રહીમ અલ-હુસેનીને આગા ખાનના ઉત્તરાધિકારી જાહેર કરવામાં આવ્યા છે. તેઓ વિશ્વભરના લાખો ઇસ્માઇલી મુસ્લિમોના નવા ધાર્મિક નેતા બનશે. આગા ખાન ડેવલપમેન્ટ નેટવર્ક અનુસાર, પ્રિન્સ રહીમ અલ-હુસેની આગા ખાન (પંચમ) ને બુધવારે ઇસ્માઇલી સમુદાયના 50મા આધ્યાત્મિક નેતા તરીકે નિયુક્ત કરવામાં આવ્યા હતા. આગા ખાન ડેવલપમેન્ટ નેટવર્કે X પર લખ્યું છે કે, પ્રિન્સ રહીમ અલ-હુસેની આગા ખાન (પંચમ)ને બુધવારે શિયા ઇસ્માઇલી મુસ્લિમોના 50મા વારસાગત ઇમામ (ધાર્મિક નેતા) તરીકે નિયુક્ત કરવામાં આવ્યા હતા. પ્રિન્સ રહીમના નામની જાહેરાત તેમના સ્વર્ગસ્થ પિતા, પ્રિન્સ કરીમ અલ-હુસેની આગા ખાન IV (ચતુર્થ)નું વસિયતનામું ખોલ્યા બાદ કરવામાં આવી હતી. ઇસ્માઇલી મુસ્લિમોના ધાર્મિક અને આધ્યાત્મિક નેતા અને અબજોપતિ આગા ખાનનું મંગળવારે 88 વર્ષની વયે પોર્ટુગલમાં અવસાન થયું. તેઓ શિયા ઇસ્માઇલી મુસ્લિમોના 49મા વારસાગત ઇમામ હતા. આગા ખાનને ૩ દીકરા અને એક દીકરી છે. આગા ખાનને તેમના અનુયાયીઓ પયગંબર મુહમ્મદના સીધા વંશજ માને છે અને તેમને રાષ્ટ્રાધ્યક્ષ માનવામાં આવે છે. ઇસ્માઇલી મુસ્લિમોના 1,400 વર્ષના ઇતિહાસમાં, તેઓનું હંમેશા જીવંત વારસાગત ઇમામે નેતૃત્વ કર્યુ છે. ઇસ્માઇલીઓ 35થી વધુ દેશોમાં રહે છે અને તેમની સંખ્યા આશરે 12 થી 15 મિલિયન છે. ઇસ્માઇલી મુસ્લિમો કોણ છે? ઇસ્માઇલી મુસ્લિમો શિયા ઇસ્લામનો એક સંપ્રદાય છે, જેને ખોજા મુસ્લિમો, આગાખાની મુસ્લિમો અને નિઝારી મુસ્લિમો તરીકે પણ ઓળખવામાં આવે છે. અનુયાયીઓ દ્વારા તે બીજો સૌથી મોટો શિયા ઉપ-સંપ્રદાય છે. ઇસ્માઇલી મુસ્લિમો ઇમામ દ્વારા કુરાનના અર્થઘટનનું પાલન કરે છે. ઇસ્માઇલી મુસ્લિમો જ્યાં ઈબાદત કરે છે તે સ્થળને જમાતખાના કહેવામાં આવે છે. આગા ખાનને 20 વર્ષની ઉંમરે આધ્યાત્મિક નેતા બનાવવામાં આવ્યા હતા આગા ખાનનું સાચું નામ પ્રિન્સ શાહ કરીમ અલ હુસૈની હતું. તેમનો જન્મ 13 ડિસેમ્બર, 1936ના રોજ જીનીવામાં થયો હતો અને તેમનું બાળપણ કેન્યાના નૈરોબીમાં વિતાવ્યું હતું. હાર્વર્ડ યુનિવર્સિટીમાંથી ઇસ્લામિક ઇતિહાસમાં સ્નાતક થયેલા આગા ખાન 20 વર્ષની ઉંમરે ઇસ્માઇલી મુસ્લિમોના આધ્યાત્મિક નેતા બન્યા. મીડિયા રિપોર્ટ્સ અનુસાર તેમની સંપત્તિ $800 મિલિયનથી $13 બિલિયન સુધીની હોવાનો અંદાજ છે. તેમણે વિકાસશીલ દેશોમાં ઘરો, હોસ્પિટલો અને શાળાઓને મોટા પ્રમાણમાં દાન આપ્યું. આગા ખાનનું બિરુદ 1957માં આપવામાં આવ્યું હતું. 19 ઓક્ટોબર 1957ના રોજ, તેમને દાર એસ સલામ, તાંઝાનિયામાં સત્તાવાર રીતે આગા ખાન ચતુર્થનો તાજ પહેરાવવામાં આવ્યો. આગા ખાનના અનુયાયીઓ તેમને પયગંબર મુહમ્મદના વંશજ માનતા હતા. તેમની પાસે બ્રિટિશ, ફ્રેન્ચ, સ્વિસ અને પોર્ટુગીઝ નાગરિકતા હતી. તેમને ઘોડા પાળવાનો પણ શોખ હતો. આપણા દેશમાં પૈસા કમાવવાને ખરાબ માનવામાં આવતું નથી. ઇસ્લામિક નૈતિકતા એ છે કે જો ભગવાને તમને સમાજમાં એક વિશેષ સ્થાન આપ્યું હોય તો સમાજ પ્રત્યે તમારી નૈતિક જવાબદારી વધી જાય છે. તેમને મુસ્લિમ સમાજ અને પશ્ચિમી વિશ્વ વચ્ચે સેતુ સમાન માનવામાં આવતા ઇસ્લામિક સંસ્કૃતિના સમર્થક આગા ખાનને મુસ્લિમ સમાજ અને પશ્ચિમી વિશ્વ વચ્ચે સેતુ માનવામાં આવતા હતા. તેમણે બાંગ્લાદેશ, તાજિકિસ્તાન અને અફઘાનિસ્તાનમાં ઘણી હોસ્પિટલો બનાવી. આગા ખાને બે વાર લગ્ન કર્યા. તેમના પહેલા લગ્ન 1969માં ભૂતપૂર્વ બ્રિટિશ મોડેલ સારાહ ક્રોકર પૂલ સાથે થયા હતા, જેમનાથી તેમને એક પુત્રી અને બે પુત્રો હતા. બંનેના 1995માં છૂટાછેડા થયા. 1998માં તેમણે જર્મનીમાં જન્મેલા ગેબ્રિએલ લીનિંગેન સાથે લગ્ન કર્યા, જેની સાથે તેમને એક પુત્ર પણ હતો. 2014માં બંનેના છૂટાછેડા થયા.
