વુમન્સ અંડર-19 વર્લ્ડ કપ:પાકિસ્તાને સમોઆને 52 રનથી હરાવ્યું; નેપાળે મલેશિયા સામે 7 વિકેટે જીત મેળવી

વુમન્સ અંડર-19 વર્લ્ડ કપમાં શુક્રવારે રમાયેલી બે મેચમાં પાકિસ્તાન અને નેપાળે જીત મેળવી હતી. પાકિસ્તાને પ્રથમ વખત વર્લ્ડ કપ રમી રહેલી સમોઆ મહિલા ટીમને 52 રનથી હરાવ્યું હતું. જ્યારે નેપાળે મલેશિયાને 7 વિકેટે હરાવ્યું હતું. મહમ અનીસના 28 રન અને ફાતિમા ખાનના 25 રનની મદદથી પાકિસ્તાને 136/8નો સ્કોર કર્યો હતો. જવાબમાં સમોઆની ટીમ 18.5 ઓવરમાં 84 રનમાં સમેટાઈ ગઈ હતી. હાનિયા અહમરે 4 વિકેટ લીધી હતી. જોહરમાં રમાયેલી અન્ય એક મેચમાં નેપાળે મલેશિયાની ટીમને 45 રનમાં આઉટ કરી દીધી હતી. બાદમાં ટીમે 11 ઓવરમાં 3 વિકેટ ગુમાવીને 47 રન બનાવીને મેચ જીતી લીધી હતી. નેપાળની કેપ્ટન પૂજા મહતો પ્લેયર ઓફ ધ મેચ રહી હતી. PAKW Vs SAMW: સમોઆની બેટિંગ અહમર સામે ટકી શકી નહીં
પાકિસ્તાન મહિલા U19 એ 36 રનમાં પ્રથમ 2 વિકેટ ગુમાવી દીધી હતી. કેપ્ટન અને વિકેટકીપર કોમલ ખાને 20 બોલમાં 11 રન બનાવ્યા હતા, પરંતુ શરૂઆતના આંચકાઓ છતાં મિડલ ઓર્ડરે દાવ સંભાળ્યો હતો. મહમ અનીસ (28 રન) અને ફાતિમા ખાને (25 રન) મહત્વપૂર્ણ યોગદાન આપ્યું હતું. તે જ સમયે, કુર્તુલ એન અહસાને અંતે 13 બોલમાં અણનમ 13 રન બનાવ્યા અને 20 ઓવરમાં 8 વિકેટ ગુમાવીને ટીમનો સ્કોર 136 રન સુધી પહોંચાડ્યો. બોલિંગમાં નોરા સલીમાએ સમોઆ માટે શાનદાર પ્રદર્શન કર્યું અને 4 ઓવરમાં 20 રન આપીને 3 વિકેટ લીધી. કેટરીના સમુએ પણ 2 વિકેટ લીધી હતી. 137 રનને ચેઝ કરવા ઉતરેલી સમોઆ મહિલા U19 ટીમની શરૂઆત ખરાબ રહી હતી. નોરા સલીમા (5 રન) અને ટીમના કેપ્ટન અવેટિયા માપુ (0 રન) જલ્દી જ પેવેલિયન પરત ફર્યા હતા. એન્જલ સુતાગા (11 રન) અને સ્ટેલા સગલાલા (15 રન) એ સંઘર્ષ કર્યો, પરંતુ ટીમ 18.5 ઓવરમાં માત્ર 84 રનમાં ઓલઆઉટ થઈ ગઈ. પાકિસ્તાન તરફથી હાનિયા અહમરે 4 ઓવરમાં 17 રન આપીને 4 વિકેટ ઝડપી હતી. ફાતિમા ખાન અને કુરાતુલ એન અહસાને 2-2 વિકેટ લીધી હતી. NEPW Vs MASW: કેપ્ટન પૂજાનું ઓલરાઉન્ડ પ્રદર્શન
નેપાળની કેપ્ટન પૂજા મહતોએ ટીમ માટે 4 વિકેટ લીધી અને 25 રન પણ બનાવ્યા. ટૉસ હારતા પહેલી બેટીંગ કરતા મલેશિયાની મહિલા ટીમની એકમાત્ર બેટર જ ડબલ ફિગરને સ્પર્શી શકી હતી. નુરીમાન હિદાયએ સૌથી વધુ 15 રન બનાવ્યા હતા. નેપાળ તરફથી રચના ચૌધરીએ 3 ઓવરમાં 5 રન આપીને 1 મેડન અને 3 વિકેટ લીધી હતી. પૂજાએ 3.5 ઓવરમાં 9 રન આપીને 4 વિકેટ ઝડપી હતી અને આખી ટીમ 16.5 ઓવરમાં 45 રનના સ્કોર પર ઓલઆઉટ થઈ ગઈ હતી. જવાબમાં નેપાળી ટીમની શરૂઆત પણ ખરાબ રહી હતી. ટીમે તેના બંને ઓપનર 10 રનમાં ગુમાવ્યા હતા. પરંતુ પૂજાએ 23 રનની ઇનિંગ રમી અને 11 ઓવરમાં ટીમને જીત અપાવી.