વાપી GIDCના ચાર રસ્તા પાસે ગઈ રાતે ગમખ્વાર અકસ્માતની ઘટના સર્જાઈ હતી. પૂરઝડપે આવતી રિક્ષા એક ટ્રેલર સાથે અથડાઈ હતી, જેથી ગંભીર ઈજા પહોંચતાં રિક્ષાચાલકનું ઘટનાસ્થળે જ મોત થયું હતું, જ્યારે રિક્ષામાં સવાર 5 મુસાફરને ઈજા પહોંચી છે. સામેથી આવતા ટ્રેલર સાથે રિક્ષા ધડાકાભેર અથડાઈ
વાપી GIDCમાં બનેલી આ અકસ્માતની ઘટના CCTVમાં પણ કેદ થઈ છે, જેમાં જોઈ શકાય છે કે પૂરઝડપે આવી રહેલા રિક્ષાચાલકે અચાનક સ્ટીયરિંગ પરનો કાબૂ ગુમાવી દીધો હતો, જેથી રિક્ષા સામેથી આવી રહેલા ટ્રેલર સાથે ધડાકાભેર અથડાઈ હતી. આ અકસ્માતની ઘટનાને પગલે આસપાસના વિસ્તારમાંથી સ્થાનિક લોકો અને રાહદારીઓ મદદ માટે દોડી આવ્યા હતા. પોલીસે અકસ્માત અંગે ગુનો નોંધી કાર્યવાહી હાથ ધરી
આ ઘટનાની માહિતી મળતાં જ વાપી GIDC પોલીસની ટીમ પણ તાત્કાલિક ઘટનાસ્થળે પહોંચી ગઈ હતી. પોલીસે આ મામલે તપાસ શરૂ કરી છે. નજીકના CCTVમાં કેદ થયેલા ફૂટેજમાં સમગ્ર ઘટના સ્પષ્ટપણે જોઈ શકાય છે. આ ફૂટેજ પોલીસની તપાસમાં મહત્ત્વની કડી બની રહેશે. પોલીસે અકસ્માત અંગે ગુનો નોંધી કાયદેસરની કાર્યવાહી શરૂ કરી છે. સિદ્ધપુરમાં ટ્રેલર-બાઇક વચ્ચે અકસ્માતમાં યુવકનું મોત
વલસાડ ઉપરાંત સિદ્ધપુરમાં પણ આજે અકસ્માતની ઘટના સામે આવી હતી. બાઈક પર જઈ રહેલા યુવકને ટ્રેલરે અડફેટે લીધો હતો. ટ્રેલરના ટાયર નીચે આવી જતાં યુવકનું ઘટનાસ્થળે જ મોત થયું હતું.
પૂરઝડપે આવતી રિક્ષા ટ્રેલર સાથે અથડાઈ, CCTV:રિક્ષાચાલકનું મોત, 5 મુસાફરને ઈજા, વાપી GIDCમાં ગમખ્વાર અકસ્માત
