લેન્ડ ફોર જોબ કેસમાં લાલુ પરિવારને મંગળવારે દિલ્હીની રાઉઝ એવન્યુ કોર્ટમાંથી ઝટકો લાગ્યો છે. કોર્ટે લાલુ, તેજ પ્રતાપ અને હેમા વિરુદ્ધ સમન્સ જારી કર્યા છે. તમામને 11 માર્ચે કોર્ટમાં હાજર થવાનો આદેશ આપવામાં આવ્યો છે. અગાઉ કોર્ટે નિર્ણય અનામત રાખ્યો હતો. આ મામલામાં સીબીઆઈએ લાલુ યાદવ અને અન્ય 78 સામે ચાર્જશીટ દાખલ કરી છે. આમાં 30 સરકારી કર્મચારીઓ આરોપી છે. સીબીઆઈએ કહ્યું હતું કે, ‘અમે રેલવે બોર્ડના અધિકારી આરકે મહાજન સામેના કેસ માટે કોર્ટ પાસેથી મંજૂરી લીધી છે. તેની સામેના સાક્ષીઓની યાદી પણ તૈયાર છે. કોર્ટ આગળ આ મામલે નિર્ણય લેશે. અગાઉ 16 જાન્યુઆરીએ કોર્ટે કહ્યું હતું કે જો 30 જાન્યુઆરી સુધીમાં મહાજન વિરુદ્ધ મંજૂરી આપવામાં નહીં આવે તો સક્ષમ અધિકારીએ ખુલાસો આપવો પડશે. જાન્યુઆરી 2024માં લાલુ-તેજશ્વીની પૂછપરછ કરવામાં આવી હતી લેન્ડ ફોર જોબ કેસમાં 20 જાન્યુઆરી 2024ના રોજ દિલ્હી અને EDની પટના ટીમના અધિકારીઓએ લાલુ અને તેજસ્વીની 10 કલાકથી વધુ પૂછપરછ કરી હતી. EDના સૂત્રોના જણાવ્યા અનુસાર લાલુ પ્રસાદને 50થી વધુ પ્રશ્નો પૂછવામાં આવ્યા હતા. તેમણે મોટે ભાગે હા કે ના જવાબો આપ્યા. પૂછપરછ દરમિયાન લાલુ ઘણી વખત અકળાઈ પણ ગયા હતા. તેમજ, 30 જાન્યુઆરીએ તેજસ્વીની લગભગ 10-11 કલાક સુધી પૂછપરછ કરવામાં આવી હતી. 7 પોઈન્ટ્સમાં લેન્ડ ફોર જોબ ડીલનો સમગ્ર ખેલ ડીલ 1: સીબીઆઈની પ્રાથમિક તપાસમાં જાણવા મળ્યું છે કે 6 ફેબ્રુઆરી, 2008ના રોજ પટનાના કિશુન દેવ રાયે પોતાની જમીન રાબડી દેવીના નામે ખૂબ જ ઓછી કિંમતે ટ્રાન્સફર કરી હતી. એટલે કે 3,375 ચોરસ ફૂટ જમીન રાબડી દેવીને માત્ર 3.75 લાખ રૂપિયામાં વેચવામાં આવી હતી. સાથે જ તે વર્ષે પરિવારના 3 સભ્યો રાજ કુમાર સિંહ, મિથિલેશ કુમાર અને અજય કુમારને સેન્ટ્રલ રેલવે મુંબઈમાં ગ્રુપ ડીની પોસ્ટ પર નોકરી મળી હતી. ડીલ 2: ફેબ્રુઆરી 2008માં, પટનાના મહુઆબાગના સંજય રાયે પણ રાબડી દેવીને 3,375 ચોરસ ફૂટ જમીન માત્ર રૂ. 