રણવીર અલ્હાબાદિયા પર પહેલા FIR, હવે સંસદમાં મુદ્દો ઊઠશે:વાંધાજનક ટિપ્પણી મામલે સંસદીય સમિતિ રણવીરને સમન્સ મોકલશે, કડક કાર્યવાહી કરવાની માગ

કોમેડિયન સમય રૈનાના શો ‘ઇન્ડિયા હેઝ ગોટ લેટેન્ટ’માં વિવાદાસ્પદ નિવેદન આપનાર યુટ્યૂબર અને પોડકાસ્ટર રણવીર અલ્હાબાદિયાની મુશ્કેલીઓ વધુ વધી શકે છે. એક તરફ, રણવીર અને શોના પાંચ જજો વિરુદ્ધ તેમના વિવાદાસ્પદ નિવેદન બદલ કેસ દાખલ કરવામાં આવ્યો છે, તો બીજી તરફ, સંસદમાં પણ આ મુદ્દો ગરમાઈ રહ્યો છે. નોંધનીય છે કે રણવીર અલ્હાબાદિયા પર સમય રૈનાના કાર્યક્રમમાં માતા-પિતા વિશે અત્યંત વાંધાજનક ટિપ્પણી કરવાનો આરોપ છે. સૂત્રોના જણાવ્યા અનુસાર આઇટી મામલાની સંસદીય સમિતિ આ મામલે રણવીર અલ્હાબાદિયાને નોટિસ મોકલવાનું વિચારી રહી છે. આ સમિતિ રણવીરને સમન્સ મોકલી શકે છે. એક દિવસ પહેલાં સમિતિના સભ્ય પ્રિયંકા ચતુર્વેદીએ આ માંગણી કરી હતી, અને હવે એવું કહેવામાં આવી રહ્યું છે કે ઘણા અન્ય સાંસદોએ પણ આવી જ માંગણી કરી છે. આઇટી અને કોમ્યુનિકેશન્સની સંસદીય સમિતિ માહિતી અને પ્રસારણ સચિવ અને આઇટી સચિવને બોલાવશે. રણવીર અલ્હાબાદિયાના વીડિયો અંગે સચિવોને બોલાવવામાં આવશે. આ શોને લાઇવ કરનાર પ્લેટફોર્મ સામે કાર્યવાહી કરવામાં આવશે. હું આ મુદ્દો સંસદમાં ઉઠાવીશ: સસ્મિતા પાત્રા
રણવીર અલ્હાબાદિયાની ટિપ્પણી પર બીજેડી સાંસદ સસ્મિતા પાત્રાએ પણ નિવેદન આપ્યું છે. સસ્મિતાએ કહ્યું, ‘આ ખૂબ જ દુર્ભાગ્યપૂર્ણ છે.’ સંચાર અને આઇટી અંગેની સંસદીય સ્થાયી સમિતિના સભ્ય તરીકે, હું આ મુદ્દો સમિતિ સમક્ષ ઉઠાવવાની છું. ગ્રાન્ટની માંગણી માટે અમે ટૂંક સમયમાં એક બેઠક કરવાના છીએ. હું ઈચ્છું છું કે આવી અપમાનજનક ટિપ્પણીઓ માટે કડક માર્ગદર્શિકા અને કડક પગલાં લેવામાં આવે. ખાસ કરીને જ્યારે યુવાન સંવેદનશીલ આવા યુટ્યૂબર્સને ફોલો કરે છે. સિને વર્કર્સ એસોસિયેશને પણ નિંદા કરી
આ દરમિયાન ઓલ ઈન્ડિયા સિને વર્કર્સ એસોસિયેશન (AICWA) એ ‘ઈન્ડિયા હેઝ ગોટ લેટેન્ટ’ ની સખત નિંદા કરી છે અને આ કાર્યક્રમ પર તાત્કાલિક પ્રતિબંધ મૂકવાની માંગ કરી છે. AICWA એ કહ્યું, ‘અમે YouTube કાર્યક્રમ ‘ઇન્ડિયા હેઝ ગોટ લેટેન્ટ’ પર કરવામાં આવેલી નિંદનીય અને વાંધાજનક ટિપ્પણીઓની સખત નિંદા કરીએ છીએ.’ તાજેતરના એક એપિસોડમાં ભાગ લેનાર રણવીર અલ્હાબાદિયાએ ઘૃણાસ્પદ અને અપમાનજનક નિવેદનો આપ્યાં હતાં જે આપણાં સામાજિક અને કૌટુંબિક મૂલ્યો માટે અત્યંત અપમાનજનક છે. આવી અપમાનજનક સામગ્રી સંપૂર્ણપણે અસ્વીકાર્ય છે અને આપણા સમાજના નૈતિક માળખા માટે ગંભીર જોખમ છે. AICWA સહયોગ બંધ કરવાની અપીલ કરી
