અમદાવાદ શહેરમાં લિફ્ટ બંધ થઈ જવાના કારણે લોકો ફસાયા હોવાની ઘટના વારંવાર સામે આવી રહી છે. થોડા દિવસો પહેલાં વસ્ત્રાપુર અને નરોડા વિસ્તારમાં લિફ્ટ બંધ થઈ જતાં લોકોને રેસ્ક્યૂ કરી બહાર કઢાયા હતા. ત્યારે આજે નરોડા વિસ્તારમાં લિફ્ટ ચોથા માળેથી સીધી બેઝમેન્ટમાં ઉતરી ગઈ હતી અને સ્થાનિકો ફસાયાની ઘટના બની હતી. જો કે, સ્થાનિકોએ તાત્કાલિક તમામ લોકોનું રેસ્ક્યૂ કરીને બહાર કાઢ્યા હતા. અંદર બે બાળકો, મહિલા સહિત 5 લોકો ફસાયા હતા. જે સમગ્ર ઘટના CCTVમાં કેદ થઈ હતી. લિફ્ટમાં ફસાયેલાં તમામનું સ્થાનિકોએ રેસ્ક્યૂ કર્યું
મળતી માહિતી મુજબ, અમદાવાદના નરોડા વિસ્તારમાં આવેલા દેવાશિષ ફ્લેટમાં ચોથા માળેથી લિફ્ટ સીધી બેઝમેન્ટમાં ઉતરી ગઈ હોવાની ઘટના બની હતી. લિફ્ટમાં બે બાળકો, ચાર મહિલાઓ અને એક પુરુષ એમ સાત લોકો ફસાયા હતા. સ્થાનિક લોકો તાત્કાલિક દોડી આવ્યા હતા અને લિફ્ટનો દરવાજો તોડી તમામ લોકોને બહાર કાઢ્યા હતા. સ્થાનિક લોકોએ લિફ્ટના મેન્ટેનન્સને લઈને સવાલો ઊભા કર્યા હતા. ચોથા માળેથી તેઓ નીચે આવી રહ્યા હતા ત્યારે ચોથા માળ બાદ અચાનક જ લિફ્ટ સીધી બેઝમેન્ટમાં પડી હતી. લિફ્ટમાં મહિલા સાથે રહેલું બાળક પણ રડવા લાગ્યું હતું. વસ્ત્રાપુરમાં આવેલી અંજલિ હોટલમાં પણ વહેલી સવારે લિફ્ટ બંધની ઘટના
ઘટનાની જાણ થતા સ્થાનિક લોકો તાત્કાલિક નીચે દોડી આવ્યા હતા. લિફ્ટનો દરવાજો થોડો ખુલ્લો હતો જેના કારણે લોકોએ દરવાજાને તોડીને ત્રણ જ મિનિટમાં તમામ લોકોને સહીસલામત બહાર કાઢી લીધા હતા. ઘટનામાં કોઈ મોટી જાનહાનિ થઈ નથી, પરંતુ લિફ્ટમાં ફસાયેલી ચાર મહિલાઓ અને બાળકો ખૂબ જ ગભરાઈ ગયાં હતાં. આ ઘટના બાદ સ્થાનિક લોકોમાં ભારે રોષ ફેલાયેલો હતો. તો બીજી તરફ વસ્ત્રાપુર વિસ્તારમાં હિમાલયા મોલની સામે આવેલી અંજલિ હોટલમાં પણ વહેલી સવારે લિફ્ટ બંધ થઈ ગઈ હતી. જેમાં સાતેક લોકો ફસાયા હતા. ફાયર બ્રિગેડને જાણ કરવામાં આવતા ફાયર બ્રિગેડની ટીમ ઘટનાસ્થળે પહોંચી હતી અને ફાયરની ટીમે તમામ લોકોને સહીસલામત બહાર કાઢી લીધા હતા.
ચોથા માળેથી લિફ્ટ સડસડાટ બેઝમેન્ટમાં ઉતરી, CCTV:બે બાળકો, ચાર મહિલા સહિત ફસાયેલા સાત લોકોને સ્થાનિકોએ ત્રણ મિનિટમાં રેસ્ક્યૂ કર્યા