3.75 લાખમાં વેચી દીધી. સીબીઆઈને તપાસમાં જાણવા મળ્યું કે સંજય રાય સિવાય પરિવારના અન્ય બે સભ્યોને રેલવેમાં નોકરી મળી છે. ડીલ 3: પટનાની રહેવાસી કિરણ દેવીએ નવેમ્બર 2007માં લાલુ યાદવની પુત્રી મીસા ભારતીને તેની 80,905 ચોરસ ફૂટ જમીન માત્ર રૂ. 3.70 લાખમાં વેચી દીધી હતી. આ પછી 2008માં કિરણ દેવીના પુત્ર અભિષેક કુમારને સેન્ટ્રલ રેલવે મુંબઈમાં નોકરી મળી. ડીલ 4: ફેબ્રુઆરી 2007માં પટણાના રહેવાસી હજારી રાયે તેની 9,527 ચોરસ ફૂટ જમીન દિલ્હી સ્થિત કંપની એકે ઈન્ફોસિસ્ટમ પ્રાઈવેટ લિમિટેડને રૂ. 10.83 લાખમાં વેચી હતી. બાદમાં હજારી રાયના બે ભત્રીજાઓ દિલચંદ કુમાર અને પ્રેમચંદ કુમારને પશ્ચિમ-મધ્ય રેલવે જબલપુર અને દક્ષિણ-પૂર્વ રેલવે કોલકાતામાં નોકરી મળી. સીબીઆઈને જાણવા મળ્યું છે કે એકે ઈન્ફોસિસ્ટમના તમામ અધિકારો અને સંપત્તિ વર્ષ 2014માં લાલુ પ્રસાદ યાદવની પુત્રી અને પત્નીને આપવામાં આવી હતી. રાબડી દેવીએ 2014માં કંપનીના મોટાભાગના શેર ખરીદ્યા હતા અને બાદમાં તે કંપનીના ડિરેક્ટર બન્યા હતા. ડીલ 5: પટનાના રહેવાસી લાલ બાબુ રાયે મે 2015માં માત્ર 13 લાખ રૂપિયામાં રાબડી દેવીના નામે તેમની 1,360 ચોરસ ફૂટ જમીન ટ્રાન્સફર કરી હતી. સીબીઆઈએ તપાસ કરતાં જાણવા મળ્યું કે લાલ બાબુ રાયના પુત્ર લાલચંદ કુમારને 2006માં નોર્થ-વેસ્ટર્ન રેલવે, જયપુરમાં નોકરી મળી હતી. ડીલ 6: બ્રિજ નંદન રાયે માર્ચ 2008માં તેની 3,375 ચોરસ ફૂટ જમીન ગોપાલગંજના રહેવાસી હૃદયાનંદ ચૌધરીને 4.21 લાખ રૂપિયામાં વેચી દીધી હતી. હૃદયાનંદ ચૌધરીને વર્ષ 2005માં પૂર્વ-મધ્ય રેલવે હાજીપુરમાં નોકરી મળી હતી. 2014માં હૃદયાનંદ ચૌધરીએ આ જમીન લાલુ પ્રસાદ યાદવની પુત્રી હેમાને ગિફ્ટ ડીડ દ્વારા ટ્રાન્સફર કરી હતી. જ્યારે સીબીઆઈએ તપાસ કરી તો જાણવા મળ્યું કે હૃદયાનંદ ચૌધરી અને લાલુ પ્રસાદ યાદવ દૂરના સંબંધીઓ પણ નથી. તેમજ જે જમીન ભેટમાં આપવામાં આવી હતી તે સમયે સર્કલના દર મુજબ તેની કિંમત 62 લાખ રૂપિયા હતી. ડીલ 7: વિશુન દેવ રાયે માર્ચ 2008માં સિવાનના રહેવાસી લાલન ચૌધરીને તેની 3,375 ચોરસ ફૂટ જમીન આપી હતી. લાલનના પૌત્ર પિન્ટુ કુમારને 2008માં પશ્ચિમ રેલવે મુંબઈમાં નોકરી મળી. આ પછી લાલન ચૌધરીએ ફેબ્રુઆરી 2014માં આ જમીન હેમા યાદવને આપી હતી.
