WPL: મુંબઈ ઈન્ડિયન્સનો પાંચમો વિજય:ગુજરાત જાયન્ટ્સનો 9 રનથી પરાજય, હરમનપ્રીત કૌરની ફિફ્ટી; મેથ્યુઝ-અમેલિયાની 3-3 વિકેટ

વુમન્સ પ્રીમિયર લીગ (WPL)ની સીઝન-3 માં મુંબઈ ઈન્ડિયન્સે ગુજરાત જાયન્ટ્સને 9 રને હરાવ્યું હતું. કેપ્ટન હરમનપ્રીત કૌરે 54 રનની ઇનિંગ રમી. જ્યારે હેલી મેથ્યુસ અને અમેલિયા કેરે 3-3 વિકેટ લીધી. ગુજરાત જાયન્ટ્સે ટૉસ જીતીને પહેલા ફિલ્ડિંગ કરવાનો નિર્ણય લીધો. પહેલી બેટિંગ કરતા, મુંબઈ ઈન્ડિયન્સે 6 વિકેટ ગુમાવીને 179 રન બનાવ્યા. મુંબઈની શરૂઆત ખરાબ રહી, પહેલી વિકેટ 17 રન પર પડી
મુંબઈની શરૂઆત સારી રહી ન હતી. પહેલી વિકેટ 17 રન પર પડી. પ્રથમ બેટિંગ કરતી વખતે, ઓપનર એમેલિયા કેર નવ બોલમાં એક ચોગ્ગાની મદદથી પાંચ રન બનાવ્યા બાદ રન આઉટ થઈ ગઈ. આ પછી, હેલી મેથ્યુઝે નતાલી સીવર બ્રન્ટ સાથે મળીને ઇનિંગ્સની કમાન સંભાળી અને બંને વચ્ચે 25 બોલમાં 29 રનની ભાગીદારી થઈ. હીલી 27 રન બનાવીને આઉટ થઈ ગઈ. આ પછી, હરમનપ્રીત અને બ્રન્ટ વચ્ચે ત્રીજી વિકેટ માટે 59 રનની ભાગીદારી થઈ જેને ગાર્ડનરે તોડી નાખી. બ્રન્ટ 31 બોલમાં છ ચોગ્ગાની મદદથી 38 રન બનાવીને આઉટ થઈ. ત્યારબાદ હરમનપ્રીત કૌરે અમનજોત કૌર સાથે મળીને ચોથી વિકેટ માટે 19 બોલમાં 33 રનની ભાગીદારી કરી. હરમનપ્રીતે 33 બોલમાં નવ ચોગ્ગાની મદદથી 54 રનની ઇનિંગ રમી. આ ઉપરાંત મુંબઈ તરફથી યાસ્તિકા ભાટિયાએ 13 રન બનાવ્યા, જ્યારે સજીવન સજના 11 રન બનાવીને અણનમ રહ્યા. ગુજરાત જાયન્ટ્સે 92 રનમાં 6 વિકેટ ગુમાવી દીધી
180 રનના ટાર્ગેટને ચેઝ કરવા ઉતરેલી ગુજરાતની બેટિંગ સારી રહી ન હતી અને તેમણે 92 રનમાં 6 વિકેટ ગુમાવી દીધી હતી. ત્યારબાદ ફુલમાલીએ આક્રમક બેટિંગ કરી અને સાતમી વિકેટ માટે સિમરન શેખ સાથે 23 બોલમાં 50 રનની ભાગીદારી કરી. આ દરમિયાન ફુલમાલીએ 22 બોલમાં પોતાની અડધી સદી પૂરી કરી. જોકે, અમેલિયા કેરે ફુલમાલીની વિકેટ લઈને મુંબઈને મેચમાં પાછું લાવ્યું. ફુલમાલી સિવાય અન્ય કોઈ બેટર મોટી ઇનિંગ્સ રમી શક્યા નહીં, જેના કારણે ગુજરાતને હારનો સામનો કરવો પડ્યો. ફુલમાલી ઉપરાંત, ગુજરાત તરફથી હરલીન દેઓલે 24 રન બનાવ્યા, જ્યારે ફોબી લિચફિલ્ડે 22, સિમરન શેખે 18, કાશ્વી ગૌતમે 10, ડિઆન્ડ્રા ડોટિને 10 અને પ્રિયા મિશ્રાએ 1 રન બનાવ્યો.
મુંબઈ તરફથી મેથ્યુઝ અને કેરે ત્રણ-ત્રણ વિકેટ લીધી. શબનમ ઇસ્માઇલે બે વિકેટ અને સંસ્કૃતિ ગુપ્તાએ એક વિકેટ લીધી.