ભાસ્કર એનાલિસિસ:એપ્રિલમાં ગરમી 42 ડિગ્રી પાર જશે, 8 દિવસ હીટવેવની શક્યતા, માર્ચમાં કચ્છ-સૌરાષ્ટ્રમાં 6 દિવસ હીટવેવ રહ્યો

રાજ્યમાં માર્ચ મહિનામાં સામાન્ય રીતે અડધા દિવસથી બે દિવસ હીટવેવ રહેતો હોય છે. પરંતુ આ વખતે કચ્છ અને સૌરાષ્ટ્રમાં 6 દિવસ હીટવેવ રહ્યો. જે દેશના અન્ય વિસ્તારો કરતાં સૌથી વધુ છે. માર્ચમાં સામાન્ય રીતે 2 મીમી વરસાદ થવાની શક્યતા હોય છે. પરંતુ રાજ્યના કોઈપણ વિસ્તારમાં વરસાદ પડ્યો નથી. ભારતીય હવામાન વિભાગે સોમવારે એપ્રિલથી જૂન સુધીના હવામાનનું અનુમાન જાહેર કર્યું. જેમાં જણાવાયું કે, આગામી ત્રણ મહિનામાં રાજ્યમાં દિવસ અને રાતનું તાપમાન સામાન્ય કરતાં વધુ રહેશે. સાથે વરસાદ પણ સામાન્ય કરતાં વધુ પડી શકે છે. એટલે કે, ગરમીના દરેક રાઉન્ડ સાથે વરસાદની શક્યતા રહેશે. એપ્રિલમાં સામાન્ય રીતે તાપમાન 30.3 થી 40.4 ડિગ્રી રહે છે. પરંતુ આ વખતે એપ્રિલમાં તાપમાન 1 થી 3 ડિગ્રી વધુ રહી શકે છે. એટલે કે, પારો 42 ડિગ્રી વટાવી શકે છે. કચ્છ, સૌરાષ્ટ્ર, ઉત્તર ગુજરાતના સરહદી જિલ્લાઓ અને દક્ષિણ ગુજરાતમાં ગરમી વધુ રહેશે. હવામાન વિભાગના અનુમાન મુજબ, એપ્રિલથી જૂન દરમિયાન સામાન્ય રીતે હીટવેવ અડધા દિવસથી 6 દિવસ રહેતો હોય છે. તેની સામે આગામી ત્રણ મહિનામાં 10 દિવસ હીટવેવ ફૂંકાઈ શકે છે. એપ્રિલમાં સામાન્ય રીતે અડધા દિવસથી 2 દિવસ હીટવેવ રહેતી હોય છે. પરંતુ ચાલુ મહિને 8 દિવસ હીટવેવ રહેવાની શક્યતા છે. હીટવેવનો પ્રકોપ દક્ષિણ અને મધ્ય-પૂર્વ ગુજરાત ઉપરાંત ભાવનગર, અમરેલી, બોટાદ, ગીરસોમનાથ, સુરેન્દ્રનગર, મોરબી અને કચ્છમાં વધુ રહી શકે છે. બીજી તરફ, રાજ્યના મોટાભાગના વિસ્તારોમાં એપ્રિલમાં પણ કમોસમી વરસાદની શક્યતા છે. આ શક્યતા 33 ટકાથી 55 ટકા સુધીની છે. જેમાં ઉત્તર, મધ્યપૂર્વ અને સૌરાષ્ટ્રના કેટલાક વિસ્તારોમાં વરસાદની શક્યતા વધુ છે. 85% વિસ્તારમાં સામાન્યથી વધુ ગરમી પડશે
ભારતીય હવામાન વિભાગની આગાહી અનુસાર એપ્રિલથી જૂન સુધીમાં દેશના 85 ટકા વિસ્તારમાં આકરી ગરમી નોંધાશે. આ ગાળામાં દેશના 9 રાજ્યમાં લૂના દિવસોની સંખ્યા 6થી 11 જેટલી રહી શકે છે. હવામાન વિભાગના જણાવ્યા પ્રમાણે માર્ચ મહિનામાં ગુજરાત અને ઓડિશામાં 3થી 6 દિવસ સુધી સતત હીટવેવ ફૂંકાયો હતો. જો કે રાહતની વાત એ છે કે આ વરસે ચોમાસા આડે અવરોધ નથી. એપ્રિલ 2025ની ગરમીનું કેલેન્ડર; સામાન્ય રીતે 6 દિવસ હીટવેવ સામે ચાલુ વર્ષે 10 દિવસ હીટવેવ પ્રથમ સપ્તાહ : માવઠાંના કારણે 3 એપ્રિલ સુધી ગરમી 40 ડિગ્રીથી નીચે રહી શકે છે. 4 થી 10 એપ્રિલની વચ્ચે 38 થી 42 ડિગ્રીની વચ્ચે ગરમી પડી શકે છે. મધ્ય-પૂર્વ ગુજરાત બાદ કરતાં સમગ્ર રાજ્યમાં ગરમીનું જોર વધુ રહી શકે છે. બીજું સપ્તાહ : 11 થી 17 એપ્રિલની વચ્ચે 38 થી 42 ડિગ્રીની વચ્ચે ગરમી રહી શકે છે. ઉત્તર ગુજરાતના પાટણ અને બનાસકાંઠા, કચ્છ અને સૌરાષ્ટ્ર, મધ્ય-પૂર્વ ગુજરાતમાં અમદાવાદ, આણંદ, દાહોદ, જ્યારે દક્ષિણ ગુજરાતમાં તાપી, નવસારી, સુરત, ડાંગ અને વલસાડમાં ગરમીનું જોર વધુ રહી શકે છે. કેટલાક વિસ્તારોમાં ગરમી 42 ડિગ્રી વટાવી શકે છે. ત્રીજું સપ્તાહ : 18 થી 24 એપ્રિલની વચ્ચે 36 થી 42 ડિગ્રીની વચ્ચે ગરમી રહી શકે છે. કચ્છ, ભાવનગર, અમરેલી, ગીર સોમનાથ તેમજ બનાસકાંઠા જિલ્લામાં ગરમીનું જોર વધુ રહી શકે છે. ચોથું સપ્તાહ : એપ્રિલ મહિનાના અંતમાં આકરી ગરમીમાંથી સામાન્ય રાહત મળવાની સંભાવના છે. હવામાન વિભાગની આગાહી અનુસાર 25થી 30 એપ્રિલ દરમિયાન રાજ્યભરમાં ગરમીના જોરમાં નોંધપાત્ર ઘટાડો થઈ શકે છે. જો કે મે મહિનામાં તાપમાન ઊંચકાશે.