ગુજરાતમાં અલગ અલગ 5 અકસ્માતમાં 2ના મોત:અંકલેશ્વરમાં ટ્રક-ટેન્કર વચ્ચે ટક્કરમાં એકનું મોત, બસની અડફેટે બાઈક ચાલકનું મોત, સ્કૂલવાન અને કાર વચ્ચે અકસ્માતમાં સ્કૂલવાન પલટી

ગુજરાતમાં આજે 5 અકસ્માતમાં બે વ્યક્તિના મોત થયા છે. જ્યારે કેટલાક લોકોને નાની મોટી ઈજાઓ પહોંચી છે. હાલોલ-વડોદરા રોડ પર સર્વોત્તમ હોટેલ નજીક બસે મોટરસાયકલને અડફેટે લેતા એકનું મોત થયું છે. તો બીજા બનાવમાં અંકલેશ્વર અને પાનોલી વચ્ચે આવેલા આમલાખડી ઓવરબ્રિજ નજીક ટ્રક અને કેમિકલ ભરેલા ટેન્કર વચ્ચે ગમખ્વાર અકસ્માત થયો હતો, જેમાં એક વ્યક્તિએ જીવ ગુમાવ્યો હતો. જ્યારે ત્રીજા બનાવમાં કોસંબા ઓવરબ્રિજ નજીક NH-48 પર કારે ટેમ્પાને ટક્કર મારતાં ટેમ્પો ઈકો કાર સાથે અથડાયો હતો. આ ત્રિપલ અકસ્માતમાં પાંચ લોકોને નાની-મોટી ઘજાઓ થઇ હતી. ચોથા બનાવમાં ડીસા પાલનપુર હાઇવે પર ભોયણ નજીક સ્કૂલવાન અને કાર વચ્ચે સર્જાયો અકસ્માત સર્જાતા સ્કૂલવાન પલટી મારી ગઈ હતી. સ્કૂલવાન પલટી મારતાં વિદ્યાર્થીઓને નાની મોટી ઇજાઓ પહોંચી છે. પાંચમાં બનાવમાં એક ટ્રક, એક્ટિવા અને એસટી બસ વચ્ચે અકસ્માતમાં એક્ટિવા પર સવાર બે વ્યક્તિઓ અને એક બાળક ઘાયલ થયા છે. પ્રથમ અકસ્માત
હાલોલ-વડોદરા રોડ પર સર્વોત્તમ હોટેલ નજીક આજે બપોરે એક અકસ્માત સર્જાયો હતો. વડોદરાથી લુણાવાડા જતી એસટી બસે તેમની મોટરસાયકલને અડફેટે લીધી હતી. અકસ્માતમાં ઠાકોરભાઈ મોટરસાયકલ પરથી રોડ પર પટકાયા હતા અને બસ તેમના પર ફરી વળતાં ઘટનાસ્થળે જ કમકમાટીભર્યું મોત નિપજ્યું હતું. અકસ્માત બાદ બસ ડ્રાઈવર વાહન મૂકીને ફરાર થઈ ગયો હતો. મૃતકના પરિવારજનોની ફરિયાદના આધારે ફરાર થયેલા એસટી બસ ડ્રાઈવર સામે ગુનો નોંધી વધુ તપાસ હાથ ધરી છે. બીજો અકસ્માત
અંકલેશ્વર નજીક નેશનલ હાઈવે 48 પર આજે વહેલી સવારે એક ગંભીર અકસ્માત સર્જાયો હતો. અંકલેશ્વર અને પાનોલી વચ્ચે આવેલા આમલાખડી ઓવરબ્રિજ નજીક ટ્રક અને કેમિકલ ભરેલા ટેન્કર વચ્ચે ગમખ્વાર અકસ્માત થયો હતો, જેમાં એક વ્યક્તિએ જીવ ગુમાવ્યો હતો. અકસ્માતની ગંભીરતા વધુ એટલા માટે વધી કે ટેન્કરમાંથી એસિડ લીક થવાનું શરૂ થયું હતું, જેના કારણે આસપાસના વિસ્તારમાં અફરાતફરીનો માહોલ સર્જાયો હતો. આ ઘટનાની જાણ થતાં જ ફાયર બ્રિગેડની ટીમ તાત્કાલિક ઘટનાસ્થળે પહોંચી હતી અને એસિડ લીકેજને કાબૂમાં લેવા માટેની કામગીરી શરૂ કરી હતી. હાઈવે પર ટ્રાફિક જામની સ્થિતિ સર્જાઈ હતી
અકસ્માતને પગલે નેશનલ હાઈવે 48 પર ટ્રાફિક જામની સ્થિતિ સર્જાઈ હતી. પોલીસ કાફલો પણ ઘટનાસ્થળે પહોંચી ગયો હતો અને મૃતકના મૃતદેહને પોસ્ટમોર્ટમ માટે ખસેડવામાં આવ્યો હતો. પોલીસે આ ઘટના અંગે વધુ તપાસ શરૂ કરી છે. આ વિસ્તારમાં વારંવાર થતા અકસ્માતોને કારણે સ્થાનિકોમાં ચિંતાનું મોજું ફરી વળ્યું છે. ત્રીજો અકસ્માત
