ગોધરા શહેરના એક ચર્ચિત હત્યા કેસમાં સેશન્સ કોર્ટે બે આરોપીઓની જામીન અરજી નકારી કાઢી છે. આ કેસ ગોધરા બી ડિવિઝન પોલીસ સ્ટેશનમાં નોંધાયેલો છે. ગત વર્ષે 22 નવેમ્બરે મોહસીન મોહમદ હનીફ ભાગલીયા ઉર્ફે ચુચલાની હત્યા કરવામાં આવી હતી. આરોપીઓએ મૃતકને માર મારીને ગંભીર ઈજાઓ પહોંચાડી હતી. આ કેસમાં જિલ્લા મેજિસ્ટ્રેટના જાહેરનામાનો પણ ભંગ થયો હતો. આરોપીઓમાં સાજીદ ઈલ્યાસ ભમેડી અને મોહમ્મદ અલી હુસેન રહેમતે જામીન માટે અરજી કરી હતી. બંને આરોપીઓ હાલ ગોધરા સબ જેલમાં છે. પાંચમા એડિશનલ ડિસ્ટ્રિક્ટ જજ પી.એ. માલવીયાની કોર્ટમાં સુનાવણી દરમિયાન પોલીસ ઇન્સપેક્ટર આર.કે. રાજપૂતે એફિડેવિટ રજૂ કરી હતી. જિલ્લા સરકારી વકીલ આર.એસ. ઠાકોરની દલીલો અનુસાર, આરોપીઓનો ગુનાહિત ઇતિહાસ છે અને તેઓ શારીરિક હુમલા તેમજ પશુ સંબંધિત ગુનાઓમાં સંડોવાયેલા છે. કોર્ટે પ્રાથમિક તપાસમાં આરોપીઓની હત્યામાં સંડોવણી જોતાં તેમની જામીન અરજી નકારી કાઢી છે.
