લોકપ્રિય એક્ટર, નિર્માતા અને દિગ્દર્શક રાકેશ રોશન આ દિવસોમાં તેમની ડોક્યુમેન્ટરી સિરીઝ ‘ધ રોશન્સ’ માટે ચર્ચામાં છે. રોશન્સ 17 જાન્યુઆરીના રોજ નેટફ્લિક્સ પર રિલીઝ થઈ છે. આ સિરીઝના પ્રમોશન દરમિયાન, રાકેશ રોશને તે ઘટના વર્ણવી જ્યારે એક દારૂડિયાએ રેસ્ટોરન્ટમાં ડિનર કરતી વખતે પોતાની સાથે દુર્વ્યવહાર કરવાનું શરૂ કર્યું. આ દરમિયાન જીતેન્દ્ર પણ તેની સાથે હતો, જેણે મામલો સંભાળ્યો હતો. તાજેતરમાં Netflixને આપેલા એક ઈન્ટરવ્યૂમાં રાકેશ રોશને કહ્યું હતું કે, ‘મને યાદ છે જિતેન્દ્ર અને હું એક રેસ્ટોરન્ટમાં બેઠા હતા. સામે એક માણસ ખૂબ નશામાં હતો. તે અમારી સામે નામ લઈને અપશબ્દો બોલતો હતો. મને ખૂબ ગુસ્સો આવી રહ્યો હતો કે તે અમને આવું કેમ કહે છે. તેથી મેં જીતુ (જીતેન્દ્ર)ને કહ્યું કે આપણે તેને કહીએ.’ તેના જવાબમાં જીતેન્દ્રએ કહ્યું, ‘ચૂપ રહો. ચાલો બહાર જઈએ. આપણે તેને ઓળખતા નથી, પણ તે આપણને જાણે છે. એટલા માટે કે આપણે સોફ્ટ ટાર્ગેટ છીએ’. રાકેશ રોશને જણાવ્યું કે જીતેન્દ્રએ તેને સમજાવ્યા બાદ તે ત્યાંથી ચાલ્યો ગયો. વાતચીત દરમિયાન રાકેશ રોશને એક્ટિંગ છોડીને ડિરેક્શનમાં કરિયર બનાવવાની વાત પણ કરી હતી. 80ના દાયકામાં રાકેશ રોશનની ઘણી ફિલ્મો ફ્લોપ રહી હતી. આ પછી તેણે 1980માં આવેલી ફિલ્મ ‘આપ કે દીવાને’થી નિર્માતા તરીકેની કારકિર્દીની શરૂઆત કરી. તેમના નિર્માણની તે પછીની ફિલ્મ ‘કામચોર’ હતી, જે હિટ રહી હતી. ફિલ્મના નિર્માણની સાથે તેમણે જયા પ્રદા સાથે મુખ્ય ભૂમિકા પણ ભજવી હતી. આ પછી તેમના પ્રોડક્શનની ફિલ્મો પણ ફ્લોપ થવા લાગી. આવી સ્થિતિમાં, તેમણે 1987ની ‘ખુદગર્ઝ’ ડિરેક્ટર તરીકે તેમની કારકિર્દીની નવી ઇનિંગ શરૂ કરી. તેના પર તેમણે કહ્યું કે, ‘તે સમયે મારી સાથે જે કલાકારો હતા તે ગાયબ થઈ ગયા હતા. હું પણ જતો રહ્યો. ખલનાયકની ભૂમિકા ભજવતા, નાના-નાના રોલ કરતા. આ રીતે મને અનુભવ મળ્યો. પછી હું નિર્માતા બન્યો, પરંતુ તેમાં પણ મને સફળતા મળી ન હતી. ‘કામચોર’ ફિલ્મ ઘણી સફળ રહી, પરંતુ તેમાં પણ મને સફળતા મળી ન હતી. જયા પ્રદા આગળ વધી,પણ હું ત્યાં જ રહી ગયો. પછી મેં વિચાર્યું કે હું ડિરેક્ટર બનીશ. જ્યારે હું નિર્માતા હતો ત્યારે અમે પટકથા પર ચર્ચા કરતા હતા. એ વખતે મારી કલ્પના જુદી હતી.’ ‘ખુદગર્ઝ’ સાથે દિગ્દર્શક તરીકેની કારકિર્દીની શરૂઆત કર્યા પછી, રાકેશ રોશને ‘ખૂન ભરી માંગ’, ‘કિશન કન્હૈયા’, ‘ખેલ’, ‘કરણ-અર્જુન’, ‘કોયલા’, ‘કહો ના પ્યાર હૈ’, ‘કોઈ મિલ ગયા’, ‘ક્રિશ’, ‘ક્રિશ 3’ જેવી ફિલ્મોનું નિર્દેશન કર્યું છે.