નેશનલ હાઈવે-48 પર કોસંબા ઓવરબ્રિજ નજીક ગંભીર ત્રિપલ અકસ્માત સર્જાયો હતો. અમદાવાદથી મુંબઈ તરફ જતાં માર્ગ પર એક પછી એક ત્રણ વાહન અથડાયા હતા. પ્રાથમિક તપાસમાં જાણવા મળ્યા મુજબ, હોન્ડા કારે ટેમ્પાને ટક્કર મારી હતી, જેના કારણે ટેમ્પો અન્ય એક ઈકો કાર સાથે અથડાયો હતો. અકસ્માતની ગંભીરતા એટલી હતી કે, ત્રણેય વાહન સામેની દિશામાં આવેલા રોડ તરફ ડિવાઈડર કૂદીને ફંગોળાયા હતા. ત્રણેય વાહન ડિવાઈડર કૂદીને ફંગોળાયા
સુરત તરફ જતાં આ વાહનો ડિવાઈડર પરથી પલટી ખાઈને અમદાવાદ તરફના માર્ગ પર પડ્યા હતા. અકસ્માતમાં કારમાં સવાર 6 લોકોને ઈજાઓ પહોંચી હતી, જેમને તાત્કાલિક 108 એમ્બ્યુલન્સ મારફતે નજીકની હોસ્પિટલમાં સારવાર માટે ખસેડવામાં આવ્યા હતા. સદનસીબે આ ગંભીર અકસ્માતમાં કોઈ જાનહાની થઈ ન હતી. અકસ્માતની ઘટનાઓમાં વધારો થયો
ઘટનાની જાણ થતાં જ NHAI, કોસંબા પોલીસ અને જિલ્લા ટ્રાફિક પોલીસની ટીમ ઘટનાસ્થળે પહોંચી ગઈ હતી. અકસ્માતને કારણે હાઈવે પર કેટલાક સમય માટે ટ્રાફિક હળવો થયો હતો. નોંધનીય છે કે, છેલ્લા કેટલાક સમયથી આ હાઈવે પર અકસ્માતની ઘટનાઓમાં વધારો થયો છે, જેના કારણે વાહન ચાલકોમાં ચિંતાનું મોજું ફેલાયું છે. ચોથો અકસ્માત
ડીસા પાલનપુર હાઇવે પર ભોયણ નજીક સ્કૂલવાન અને કાર વચ્ચે સર્જાયો અકસ્માત. રસાણા તરફથી ડીસા તરફ જતિ સ્કૂલવાન અને કાર વચ્ચે ધડાકાભેર અકસ્માત સર્જાતા સ્કૂલવાન પલટી મારતાં સ્થાનિક લોકો દોડી જઈ ગાડી માંથી વિદ્યાર્થીઓને બહાર કાઢ્યા. અકસ્માતમાં સ્કૂલવાનમાં બેઠેલા વિદ્યાર્થીઓને નાની મોટી ઇજાઓ પહોંચી.ઇજાઓ પહોંચેલા વિદ્યાર્થીઓને 108 દ્વારા ડીસા સિવિલ હોસ્પિટલ ખાતે ખસેડાયા. પાંચમો અકસ્માત
મહીસાગર જિલ્લાના લુણાવાડા-સંતરામપુર હાઇવે પર મૂળજીની ઉકરડી ગામ નજીક ત્રિપલ અકસ્માત સર્જાયો છે. એક ટ્રક, એક્ટિવા અને એસટી બસ વચ્ચે સર્જાયેલા આ અકસ્માતમાં એક્ટિવા પર સવાર બે વ્યક્તિઓ અને એક બાળક ઘાયલ થયા છે. અકસ્માતની તીવ્રતા એટલી હતી કે એક્ટિવા ટ્રક નીચે આવી જતાં તેનો કચ્ચરઘાણ નીકળી ગયો હતો. સ્થાનિક લોકોએ તાત્કાલિક 108 એમ્બ્યુલન્સને જાણ કરી હતી, જેના દ્વારા ઘાયલોને તાત્કાલિક ખાતે સારવાર માટે ખસેડવામાં આવ્યા છે. એસટી બસમાં મુસાફરી કરી રહેલા તમામ મુસાફરો સુરક્ષિત હોવાનું જાણવા મળ્યું છે. આ અકસ્માતમાં સદનસીબે કોઈ જાનહાની થઈ નથી. ઘટનાની જાણ થતાં લુણાવાડા તાલુકા પોલીસ ઘટનાસ્થળે પહોંચી ગઈ છે અને અકસ્માત અંગે વિસ્તૃત તપાસ હાથ ધરી છે.