જમ્મુ અને કાશ્મીરમાં નિયંત્રણ રેખા (LoC) પર તણાવ વચ્ચે, આજે પૂંછ સેક્ટરમાં ભારત અને પાકિસ્તાન વચ્ચે ફ્લેગ મીટિંગ યોજાશે. છેલ્લા ચાર વર્ષમાં બંને દેશો વચ્ચે આ પહેલી મીટિંગ હશે. છેલ્લી મીટિંગ 2021માં યોજાઈ હતી. જમ્મુ અને કાશ્મીરમાં LoC પર છેલ્લા ઘણા અઠવાડિયાથી તણાવ છે. 4 ફેબ્રુઆરીના રોજ સેનાએ 7 પાકિસ્તાની ઘુસણખોરોને ઠાર માર્યા હતા. 13 ફેબ્રુઆરીએ પણ પાકિસ્તાની સૈનિકો દ્વારા યુદ્ધવિરામ ભંગના સમાચાર આવ્યા હતા. પાછળથી સેનાએ આ વાતનો ઇનકાર કર્યો હતો. છેલ્લા એક મહિનામાં LoC પર 5 ઘટનાઓ… 16 ફેબ્રુઆરી 2025: જમ્મુ અને કાશ્મીરમાં LoC પર સ્નાઈપર ફાયરિંગ, એક ભારતીય જવાન ઘાયલ 16 ફેબ્રુઆરીના રોજ જમ્મુ અને કાશ્મીરમાં LoC પર પૂંછ સેક્ટરમાં સ્નાઈપર ફાયરિંગ થયું હતું જેમાં એક ભારતીય જવાન ઘાયલ થયો હતો. આ ઘટના પછી, ભારતીય અને પાકિસ્તાની સૈનિકો વચ્ચે થોડા સમય માટે ગોળીબાર થયો હતો. 13 ફેબ્રુઆરી2025: પાકિસ્તાન તરફથી ગોળીબારના સમાચાર 13 ફેબ્રુઆરીના રોજ, ભારતીય સરહદ પર પાકિસ્તાન તરફથી ગોળીબારના અહેવાલો આવ્યા હતા. પાકિસ્તાની અધિકારીઓનો એક વીડિયો પણ સોશિયલ મીડિયા પર વાયરલ થયો હતો જેમાં તેઓ પોતાના સૈનિકોને શ્રદ્ધાંજલિ આપતા જોવા મળ્યા હતા. કેટલાક અહેવાલોમાં 6 લોકોના મોત થયા હોવાનું જણાવાયું છે. જોકે, ભારતીય સેનાએ કહ્યું હતું કે પાકિસ્તાન સરહદ પર યુદ્ધવિરામ લાગુ છે. 11 ફેબ્રુઆરી 2025: LoC નજીક IED વિસ્ફોટ, 2 જવાન શહીદ, એક ઘાયલ જમ્મુ જિલ્લાના અખનૂર સેક્ટરમાં LoC નજીક લાલોલી વિસ્તારમાં IED વિસ્ફોટ થયો હતો. જેમાં બે સેનાના જવાનો શહીદ થયા હતા. આ વિસ્ફોટ 11 ફેબ્રુઆરીના રોજ 3:50વાગ્યે ભટ્ટલ વિસ્તારમાં થયો હતો, જ્યારે સેનાના જવાનો પેટ્રોલિંગમાં હતા. સેનાના સૂત્રોએ દાવો કર્યો હતો કે શહીદ જવાનના નામ કેપ્ટન કેએસ બક્ષી અને મુકેશ હતા. 4 ફેબ્રુઆરી 2025: સેનાએ 7 પાકિસ્તાની ઘુસણખોરોને ઠાર કર્યા ભારતીય સેનાએ 7 પાકિસ્તાની ઘુસણખોરોને ઠાર માર્યા હતા. મીડિયા રિપોર્ટ્સમાં સૂત્રોના હવાલાથી કહેવામાં આવ્યું છે કે આ ઘટના 4 ફેબ્રુઆરીની રાત્રે પૂંછ જિલ્લાના કૃષ્ણા ઘાટી પાસે બની હતી જ્યારે નિયંત્રણ રેખા (LoC) નજીક ઘૂસણખોરીનો પ્રયાસ કરવામાં આવ્યો હતો. સૂત્રોએ દાવો કર્યો હતો કે ભારતીય સેનાની ફોરવર્ડ પોસ્ટ પર હુમલો કરવાની યોજના હતી. 14 જાન્યુઆરી 2025: નિયંત્રણ રેખા નજીક લેન્ડમાઇન વિસ્ફોટ, 6 સૈનિકો ઘાયલ 14 જાન્યુઆરીના રોજ, જમ્મુ અને કાશ્મીરના રાજૌરીમાં LoC નજીક લેન્ડમાઇન વિસ્ફોટમાં ગોરખા રાઇફલ્સના 6 જવાન ઘાયલ થયા હતા. આ વિસ્ફોટ ભવાની સેક્ટરના માકરી વિસ્તારમાં થયો હતો. ખાંબા કિલ્લા પાસે સૈનિકોની એક ટુકડી પેટ્રોલિંગ કરી રહી હતી. તે દરમિયાન, એક સૈનિકે ભૂલથી સેના દ્વારા બિછાવેલી લેન્ડમાઈન પર પગ મૂક્યો હતો.
