સ્પીડ બ્રેકર ઠેકાડતો ST બસનો ડ્રાઇવર સસ્પેન્ડ:ડ્રાઈવરની બેદરકારીને લીધે વૃદ્ધ મુસાફરને મણકામાં ફ્રેકચર આવ્યા બાદ કાર્યવાહી; EV ટ્રાન્સ એજન્સીને નોટિસ ફટકારવામાં આવી

15 એપ્રિલ 2025એ રાજકોટ- જૂનાગઢ રૂટની ઇલેક્ટ્રિક બસના ડ્રાઇવરે પી.ડી. માલવીયા કોલેજથી ગોંડલ ચોકડી જતા રસ્તામાં વચ્ચે આવતું સ્પીડ બ્રેકર ફૂલ સ્પીડમાં ઠેકાડતા બસમાં બેઠેલા પેસેન્જર્સ ઉછળ્યા હતા. તેમાં એક વૃદ્ધ મુસાફરને તો કરોડરજ્જુ દબાઇ જતા મણકાનું ફ્રેક્ચર થઇ જતા 108 એમ્બ્યુલન્સમાં સારવાર અર્થે હોસ્પિટલ ખસેડી ઓપરેશન કરવું પડ્યું હતું. દરમિયાન આ મામલે ડ્રાઇવર ધવલ ગોસ્વામીને 10 દિવસ માટે કપાત પગારે સસ્પેન્ડ કરાયો છે તથા એજન્સી EV ટ્રાન્સને નોટિસ ફટકારવામાં આવી છે. ઇલેક્ટ્રિક બસની સંચાલક એજન્સી ઇવી ટ્રાન્સને નોટિસ
રાજકોટ એસટી ડિવિઝનના વિભાગીય નિયામક જે.બી.કલોતરાએ દિવ્ય ભાસ્કર ડિજિટલને જણાવ્યું હતું કે, બેદરકારી ભર્યું ડ્રાઇવિંગ કરવા બદલ રાજકોટ-જૂનાગઢ રૂટની ઇલેક્ટ્રિક બસના ડ્રાઇવરને તાત્કાલિક અસરથી સસ્પેન્ડ કરવામાં આવ્યો છે. જેને કપાત પગારે આગામી 10 દિવસ માટે સસ્પેન્ડ કરાયો છે અને ઇલેક્ટ્રિક બસની સંચાલક એજન્સી ઇવી ટ્રાન્સને નોટિસ ફટકારી છે. તદઉપરાંત રાજકોટથી ઉપડતી તેમજ આવતી જતી તમામ ઇલેક્ટ્રિક બસના ડ્રાઇવરોને આવા બનાવો ન બને તેની તકેદારી રાખી કાળજીપૂર્વક ડ્રાઇવિંગ કરવા સૂચના અપાઇ છે. 88 ડ્રાઇવરો EV ટ્રાન્સ એજન્સી હેઠળ ફરજ પર
રાજકોટ એસટી વિભાગમાં 823 ડ્રાઇવરો છે. જ્યારે 26 ડ્રાઇવર નિવૃત્તિ બાદ પણ 11 માસના કરાર ઉપર ફરજ બજાવી રહ્યા છે. આ ઉપરાંત રાજકોટથી જામનગર, જુનાગઢ અને મોરબી એમ 3 રૂટ પરની 23 બસોમાં 48 અને વોલ્વોની 20 બસોના 40 ડ્રાઇવર કોન્ટ્રાક્ટ આધારિત છે. એટલે કે 88 ડ્રાઇવરો EV ટ્રાન્સ એજન્સી હેઠળ ફરજ બજાવી રહ્યા છે. સ્પીડ બ્રેકર ઠેકાડતા વૃદ્ધને મણકામાં ફ્રેકચર
અત્રે ઉલ્લેખનીય છે કે, રાજકોટ જિલ્લાના ઉપલેટા તાલુકામાં રહેતા અને ખેતી કામ કરતા 62 વર્ષિય ધીરજલાલ ઓધવજીભાઈ સોલંકીએ માલવિયા નગર પોલીસ મથકમાં 20 એપ્રિલના નોંધાવેલી ફરિયાદમાં જણાવ્યું કે, 15 એપ્રિલના પોતે અને તેમની દીકરી રાજકોટથી જુનાગઢ જતી ઇલેક્ટ્રીક એસટી બસ GJ-01-KT-0403માં બેઠા હતા. જે દરમિયાન પીડીએમ કોલેજથી આગળ ગોંડલ રોડ ઉપર સ્પીડ બ્રેકર આવ્યું હોવા છતાં ડ્રાઇવરે બસ ધીમી પાડી ન હતી અને સ્પીડ બ્રેકર ઠેકાડ્યું હતું. જેના લીધે કમરમાં દુખાવો થતાં તાત્કાલિક 108 એમ્બ્યુલન્સ મારફત હોસ્પિટલમાં ખસેડવામાં આવ્યો હતો અને ત્યારબાદ તબીબોએ કરેલી તપાસમાં સામે આવ્યું કે મણકામાં ફ્રેક્ચર થઈ ગયું હતું. ડ્રાઇવરને દસ દિવસ માટે સસ્પેન્ડ કરવાનો નિર્ણય
આ ઘટના બાદ મોડે મોડેથી જાગેલા એસટીના વિભાગીય નિયામક દ્વારા ખાનગી કંપનીના કોન્ટ્રાક્ટ ઉપરના ડ્રાઇવરને દસ દિવસ માટે સસ્પેન્ડ કરવાનો નિર્ણય લીધો છે અને એજન્સીને નોટિસ પણ આપી છે.