ભાવનગર શહેરના ગંગાજળિયા પોલીસે મોતીતળાવ વિસ્તારમાંથી મોટી માત્રામાં વિદેશી દારૂનો જથ્થો ઝડપી પાડ્યો છે. પોલીસને પેટ્રોલિંગ દરમિયાન મળેલી બાતમીના આધારે મોતીતળાવ વીઆઈપી વિસ્તારમાં તપાસ હાથ ધરી હતી. પોલીસે મોગલ માતાના મંદિર પાસે પાર્ક કરેલા કન્ટેનરની તપાસ કરી હતી. કન્ટેનરમાં ચોખાના કટ્ટાની આડમાં છુપાવેલો વિદેશી દારૂનો જથ્થો મળી આવ્યો હતો. કન્ટેનરમાંથી વિવિધ બ્રાન્ડની કુલ 11,852 બોટલ દારૂ અને 550 કટ્ટા ચોખા મળી આવ્યા હતા. ઘટના સમયે કન્ટેનર પાસે કોઈ વ્યક્તિ હાજર ન હતી. પોલીસે કન્ટેનરને સી ડિવિઝન પોલીસ સ્ટેશન ખાતે લઈ જઈને વધુ તપાસ હાથ ધરી છે. પોલીસે ટ્રક ચાલક, ભાવનગરમાં દારૂ મંગાવનાર અને રાજસ્થાનથી દારૂનો જથ્થો મોકલનાર બે અજાણ્યા શખ્સો વિરુદ્ધ પ્રોહિબિશન એક્ટ હેઠળ ગુનો નોંધ્યો છે. પોલીસે દારૂનો જથ્થો, ચોખાના કટ્ટા, ટ્રક અને અન્ય દસ્તાવેજો સહિત કુલ રૂપિયા 38,49,450નો મુદ્દામાલ કબજે કર્યો છે. આ મામલે પોલીસે વધુ તપાસ શરૂ કરી છે.
