વડોદરા શહેરના બાપોદ વિસ્તારમાં નામ અને ધર્મ છુપાવી યુવતીને ફસાવી હોવાનો કિસ્સો પ્રકાશમાં આવતા ચકચાર મચી ગઇ છે. જેમાં તાંદલજા વિસ્તારમાં રહેતા યુવક મોહસીન દ્વારા પોતાની ઓળખ છુપાવીને તેનું નામ મનોજ હોવાનું કહીને બે સંતાનની માતાને પ્રેમજાળમાં ફસાવી હતી અને તેની સાથે હિન્દુ વિધિ મુજબ લગ્ન પણ કર્યા હતા. લગ્ન બાદ મોહસીનના કાંડનો પર્દાફાશ થતા તેણે યુવતી તથા તેના સંતાનોને ધર્મ પરિવર્તન કરવા માટે દબાણ કર્યું હતું. જો આ વાતની કોઇને જાણ કરીશ તો તને તથા તારા સંતાનોને જાનથી મારી નાખીશ તેવી ધમકી પણ આપી હતી. જેથી યુવતીએ બાપોદ પોલીસ સ્ટેશનમાં ફરિયાદ નોંધાવી છે. મનોજ નામ ધારણ કરી મોહસીને યુવતીને ફસાવ્યાનો આક્ષેપ
વડોદરા શહેરના તાંદલજા વિસ્તારમાં સનફાર્મા કંપનીની બાજુમાં આવેલા નુરજહાપાર્ક સોસાયટીમાં રહેતા મોહસીન ઐયુબખાન પઠાણ પોતે પરીણિત હોવા છતાં તેણ પોતાની ઓળખ છુપાવી હતી અને મનોજ સોની તરીકેની ઓળખ આપી હતી અને બાપોદ વિસ્તારમાં રહેતી 33 વર્ષીય પરીણિત અને બે સંતાનની માતાને પ્રેમજાળમાં ફસાવી હતી. યુવતી સાથે હિન્દુ ધર્મવિધિ મુજબ લગ્ન કર્યા
વર્ષ 2022 સુધીમાં મોહસીને યુવતી સાથે વારંવાર શરીર સંબંધ બાંધ્યા હતા. ત્યારબાદ યુવક મુસ્લિમ હોવા છતાં યુવતી સાથે હિન્દુ વિધિ મુજબ લગ્ન કર્યા હતા. દરમિયાન ગત 14 જાન્યુઆરીના રોજ યુવતીને તેનું નામ પરંતુ મોહસીન હોવાની જાણ થઇ હતી. ત્યારે યુવતીએ આ વાત મોહસીન પઠાણને કહેવા જતા તેણે યુવતી સાથે ઝઘડો કર્યો હતો અને તેને તથા તેના પુત્રોને ધર્મ પરિવર્તન કરવા માટે દબાણ કરવા લાગ્યો હતો. જો તું આ વાતની કોઇને જાણી કરીશ તો તને તથા તારા પુત્રોને જાનથી મારી નાખીશ તેવી ધમકી આપી હતી. યુવતીના નામે લોન લેવડાવી
લગ્ન જીવનન દરમિયાન મોહસીન પઠાણે ખાનગી ફાઇનાન્સ કંપનીમાં યુવતી પાસે રૂ. 90 હજારના લોન લેવડાવી હતી. આ ઉપરાંત તેના મિત્રને નામે મોપેડ લીધુ હતુ. જેના હપ્તા પણ યુવતી ભરી રહી છે. મોહસીન પઠાણે યુવતી પાસેથી રોકડ રૂપિયા એક લાખ લઇને પરત નહી આપી છેતરપિંડી આચરી છે. જેથી બે સંતાનની માતાએ બાપોદ પોલીસ સ્ટેશનમાં ફરિયાદ નોંધાવતા પોલીસ દ્વારા આરોપીને ઝડપી પાડવાના ચક્રો ગતિમાન કર્યા છે.
મોહસીને મનોજ બનીને યુવતીને પ્રેમજાળમાં ફસાવી:વડોદરામાં યુવકે ઓળખ છુપાવી બે સંતાનની માતા સાથે લગ્ન કર્યાં, ભાંડો ફુટી જતા યુવકે યુવતી અને તેના સંતાનોને ધર્મ પરિવર્તન કરવા દબાણ કર્યું
