નરેન્દ્ર મોદી સ્ટેડિયમમાં બે દિવસના ધમાકેદાર પર્ફોર્મન્સ બાદ રવિવારે(26 જાન્યુઆરી)ની રાત્રે અમદાવાદના જજીસ બંગલો વિસ્તારમાં ક્રિસ માર્ટીન તેની ગર્લફ્રેન્ડ ડકોટા જોનસન સાથે વોક કરવા નીકળતા લોકો સિગ્નેચર અને સેલ્ફી લેવા પહોંચ્યા હતા. લોકોની ભીડ વધવા લાગતા ક્રિસ અને તેની ગર્લફ્રેન્ડ કારમાં બેસી ત્યાંથી રવાના થયાં હતાં. આ સમયે એક બાળકી પણ ભૈયા…ભૈયા કહીને ક્રિસની નજીક પહોંચી મળવાનો પ્રયાસ કર્યો હતો. ક્રિસનો આ વીડિયો હાલ સોશિયલ મીડિયામા વાઈરલ થયો છે. આ પહેલાં પણ ક્રિસની અમદાવાદમાં એક્ટિવાની રાઈડ ચર્ચાનું કેન્દ્ર બની હતી. અમદાવાદના જીજસ બંગલો વિસ્તારમાં વોક માટે નીકળ્યાં હતાં બ્રિટિસ બેન્ડનો લીડ આર્ટિસ્ટ ક્રિસ માર્ટીન તેની ગર્લફ્રેન્ડ ડાકોટા જ્હોન્સન સાથે અમદાવાદના જજીસ બંગલો રોડ પર ચીફ જસ્ટિસના બંગલો નજીક વોક કરતા જોવા મળ્યાં હતાં. ધીમે ધીમે લોકો એકત્ર થવા લાગતા ક્રિસ અને તેની ગર્લફ્રેન્ડ પોતાની કારમાં બેસી ગયાં હતાં. લોકોએ ક્રિસ સાથે સેલ્ફી અને સિગ્નેચર લેવા પ્રયાસ કર્યો હતો. ભૈયા…ભૈયા…કહી એક બાળકી ક્રિસની કાર નજીક પહોંચી ક્રિસ અને ડકોટા જોનસન રે કારમાં બેસી રવાના થવાનો પ્રયાસ કરી રહ્યાં હતાં ત્યારે જ એક બાળકી ભૈયા…ભૈયા…કહીને ક્રિસની કાર નજીક પહોંચી હતી અને દરવાજા પર હાથ મૂકી મળવાનો પ્રયાસ કરતી જોવા મળી હતી. કોણ છે ડકોટા જોનસન? હોલિવૂડ ફિલ્મ એક્ટ્રેસ ડકોટા જોનસને 2015માં આવેલી ફિલ્મ ‘ફિફ્ટી શેડ્સ ઓફ ગ્રે’થી આંતરરાષ્ટ્રીય સ્તરે ખૂબ જ જાણીતી થઈ હતી. ડકોટા પોતાનાં વિવાદિત નિવેદનો અને ક્રિસ સાથેના સંબંધોને લઈને હંમેશાં ચર્ચામાં રહી છે. હાલમાં ડકોટા જોનસનનું નામ બોયફ્રેન્ડ ક્રિસ માર્ટિન સાથેના લગ્નના સમાચારને કારણે ચર્ચામાં છે. ડકોટા જોનસન અને ક્રિસ માર્ટિન છેલ્લાં 6 વર્ષથી એકબીજાને ડેટ કરી રહ્યાં છે. ગયા વર્ષે બંનેએ પોતાના સંબંધો વિશે ખૂલીને વાત કરી હતી. 47 વર્ષીય ક્રિસ પહેલેથી જ પરિણીત છે અને 34 વર્ષીય ડાકોટા તેની લાંબા સમયની ગર્લફ્રેન્ડ છે. આ બંનેએ 2024માં સિક્રેટ સગાઈ કરી લીધી છે. આ દરમિયાન બંનેના પરિવારના નજીકના સભ્યો હાજર હતા. પ્રાપ્ત માહિતી અનુસાર, ડકોટાએ તેના છેલ્લા જન્મદિવસ પર જીવનની આ નવી ઇનિંગ શરૂ કરી છે. જસપ્રીત બુમરાહે 26 જાન્યુઆરીએ કોલ્ડપ્લેના કોન્સર્ટમાં ભાગ લીધો