બાળકો માટે DCPની અગત્યની સલાહ:’ઓનલાઇન ગેમિંગ, સોશિયલ મીડિયા અને નશાથી દૂર રહો, નશો કરવો જ હોય તો દેશની સેવાનો કરો’

સુરત શહેરના ડેપ્યુટી પોલીસ કમિશનર વિજયસિંહ ગુર્જરે બાળકો અને યુવાનોને ઓનલાઇન ગેમિંગ અને સોશિયલ મીડિયા પરથી દૂર રહેવાની કડક સલાહ આપી છે. તેમણે ખાસ કરીને ધ્યાને લાવ્યું કે આ દિવસોમાં અનેક બાળકો ગેમિંગની આટલી હદે આદત પાડી રહ્યા છે કે તેમના જીવન પર નકારાત્મક અસર પડી રહી છે, તો કેટલાક બાળકો તો આ કારણે આત્મહત્યા પણ કરી ચૂક્યા છે. નશા નહીં, દેશ સેવાનો નશો હોવો જોઈએ
ડીસીપી વિજયસિંહ ગુર્જરે એક કાર્યક્રમમાં જણાવ્યું કે, “બાળકો કોઈપણ પ્રકારના નશાથી દૂર રહે, અને જો કોઈ નશો કરવો જ હોય, તો તે માત્ર દેશસેવાનો નશો હોવો જોઈએ.” તેમણે બાળકોને પ્રેરણા આપતા કહ્યું કે જીવન આનંદમય બનાવવું હોય તો સારા મિત્રો બનાવો, સારા વિચારો અપનાવો અને ભણતરમાં એકાગ્રતા રાખો. ગેમ્સ અને સોશિયલ મીડિયાના આકર્ષણમાં ફસાઈ જવાથી બાળકનું ભવિષ્ય બગડી શકે છે. સોશિયલ મીડિયાની અસરો
તેમણે વધુમાં જણાવ્યું કે, આજના યુવાનો માટે સોશિયલ મીડિયા મોટા પ્રમાણમાં વ્યસનરૂપ બની ગયું છે. “દસથી ચાલીસ વર્ષના લોકો સરેરાશ છ કલાક ઓનલાઈન રહે છે, જેમાંથી ત્રણથી ચાર કલાક ફક્ત બિનજરૂરી રીલ્સ અને વીડિયો જોવામાં વેડફાઈ જાય છે, જે મગજમાં કચરાપટ્ટી નાખે છે. ગુર્જરે આ પ્રકારની બિનઉપયોગી પ્રવૃત્તિઓથી દૂર રહેવાનો આગ્રહ કર્યો. બાળકો માટે ખાસ સંદેશ
તેમણે વિદ્યાર્થીઓને અભ્યાસમાં વધુ દબાણ ન લેવાની સલાહ આપતા કહ્યું, “તમારા કોન્સેપ્ટને સમજો અને જે શ્રેષ્ઠ આપી શકો તે જ કરો. જીવન ખૂબસૂરત છે, લાંબું છે, તેનો આનંદ માણો.” આજના યુગમાં ગેમિંગ અને સોશિયલ મીડિયાની લત જોખમી બની રહી છે. ડીસીપી ગુર્જરની આ સલાહ એ દરેક માટે મહત્વપૂર્ણ છે, જે પોતાનું ભવિષ્ય ઉજ્જવળ અને ઉત્તમ બનાવવા ઈચ્છે છે.