8 માર્ચના રોજ આંતરરાષ્ટ્રીય મહિલા દિવસ સમગ્ર વિશ્વમાં ઉજવવામાં આવે છે. ત્યારે આંતરરાષ્ટ્રીય મહિલા દિવસની આડમાં સાયબર અપરાધીઓ મહિલાઓનો પર્સનલ ડેટા ચોરવા માટે ડિમાર્ટના નામની ફેક લિંક વાઇરલ કરી છે. જેના માધ્યમથી એક લોકોને આ લિંક ફોરવર્ડ કરવાનું કહી ગિફ્ટ બોક્સ ખોલવાનું કહી અલગ-અલગ ટાસ્ક આપી છેતરપિંડી આચરવામાં આવી રહી છે. તો જાણે સાયબર એક્સપર્ટ પાસેથી કે આ પ્રકારની લિંક આવે તો શું સાવધાની રાખવી અને છેતરપિંડીથી કેવી રીતે બચવું. ફેક લિંક થકી થતો દાવો…
આંતરરાષ્ટ્રીય મહિલા દિવસની આડમાં સાઈબર અપરાધીઓ દ્વારા જે ફેક લિંક વાઈરલ કરી છે, તે લિંકના માધ્યમથી સાયબર અપરાધીઓ તમામ મહિલાઓને જણાવી રહ્યા છે કે, આંતરરાષ્ટ્રીય મહિલા દિવસની ઊજવણી નિમિત્તે ડિમાર્ટ તરફથી જે મહિલાઓ આ લિંક પર ક્લિક કરશે અને મિસ્ટ્રી બૉક્સ પર ક્લિક કરશે તો તે 6000 રૂપિયા જીતશે. એકવાર 6000 રૂપિયા જીતી લીધા બાદ તે મહિલાએ રૂપિયા મેળવવા માટે ફરજીયાત પણે ડિમાર્ટના નામની ફેક લિંકને 5 વ્હોટ્સએપ ગ્રુપ્સ પર કાંતો 20 વ્હોટ્સએપ યૂઝર્સને મોકલવી પડશે. ત્યારબાદ એક રજીસ્ટ્રેશન ફોર્મ ફરજીયાત પણે ભરવું પડશે, જેમાં પર્સનલ ડેટા જેમ કે નામ, સરનામું, મોબાઈલ નંબર જેવી વિગતો ભરવી પડશે. ત્યારબાદ પાંચથી સાત દિવસમાં 6000 રૂપિયા તેમને મળી શકશે. ફેક લિંકનું 360 ડિગ્રી ટેકનીકલ એનાલિસીસ કરાયુઃ મયુર ભૂસાવળકર
આ અંગે સાયબર એક્સપર્ટ મયુર ભૂસાવળકરે જણાવ્યું હતું કે, મારા દ્વારા ફેક લિંકનું 360 ડિગ્રી ટેકનીકલ એનાલિસીસ કરતાં એ બાબત સામે આવી કે આ વેબસાઈટને માર્ચ મહિનાની ત્રીજી તારીખે જ હોસ્ટ કરવામાં આવી છે. ત્યારબાદ તેને વ્હોટ્સએપ થકી વાઇરલ કરવામાં આવી છે. તેના ડોમેઈનને ચેક કરતાં સર્વર લોકેશન, અક્ષાંશ અને રેખાંશની માહિતી તેમજ સ્થળની માહિતી અનનોન રાખી હતી. ‘3 સવાલ બાદ મિસ્ટરી બોક્સ યૂઝર સામે ખુલે છે’
