માંગરોળના બોરિયા ગામમાં એક આદિવાસી યુવતીની હત્યાએ સમગ્ર વિસ્તારમાં ચકચાર મચાવી છે. આજે ઝંખવાવ ખાતે આદિવાસી સમાજે ગાંધીજીના અહિંસક સિદ્ધાંતોને અનુસરીને અનોખી રીતે વિરોધ પ્રદર્શન કર્યું. આદિવાસી આગેવાનોએ આંખ, મોઢા અને કાન પર હાથ મૂકીને પ્રતીકાત્મક વિરોધ નોંધાવ્યો. આ ઘટનાએ સમગ્ર આદિવાસી સમાજમાં રોષની લાગણી જન્માવી છે. પોલીસ આરોપીને સજા અપાવવા માટે કાર્યરત છે. પોલીસ પરવાનગીના અભાવે રેલી યોજી શકાઈ નથી. આદિવાસી સમાજના નેતાઓએ વિસ્તારમાં દીકરીઓની સુરક્ષાની માગ કરી છે. તેમણે ઝંખવાવ વિસ્તારમાં થતી છેડતીઓ અંગે પણ ચિંતા વ્યક્ત કરી છે. આદિવાસી આગેવાન અરવિંદ વસાવાએ જણાવ્યું કે તંત્ર દ્વારા માત્ર પ્રાંત અધિકારીને આવેદનપત્ર આપવાની જ મંજૂરી મળી છે. તેમણે કહ્યું કે, જ્યારે આદિવાસીઓને અન્યાય થાય છે ત્યારે તંત્ર આંખ, કાન અને મોઢું બંધ કરી દે છે. તેથી તેઓ ગાંધીજીના ત્રણ વાંદરાની જેમ વિરોધ નોંધાવી રહ્યા છે. આગેવાનોએ ચેતવણી આપી છે કે જો સુરક્ષાની માંગ નહીં સંતોષાય તો આદિવાસી સમાજ પોતાની બહેન-દીકરીઓની સુરક્ષા માટે યોગ્ય પગલાં લેશે.