AICWA એ આગળ કહ્યું, ‘અમે આની નિંદા કરીએ છીએ અને આવા ઘૃણાસ્પદ શોને ક્યારેય સમર્થન આપીશું નહીં.’ આપણો ઉદ્યોગ (ફિલ્મ ઉદ્યોગ) હંમેશાં એવી સામગ્રીનો વિરોધ કરે છે જે અનાદરને પ્રોત્સાહન આપે છે અને સામાજિક સુમેળને નબળો પાડે છે. અમે બધા કલાકારો, ફિલ્મ નિર્માતાઓ, દિગ્દર્શકો અને ટેક્નિશિયનોને વિનંતી કરીએ છીએ કે તેઓ શોમાં સામેલ વ્યક્તિઓ, જેમાં હોસ્ટ સમય રૈના અને રણવીર અલ્હાબાદિયાનો સમાવેશ થાય છે, તેમની સાથે કોઈપણ જોડાણ તાત્કાલિક બંધ કરે. આ લોકોને ભારતીય ફિલ્મ ઉદ્યોગ તરફથી કોઈ સમર્થન મળશે નહીં. આસામમાં રણવીર અલ્હાબાદિયા, સમય રૈના વિરુદ્ધ FIR દાખલ
રણવીર અલ્હાબાદિયાએ કોમેડિયન સમય રૈનાના શોમાં ‘અભદ્ર ટિપ્પણીઓ’ કરીને પોતાને મોટી મુશ્કેલીમાં મૂકી દીધો છે. આસામની ગુવાહાટી પોલીસે અલ્હાબાદિયાના વિવાદાસ્પદ નિવેદન પર કેસ નોંધ્યો છે. મુખ્યમંત્રી હિમંતા બિસ્વા સરમાએ સોશિયલ મીડિયા પર આ માહિતી આપી છે. એફઆઈઆરમાં રણવીર અલ્હાબાદિયા અને સમય રૈના ઉપરાંત આશિષ ચંચલાની, જસપ્રીત સિંહ, અપૂર્વ માખીજા અને અન્ય લોકોનાં નામ છે. NHRCએ યુટ્યૂબને વિવાદાસ્પદ એપિસોડ દૂર કરવા કહ્યું હતું
રાષ્ટ્રીય માનવાધિકાર આયોગ NHRCના અધ્યક્ષ પ્રિયંક કાનુન્ગોએ કહ્યું હતું કે YouTubeને મોકલવામાં આવેલી ફરિયાદમાં શો દ્વારા નકારાત્મકતા, ભેદભાવ, ધાર્મિક અને સાંસ્કૃતિક અસહિષ્ણુતા અને મહિલાઓ અને બાળકો પ્રત્યે અપમાનજનક અને અશ્લીલ બાબતોના પ્રસારણ અંગે ગંભીર ચિંતા વ્યક્ત કરવામાં આવી હતી. વધુમાં એવો આરોપ મૂકવામાં આવ્યો હતો કે અભિવ્યક્તિની સ્વતંત્રતાના નામે, આ શો અશ્લીલ અને અભદ્ર સામગ્રીનું પ્રસારણ કરે છે અને ભ્રામક સંદેશાઓ ફેલાવીને સમાજમાં ખોટી માનસિકતાને પ્રોત્સાહન આપે છે. મુંબઈ પોલીસ રણવીર અલ્હાબાદિયાના ઘરે પૂછપરછ માટે પહોંચી રણવીર અલ્હાબાદિયા વિરુદ્ધ કેસ નોંધાયા બાદ મુંબઈ પોલીસે સમય રૈના અને રણવીર અલ્હાબાદિયાનો સંપર્ક કર્યો હતો. આ મામલે આજે પોલીસ રણવીરના ઘરે પહોંચી છે. પોલીસે બંનેને તપાસ અધિકારીઓ સમક્ષ હાજર થવા, સહકાર આપવા અને આ મામલે પોતાનો પક્ષ રજૂ કરવા જણાવ્યું હતું. વાસ્તવમાં, રાષ્ટ્રીય માનવાધિકાર આયોગ NHRC એ YouTube ને પત્ર લખીને પ્લેટફોર્મ પરથી આ એપિસોડ દૂર કરવાની માંગ કરી હતી. જોકે, રણવીર અલ્હાબાદિયાએ આ મામલે માફી પણ માંગી લીધી છે. રણવીર અલ્હાબાદિયાએ સોશિયલ મીડિયા પર માફી માંગી ચારે બાજુથી ટીકાનો સામનો કરી રહેલા રણવીર અલ્હાબાદિયાએ સોશિયલ મીડિયા પર માફી પણ માંગી છે. જોકે, તેમને રાહત મળવાની શક્યતા ઓછી છે, કારણ કે ઘણા લોકોએ તેમની વિરુદ્ધ ફરિયાદો નોંધાવી છે. રાષ્ટ્રીય માનવ અધિકાર આયોગ (NHRC) એ આ મામલે યુટ્યૂબને પત્ર પણ લખ્યો છે. ‘સનાતન ધર્મની વાતો કરે છે પણ વિચારોમાં ગંદવાડ’: બી પ્રાક રણવીર અલ્હાબાદિયાના પોડકાસ્ટમાં નહીં જાય, સમય રૈનાના પર પણ ભડક્યો યુટ્યૂબર રણવીર અલ્લાહાબાદિયાએ સમય રૈનાના શોમાં માતા-પિતા અને મહિલાઓ પર અભદ્ર ટિપ્પણીઓ કરી હતી. જેની સોશિયલ મીડિયા પર ખૂબ જ ટીકા કરવામાં આવી. હવે આ મામલે સિંગર બી પ્રાક યુટ્યૂબર રણવીર અલ્હાબાદિયાના પોડકાસ્ટ પર નહીં જાય. તેણે કહ્યું- હું ‘બીયર બાયસેપ્સ’ પોડકાસ્ટ પર જવાનો હતો, પણ હવે તે રદ કરું છું. આ સમાચાર વધુ વાંચવા માટે અહીં ક્લિક કરો….