાડી છે. તેનો દેશબંધુ કુસલ મેન્ડિસ ટોપ પર છે. કુસલ મેન્ડિસ (વિકેટ કીપર) (શ્રીલંકા)
મેન્ડિસ ODI 2024નો ટોપ સ્કોરર છે. ગયા વર્ષે તેના નામે 742 રન છે. નવેમ્બરમાં ન્યૂઝીલેન્ડ સામે તેનો સર્વોચ્ચ સ્કોર 143 રન હતો, જે ODI ઇતિહાસમાં વિકેટકીપરનો 27મો સર્વોચ્ચ સ્કોર હતો. ચરિથ અસલંકા (કેપ્ટન) (શ્રીલંકા)
અસલંકાએ ઝિમ્બાબ્વે સામે સદી ફટકારીને વર્ષની શરૂઆત કરી હતી. જે તેની કેલેન્ડર વર્ષની એકમાત્ર સદી હતી. તેણે ચાર અલગ-અલગ મેચમાં અડધી સદી ફટકારી હતી. શેરફેન રધરફોર્ડ (વેસ્ટ ઈન્ડિઝ)
રધરફોર્ડે ડિસેમ્બર 2023માં તેની શરૂઆત કરી હતી. તેણે 2024માં નવ વન-ડે મેચ રમી હતી. ગુયાનાના 26 વર્ષીય ખેલાડીએ વેસ્ટ ઈન્ડિઝ માટે સાત ઇનિંગ્સમાં 425 રન બનાવ્યા હતા, જે એક બોલમાં એક રન કરતા વધુ ઝડપી છે. અઝમતુલ્લા ઓમરઝાઈ (અફઘાનિસ્તાન)
ઉમરઝાઈનું ઓલરાઉન્ડ પ્રદર્શન 2024માં ODI મેચમાં અફઘાનિસ્તાન માટે કામમાં આવ્યું. આ સમયગાળા દરમિયાન તેણે બેટ અને બોલ બંનેથી સારું પ્રદર્શન કર્યું. વાનિન્દુ હસરંગા (શ્રીલંકા)
ગયા વર્ષે જાન્યુઆરીમાં હસરંગાએ ઝિમ્બાબ્વે સામે 19 રન આપીને 7 વિકેટ લીધી હતી. જે વન-ડે ઈતિહાસમાં એક ઇનિંગમાં પાંચમું સર્વશ્રેષ્ઠ પ્રદર્શન છે. શાહીન શાહ આફ્રિદી (પાકિસ્તાન)
શાહીન શાહ આફ્રિદીએ છેલ્લા કેલેન્ડર વર્ષમાં માત્ર છ વન-ડે રમી હોવા છતાં મોટી અસર કરી હતી. આ દરમિયાન તેણે 15 વિકેટ ઝડપી હતી. હારિસ રઉફ (પાકિસ્તાન)
રઉફે 2024માં ઓસ્ટ્રેલિયા પ્રવાસ પર પાકિસ્તાનની ત્રણ મેચની શ્રેણીમાં 10 વિકેટ લીધી હતી. જેમાં એડિલેડમાં તેની પાંચ વિકેટ પણ સામેલ હતી. અલ્લાહ ગઝનફર (અફઘાનિસ્તાન)
18 વર્ષીય ગઝનફરે માર્ચ 2024માં આયર્લેન્ડ સામે વન-ડેમાં ડેબ્યૂ કર્યું હતું. નવેમ્બરમાં બાંગ્લાદેશ સામે 26 રનમાં 6 વિકેટ લેનાર ગઝનફર ODIમાં પાંચ વિકેટ લેનારો પાંચમો સૌથી યુવા બોલર બન્યો હતો.
રોહિત, કોહલી ICC ટેસ્ટ ટીમ ઓફ ધ યરમાંથી બાકાત:પેટ કમિન્સને કેપ્ટન બનાવ્યો; જયસ્વાલ, બુમરાહ અને જાડેજાના નામ સામેલ
