મણિપુર સહિત 3 રાજ્યોમાં AFSPA 6 મહિના માટે લંબાવાયો:હિંસા અને અશાંતિને કારણે ગૃહ મંત્રાલયનો નિર્ણય, સેના ગમે ત્યારે કોઈની પણ અટકાયત કરી શકે

કેન્દ્ર સરકારે મણિપુર, નાગાલેન્ડ અને અરુણાચલ પ્રદેશના કેટલાક ભાગોમાં સશસ્ત્ર દળો વિશેષ સત્તા અધિનિયમ (AFSPA) છ મહિના માટે લંબાવ્યો છે. ગૃહ મંત્રાલયે એક સૂચના જારી કરીને આ માહિતી આપી. ગૃહ મંત્રાલયના જણાવ્યા અનુસાર, મણિપુરમાં ચાલી રહેલી હિંસાને કારણે કાયદો અને વ્યવસ્થાની સ્થિતિની સમીક્ષા કર્યા પછી આ નિર્ણય લેવામાં આવ્યો છે. 1 એપ્રિલ, 2025થી આગામી છ મહિના માટે 13 પોલીસ સ્ટેશનોના અધિકારક્ષેત્ર સિવાય સમગ્ર મણિપુર રાજ્યમાં AFSPA અમલમાં રહેશે. અગાઉ સપ્ટેમ્બર 2024 માં, મણિપુરના 6 જિલ્લાઓમાં છ મહિના માટે AFSPA લાગુ કરવામાં આવ્યો હતો. આ વર્ષે 31 માર્ચે તે સમાપ્ત થઈ રહ્યું હતું, પરંતુ રાજ્યમાં ચાલી રહેલી હિંસાને કારણે હવે આ નિર્ણય લેવામાં આવ્યો છે. નાગાલેન્ડ અને અરુણાચલના કેટલાક વિસ્તારોમાં અશાંતિને કારણે AFSPA લાગુ કરવામાં આવ્યો
સૂચના અનુસાર, નાગાલેન્ડના દિમાપુર, નિઉલેન્ડ, ચુમોઉકેડિમા, મોન, કિફિરે, નોકલાક, ફેક અને પેરેન જિલ્લાઓને અશાંત વિસ્તારો તરીકે જાહેર કરવામાં આવ્યા છે. આ ઉપરાંત, કોહિમા, મોકોકચુંગ, લોંગલેંગ, વોખા અને ઝુન્હેબોટો જિલ્લાના કેટલાક પોલીસ સ્ટેશન વિસ્તારોનો પણ સમાવેશ કરવામાં આવ્યો છે. અહીં પણ AFSPA 1 એપ્રિલ, 2025થી આગામી છ મહિના સુધી અમલમાં રહેશે. તે જ સમયે, અરુણાચલ પ્રદેશના તિરાપ, ચાંગલાંગ અને લોંગડિંગ જિલ્લાઓ તેમજ ત્રણ પોલીસ સ્ટેશન વિસ્તારોમાં AFSPA છ મહિના માટે લંબાવવામાં આવ્યો છે. AFSPA હેઠળ વોરંટ વિના ધરપકડ કરવાનો અધિકાર
AFSPA ફક્ત અશાંત વિસ્તારોમાં જ લાગુ કરવામાં આવે છે. આ સ્થળોએ, સુરક્ષા દળો વોરંટ વિના કોઈપણની ધરપકડ કરી શકે છે. ઘણા કિસ્સાઓમાં, બળનો ઉપયોગ પણ થઈ શકે છે. આ કાયદો 11 સપ્ટેમ્બર 1958ના રોજ ઉત્તર-પૂર્વમાં સુરક્ષા દળોની સુવિધા માટે પસાર કરવામાં આવ્યો હતો. 1989માં, જમ્મુ અને કાશ્મીરમાં આતંકવાદમાં વધારો થવાને કારણે, 1990માં અહીં પણ AFSPA લાગુ કરવામાં આવ્યો. કેન્દ્ર સરકાર નક્કી કરે છે કે કયા વિસ્તારોને અશાંત વિસ્તારો જાહેર કરવામાં આવશે.