IND Vs SA વચ્ચે આજે બીજી T20:સેન્ટ જ્યોર્જ પાર્ક ખાતે બંને ટીમ બીજી વખત એકબીજાનો સામનો કરશે; SA અહીં 12 વર્ષથી હારી નથી

ભારત અને સાઉથ આફ્રિકા વચ્ચે T-20 સિરીઝની બીજી મેચ આજે ગકેબરહામાં રમાશે. સેન્ટ જ્યોર્જ પાર્ક ક્રિકેટ સ્ટેડિયમમાં ભારતીય સમય અનુસાર સાંજે 7:30 વાગ્યે મેચ શરૂ થશે, ટૉસ સાંજે 7:00 વાગ્યે થશે. ભારતે પ્રથમ મેચ 61 રને જીતી હતી. ચાર મેચની સિરીઝમાં ટીમ 1-0થી આગળ છે. સેન્ટ જ્યોર્જ પાર્કમાં બંને ટીમ બીજી વખત આમને-સામને રમશે. અગાઉ બન્ને વચ્ચે ગયા વર્ષે ડિસેમ્બરમાં રમાઈ હતી. ત્યારે સાઉથ આફ્રિકાએ 5 વિકેટે જીત મેળવી હતી. સાઉથ આફ્રિકાની ટીમ છેલ્લા 12 વર્ષમાં અહીં એકપણ મેચ હારી નથી. અહીં તેમની છેલ્લી હાર 2007માં વેસ્ટ ઈન્ડિઝ સામે થઈ હતી. T20માં ભારતનું સાઉથ આફ્રિકા પર વર્ચસ્વ
બંને વચ્ચે અત્યાર સુધીમાં 28 T-20 મેચ રમાઈ છે. જેમાં ભારતે 16 મેચ જીતી છે અને સાઉથ આફ્રિકાએ 11 મેચ જીતી છે. જ્યારે એક મેચ અનિર્ણિત રહી હતી. ભારતે છેલ્લી વખત T20 સિરીઝ માટે સાઉથ આફ્રિકાનો પ્રવાસ 2023માં કર્યો હતો, જ્યાં બંને ટીમ 1-1થી ડ્રો રમી હતી, જ્યારે એક મેચ વરસાદને કારણે રદ કરવામાં આવી હતી. બંને વચ્ચે અત્યાર સુધીમાં 9 T-20 સિરીઝ રમાઈ છે, જેમાં ભારતે 4 અને સાઉથ આફ્રિકાએ 2 જીતી છે. જ્યારે 3 સિરીઝ ડ્રો રહી હતી. સેમસને પ્રથમ મેચમાં સદી ફટકારી હતી
આ વર્ષે T-20માં સૌથી વધુ રન બનાવવાના મામલે કેપ્ટન સૂર્યકુમાર યાદવ ભારત માટે પ્રથમ સ્થાને છે. તેણે 15 મેચમાં 424 રન બનાવ્યા છે. બીજા નંબર પર રોહિત શર્મા છે, જેણે આ ફોર્મેટમાંથી નિવૃત્તિ લીધી છે. તે જ સમયે, ત્રીજા નંબર પર સંજુ સેમસન છે જે શાનદાર ફોર્મમાં છે. સેમસને પ્રથમ મેચમાં 50 બોલમાં 107 રનની ઇનિંગ રમી હતી. બોલિંગમાં ફાસ્ટ બોલર અર્શદીપ સિંહ ટોપ પર છે. જોકે તેને પ્રથમ મેચમાં માત્ર એક જ વિકેટ મળી હતી. રીઝા હેન્ડ્રિક્સ સાઉથ આફ્રિકા તરફથી સૌથી વધુ રન બનાવનાર ખેલાડી
સાઉથ આફ્રિકાનો ઓપનર રીઝા હેન્ડ્રિક્સ આ વર્ષે ટીમનો સૌથી વધુ રન બનાવનાર ખેલાડી છે. એનરિક નોર્કિયા આ વર્ષે ટીમ માટે સૌથી વધુ વિકેટ લેનાર બોલર છે, પરંતુ તે આ સિરીઝમાં ટીમનો ભાગ નથી. આ સ્થિતિમાં ઓટનેલ બાર્ટમેન સૌથી વધુ વિકેટ લેનાર બોલર છે. જો કે, પ્રથમ મેચમાં, બંને ડિપાર્ટમેન્ટના ટોચના ખેલાડીઓ પ્લેઇંગ-11નો ભાગ ન હતા. પ્રથમ મેચમાં હેનરિક ક્લાસેને ટીમ માટે સૌથી વધુ 25 રન બનાવ્યા હતા. પિચ રિપોર્ટ અને રેકોર્ડ્સ
સેન્ટ જ્યોર્જ પાર્ક ક્રિકેટ સ્ટેડિયમની પિચ શરૂઆતમાં બેટર્સની તરફેણ કરે છે, પરંતુ જેમ જેમ રમત આગળ વધે છે તેમ તે સ્પિન અને ઝડપી બોલરોને અનુકૂળ થવા લાગે છે. અત્યાર સુધી અહીં 4 T-20 ઈન્ટરનેશનલ મેચ રમાઈ છે. તેમાંથી 2 મેચ પ્રથમ બેટિંગ કરનારી ટીમે જીતી છે અને એટલી જ મેચ ચેઝ કરતી ટીમ જીતી છે. અહીં છેલ્લી મેચ ભારત અને સાઉથ આફ્રિકા વચ્ચે રમાઈ હતી. જેમાં સાઉથ આફ્રિકા જીત્યું હતું. વેધર રિપોર્ટ્સ
ભારત અને સાઉથ આફ્રિકા વચ્ચે રમાનારી બીજી T20માં હવામાન સારું રહેશે. વરસાદની કોઈ શક્યતા નથી. તાપમાન 16-21 ડિગ્રી સેલ્સિયસ રહેવાની ધારણા છે. બન્ને ટીમની સંભવિત પ્લેઇંગ-11 ભારત (IND): સૂર્યકુમાર યાદવ (કેપ્ટન), સંજુ સેમસન, અભિષેક શર્મા, તિલક વર્મા, હાર્દિક પંડ્યા, રિંકુ સિંહ, અક્ષર પટેલ, વરુણ ચક્રવર્તી, રવિ બિશ્નોઈ, અર્શદીપ સિંહ અને આવેશ ખાન. સાઉથ આફ્રિકા (SA): એડન માર્કરમ (કેપ્ટન), રેયાન રિકલ્ટન, ટ્રિસ્ટન સ્ટબ્સ, હેનરિક ક્લાસેન (વિકેટકીપર), ડેવિડ મિલર, પેટ્રિક ક્રુગર, માર્કો યાન્સેન, એન્ડીલે સિમેલેન, ગેરાલ્ડ કોત્ઝી, કેશવ મહારાજ અને કબાયોમઝી પીટર.