વાપીના સ્પેશિયલ જજ ટી.વી. આહુજાએ એક મહત્વપૂર્ણ ચુકાદો આપ્યો છે. તેમણે 17 વર્ષની સગીરા સાથે દુષ્કર્મ આચરનાર આરોપીની જામીન અરજી નામંજૂર કરી છે. આ નિર્ણય એવા સમયે આવ્યો છે જ્યારે પીડિતાએ આરોપીને જામીન આપવામાં વાંધો ન હોવાનું એફિડેવિટ આપ્યું હતું. આરોપી ઉર્જિત ઉર્ફે ઉદય મુકેશભાઈ પટેલે ફેબ્રુઆરી 2024થી એપ્રિલ 2024 દરમિયાન સગીરાને લગ્નનું વચન આપી વારંવાર દુષ્કર્મ આચર્યું હતું. આ દરમિયાન સગીરા ગર્ભવતી બની હતી. તેણે 27 ડિસેમ્બર 2024ના રોજ એક બાળકીને જન્મ આપ્યો હતો. ભીલાડ પોલીસે આરોપીની ધરપકડ કરી તેની સામે ચાર્જશીટ દાખલ કરી હતી. આરોપીએ બીજી વખત રેગ્યુલર જામીન માટે અરજી કરી હતી. જજે ડી.જી.પી. અનિલ ત્રિપાઠીની દલીલો ગ્રાહ્ય રાખીને આ અરજી નામંજૂર કરી છે. આરોપી વલસાડ જિલ્લાના ઉમરગામ તાલુકાના કચીગામનો રહેવાસી છે. તેણે સગીરાને લગ્નના વચનો આપ્યા હતા, પરંતુ બાળકીના જન્મ બાદ તેણે સગીરાને સ્વીકારવાની ના પાડી દીધી હતી. આ પછી સગીરાએ તેની વિરુદ્ધ ફરિયાદ નોંધાવી હતી.
