રતન ટાટાનું અવસાન 9 ઓક્ટોબરે થયું હતું. હાલમાં જ અમિતાભ બચ્ચને તેમના શો ‘કૌન બનેગા કરોડપતિ 16’માં રતન ટાટાને યાદ કર્યા હતા. અમિતાભ બચ્ચને કહ્યું કે, એકવાર અમે બંને એક જ ફ્લાઈટમાં લંડન જઈ રહ્યા હતા. તે સમયે તેમની પાસે રોકડ પૈસા ન હતા તેથી તેમણે મારી પાસે થોડા પૈસા માંગ્યા. અમિતાભ બચ્ચને કહ્યું કે, હું કહી શકતો નથી કે રતન ટાટા કેવા માણસ હતા. ખરેખર તે ખૂબ જ સારા અને સરળ વ્યક્તિ હતા. એકવાર અમે લંડન જતી એક જ ફ્લાઈટમાં બેઠા હતા. તેઓ લંડનના હીથ્રો એરપોર્ટ પર સાથે ઉતર્યા હતા. પરંતુ એરપોર્ટ પરથી તેમને લેવા આવેલા લોકો ત્યાંથી નીકળી ગયા હતા. આવી સ્થિતિમાં, મેં તેમને બાજુ પર ઉભેલા જોયા અને તે પછી કોઈને ફોન કરવા માટે ફોન બૂથ પર ગયા. પણ પછી તે મારી પાસે આવ્યા અને કહ્યું અમિતાભ શું હું તમારી પાસેથી થોડા પૈસા ઉછીના લઈ શકું? મારી પાસે ફોન કરવા માટે પૈસા નથી. મને માનવામાં ન આવ્યું તે કેટલા સામાન્ય વ્યક્તિ હતા. અમિતાભ બચ્ચને વધુમાં કહ્યું, ‘એકવાર મારા મિત્ર અને રતન ટાટાએ એક કાર્યક્રમમાં ભાગ લીધો હતો. તે દરમિયાન રતન ટાટાએ મારા મિત્રને પૂછ્યું હતું કે, શું તમે મને ઘરે મૂકી શકો છો? હું તમારા ઘરની પાછળ રહું છું. મારી પાસે કાર નથી. ‘બિગ બી’ કહે છે કે તે બિલકુલ અવિશ્વસનીય હતું. રતન ટાટા અને અમિતાભ બચ્ચન આ પહેલા પણ સાથે કામ કરી ચુક્યા છે. ટાટાની પ્રોડક્શન કંપની ટાટા ઈન્ફોમીડિયા લિમિટેડએ અમિતાભની ફિલ્મ ઈતબારને ફંડ આપ્યું હતું. પરંતુ, આ ફિલ્મ બોક્સ ઓફિસ પર સફળ રહી ન હતી. રેડિફના એક રિપોર્ટ અનુસાર, ટાટા ગ્રુપને આ ફિલ્મ પર લગભગ 3.5 કરોડ રૂપિયાનું નુકસાન થયું હતું, ત્યાર બાદ તેઓએ ફિલ્મ ઈન્ડસ્ટ્રીમાંથી બહાર નીકળવાનો નિર્ણય લીધો હતો.