વધુમાં કહ્યું કે, લિક પર ક્લિક કરનારને મુખ્ય ચાર પ્રશ્નો પૂછવામાં આવે છે. જેમાં શું તમે ડિમાર્ટને ઓળખો છો? તમારી ઉંમર શું છે? તમે ડિમાર્ટ માટે શું વિચારો છો? આવા ચાર પ્રશ્નો પૂછવામાં આવે છે. ત્યારબાદ મિસ્ટરી બોક્સ યૂઝર સામે રજૂ કરવામાં આવે છે અને યૂઝરને તેના પર ક્લિક કરવાનું હોય છે. તેનું અલ્ગોરિધ્મ એ પ્રકારે સેટ કરેલુ હોય છે કે કોઈપણ યૂઝર બીજીવાર ક્લીક કરશે, ત્યારબાદ જ તે 6000 રૂપિયા મિસ્ટરી બોક્સમાંથી બહાર આવશે. તેને મેળવવા માટે યૂઝરે આ ફેક લિંકને પાંચ વ્હોટ્સએપ ગ્રુપ્સ અથવા 20 જણાને વ્હોટ્સએપ પર મોકલવી પડશે. ‘યૂઝરને લિંક 90 જણાને મોકલવાનુ કહેવાય છે’
વધુમાં કહ્યું કે, અહીંયા પણ એવું અલ્ગોરિધમ નિર્ધારિત કરવામાં આવ્યું છે. યુઝરને તે 90 જણને વ્હોટ્સએપ પર મોકલ્યા બાદ જ સ્ટેટ્સ બાર 100 ટકા પૂર્ણ થાય છે. આ પ્રકારની તમામ બાબત પૂર્ણ થયા બાદ યૂઝર્સને અંતિમ તબક્કામાં લે જવામાં આવે છે, ત્યાં સાયબર અપરાધીઓ ગેમ રમે છે. ત્યાં યૂઝર પાસે વેરિફિકેશન મેથડ અનુસરવાનું કહેવામાં આવે છે, જેમાં તેને મોબાઈલ ડિવાઈસ વેરિફાય કરવાનું, સર્વે લિંક પર ક્લિક કરવાનું, તેમજ ફોન વેરિફિકેશન કરવાનું કહેવામાં આવે છે. તે થકી સાયબર અપરાધી યૂઝરના મોબાઈલને નિયંત્રણ મેળવવાનો પ્રયત્ન કરે છે. યૂઝરનું નામ, સરનામું અને મોબાઈલ નંબર જેવી અંગત માહિતી મેળવી લેવામાં આવે છે. ‘ડિમાર્ટને આ લિંક સાથે કોઈ સંબંધ નથી’
ત્યારબાદ ત્રાહિત વેબસાઈટ પર યૂઝરને ડાઈવર્ટ કરીને પેસીવ ઈન્કમ માટે યૂઝરને ધકેલવાનો કારસો રચવામાં આવે છે. તેમજ 6000 રૂપિયા ક્લેઈમ કરવા માટે યૂઝરની બેંક માહિતી પણ મેળવવામાં આવી રહી છે. આમ આ લિંક ફેક અથવા ભ્રામક છે અને ડિમાર્ટને આ લિંક સાથે કોઈ સંબંધ નથી. સાવચેતી રાખવાની બાબતો
(1) લાલચ આપતી આવી લિંકોથી દૂર રહેવું જોઈએ, તેમજ તેને ફોરવર્ડ કરવાથી પણ બચવું જોઈએ.
(2) ઈન્ટરનેટ પર કાર્ય કરતી વેળાએ ઝીરો ટ્રસ્ટ પોલિસીને અનુસરવું જોઈએ.
(3) પોતાનો પર્સનલ ડેટા કોઈપણ ત્રાહિત વ્યક્તિ સાથે ક્યારેય શેર કરવો જોઈએ નહીં.
(4) કોઈપણ લિંક પર ક્લિક કરતાં પહેલા તે લિંકને એન્ટીવાઈરસ સોફ્ટવેરથી સ્કેન કરવી જરૂરી છે, સાથે બોટ રિમૂવલ ટૂલનો ઉપયોગ કરી શકાય.
(5) જો આર્થિક નુકસાન થાય તો 1930 પર કોલ કરીને ત્વરિત ફરિયાદ દાખલ કરવી જોઈએ.
વુમેન્સ ડે ગિફ્ટની વાઇરલ લિંકથી સાવધાન:ઠગબાજો 6 હજારની લાલચમાં મહિલાઓના પર્સનલ ડેટા, બેંકની માહિતી લઈ ઠગાઈ આચરે છે, જાણો શું કાળજી રાખવી
