વલસાડ જિલ્લામાં ગરમીનું પ્રમાણ વધી રહ્યું છે. ધરમપુર અને કપરાડા તાલુકામાં મહત્તમ તાપમાન 40 ડિગ્રી સુધી પહોંચશે. વાપી અને પારડીમાં 37 ડિગ્રી, વલસાડમાં 36 ડિગ્રી અને ઉમરગામમાં 35 ડિગ્રી તાપમાન નોંધાશે. લઘુતમ તાપમાનની વાત કરીએ તો કપરાડામાં 24 ડિગ્રી, ધરમપુરમાં 25 ડિગ્રી જ્યારે વલસાડ, પારડી, ઉમરગામ અને વાપીમાં 26 ડિગ્રી રહેશે. ગઈકાલની સરખામણીમાં જિલ્લામાં 2 ડિગ્રી તાપમાનનો વધારો નોંધાયો છે. આ સિઝનનો આજે સૌથી ગરમ દિવસ છે. વહીવટી તંત્રએ બપોરે 12થી 5 દરમ્યાન લોકોને બિનજરૂરી બહાર ન નીકળવા સૂચના આપી છે. નાગરિકોને સૂતરાઉ કપડાં પહેરવા અને પાણીનો વધુ ઉપયોગ કરવા જણાવ્યું છે. લોકોને ઠંડા પાણી, છાશ, લીંબુ પાણી, લસ્સી અને ORS વાળા પાણીનો ભરપૂર ઉપયોગ કરવાની સલાહ આપવામાં આવી છે. વલસાડ તાલુકામાં દરિયા કિનારો નજીક હોવાથી ગરમીમાં થોડી રાહત રહે છે. પશુપાલકોને મૂંગા પશુ-પક્ષીઓ માટે પાણી અને છાયાની વ્યવસ્થા કરવા પણ અપીલ કરવામાં આવી છે.
