વલસાડ એસપી ડૉ. કરનરાજ વાઘેલાની સૂચના મુજબ SOG પોલીસે વાપીમાં મોટી કાર્યવાહી કરી છે. SOG PI એ.યુ.રોઝના નેતૃત્વમાં ટીમે 18 માર્ચે ચણોદ શાંતિનગરમાં દરોડો પાડ્યો હતો. મંગલાબેન નિરજભાઇ શ્રીવાસ્તવના ઘરમાંથી 10.080 કિલોગ્રામ ગાંજો મળી આવ્યો હતો. આ ગાંજાની કિંમત રૂ. 1,00,800 છે. પોલીસે 7 મોબાઇલ ફોન સહિત કુલ રૂ. 1,87,850નો મુદ્દામાલ જપ્ત કર્યો છે. પોલીસે આ કેસમાં 6 આરોપીઓની ધરપકડ કરી છે. બે સગીર વયના આરોપીઓને પણ ડિટેઇન કરવામાં આવ્યા છે. તમામ આરોપીઓ હાલ ન્યાયિક કસ્ટડીમાં છે. તપાસમાં બહાર આવ્યું છે કે મંગલાબેને ગાંજાના વેચાણમાંથી મળેલા પૈસાથી વાપી સુલફડ, આંબેડકરનગરમાં બે દુકાનો બનાવી છે. આ દુકાનો 12×18 ફૂટની છે અને તેની કિંમત આશરે રૂ. 5 લાખ છે. DySP બી.એન.દવેના માર્ગદર્શન હેઠળ તપાસ કરતા આ દુકાનો ગેરકાયદે બનાવવામાં આવી હોવાનું સામે આવ્યું છે. વાપી મહાનગરપાલિકા 19 એપ્રિલે બપોરે 3 વાગ્યે આ ગેરકાયદે બાંધકામ તોડી પાડશે. આરોપીઓ સામે NDPS એક્ટ અને જુવેનાઇલ જસ્ટીસ એક્ટ હેઠળ ગુનો નોંધવામાં આવ્યો છે.