હતો ભારતીય ક્રિકેટ ટીમના ફાસ્ટ બોલર જસપ્રીત બુમરાહે 26 જાન્યુઆરીએ અમદાવાદમાં કોલ્ડપ્લેના કોન્સર્ટમાં ભાગ લીધો હતો. પીઠની ઈજાના કારણે ટીમની બહાર રહેલો બુમરાહ કોન્સર્ટમાં ખૂબ જ મસ્તી કરતો જોવા મળ્યો હતો. જ્યારે કોલ્ડપ્લેના લીડ સિંગર ક્રિસ માર્ટિને બુમરાહનું નામ ઓડિયન્સમાં લીધું ત્યારે ચાહકોનો જોશ જોવા જેવો હતો. બ્રિટિશ બેન્ડે ભારતીય ફાસ્ટ બોલર માટે કેટલીક લાઈનો પણ ગાઈ હતી. તેનો વીડિયો પણ સોશિયલ મીડિયા પર ખૂબ વાઈરલ થઈ રહ્યો છે. બુમરાહ માટે સ્પેશિયલ સોંગ ગાયું કોન્સર્ટમાં બ્રિટિશ બેન્ડે ભારતીય ફાસ્ટ બોલરનું ઉષ્માભર્યું સ્વાગત કર્યું અને તેના માટે કેટલીક લાઈનો ગાઈ. બેન્ડે મજાકમાં કહ્યું કે તમે જ્યારે એક બાદ એક ઈંગ્લેન્ડની વિકેટ લો છો ત્યારે અમને ગમતું નથી. કોલ્ડપ્લે કોન્સર્ટમાં તેમના લીડ સિંગરે ગાયું, ઓ જસપ્રીત બુમરાહ, મારા ભાઈ. ક્રિકેટ જગતમાં સૌથી શ્રેષ્ઠ બોલર. ઇંગ્લેન્ડ સામે એક પછી એક તમારી વિકેટ જોઈને અમને મજા નથી આવતી. સ્ટેજ પર સિંગરે બુમરાહની સહી કરેલી જર્સી બતાવી હતી કોલ્ડપ્લેએ અમદાવાદમાં બુમરાહના સન્માનમાં મંચ પર તેમની સહી કરેલી ટેસ્ટ જર્સી પ્રદર્શિત કરી હતી. આ પહેલીવાર નથી જ્યારે કોલ્ડપ્લેએ ભારતમાં તેમના કોન્સર્ટમાં બુમરાહનો ઉલ્લેખ કર્યો હોય. અગાઉ મુંબઈ શો દરમિયાન બેન્ડે 2024 ટેસ્ટ સિરીઝમાં ઇંગ્લેન્ડની બેટિંગ લાઇન-અપ સામે બુમરાહનો વીડિયો ચલાવ્યો હતો. મુંબઈમાં પણ બુમરાહના નામની બૂમો પડી હતી તે જ શોમાં ક્રિસ માર્ટિને મજાક કરી હતી કે કોન્સર્ટ દરમિયાન બુમરાહના નામનો ઉપયોગ કરવા બદલ બેન્ડને બુમરાહના વકીલો તરફથી કાનૂની નોટિસ મળી હતી. કાલ્પનિક લેટર વાંચતી વખતે માર્ટિને કહ્યું હતું કે, ‘હું ખૂબ જ દિલગીર છું, પરંતુ મારે જસપ્રીત બુમરાહના વકીલનો લેટર વાંચવો છે. મારે આ કરવું પડશે, કારણ કે નહીં તો અમને જેલ થઈ શકે છે અને અમે અમદાવાદમાં પર્ફોર્મ કરી શકીશું નહીં. તેમણે શો દરમિયાન અન્ય ઘણા રેફરેન્સ આપ્યા ત્યારબાદ બુમરાહ પોતે આખરે કોન્સર્ટમાં પહોંચ્યો. 26 જાન્યુઆરીનો શો હોટસ્ટાર પર લાઈવ સ્ટ્રીમ કરવામાં આવ્યો હતો. બુમરાહને ટીવી પર લાઈવ જોઈને ભારતીય ક્રિકેટ ચાહકો આનંદથી ઊછળી પડ્યા હતા. બુમરાહે પણ કોન્સર્ટની મજા માણી હતી અને ચાહકોથી ભરેલા નરેન્દ્ર મોદી સ્ટેડિયમના વાતાવરણને પણ માણ્યું હતું.
