દાવો- ટ્રમ્પ US આર્મીમાંથી ટ્રાન્સજેન્ડર્સને હાંકી કાઢશે:15 હજાર ટ્રાન્સજેન્ડરો નોકરી ગુમાવી શકે છે, શપથ લેતા જ ઓર્ડર પર હસ્તાક્ષર કરશે?

ડોનાલ્ડ ટ્રમ્પ સત્તા સંભાળ્યા બાદ ટ્રાન્સજેન્ડર સૈનિકોને યુએસ આર્મીમાંથી કાઢી શકે છે. મીડિયા રિપોર્ટ્સમાં દાવો કરવામાં આવ્યો છે કે ટ્રમ્પ 20 જાન્યુઆરીએ શપથ લીધા બાદ આ ઓર્ડર પર હસ્તાક્ષર કરી શકે છે. આ સાથે ભવિષ્યમાં ટ્રાન્સજેન્ડરોને યુએસ આર્મીમાં જોડાવા પર પણ પ્રતિબંધ મુકવામાં આવશે. રિપોર્ટ્સ અનુસાર આ સૈનિકોને મેડિકલી અનફિટ હોવાના કારણે નોકરીમાંથી કાઢી મૂકવામાં આવશે. હાલમાં યુએસ આર્મીમાં 15 હજાર ટ્રાન્સજેન્ડર સૈનિકો છે, જેમને નોકરીમાંથી કાઢી મુકવામાં આવી શકે છે. ટ્રમ્પે ચૂંટણી પ્રચાર દરમિયાન ટ્રાન્સજેન્ડર સમુદાય વિરુદ્ધ નિવેદનો પણ આપ્યા હતા. આ સિવાય ટ્રમ્પની આગામી સરકારમાં રક્ષા મંત્રી બનશે તેવા પિટ હેગસેથે પણ થોડા દિવસો પહેલા કહ્યું હતું કે, સેનામાં મહિલાઓ અને ટ્રાન્સજેન્ડર્સને સામેલ કરવાથી અમેરિકાની સુરક્ષા વ્યવસ્થા નબળી પડી રહી છે. ગત ટર્મમાં પણ પ્રતિબંધ લાદવામાં આવ્યો હતો
તેમના અગાઉના કાર્યકાળ દરમિયાન પણ ડોનાલ્ડ ટ્રમ્પે ટ્રાન્સજેન્ડરોને સેનામાં સામેલ થવા પર પ્રતિબંધ મૂક્યો હતો. જો કે, તે સમયે જેઓ પહેલેથી જ સેનામાં હતા તેમને હટાવવામાં આવ્યા ન હતા. બાદમાં જો બાઈડને રાષ્ટ્રપતિ બન્યા બાદ આ પ્રતિબંધ હટાવી દીધો હતો. યુએસ આર્મીમાં હાલમાં 15 હજાર ટ્રાન્સજેન્ડર સૈનિકોમાંથી 2200એ સર્જરી દ્વારા પોતાનું લિંગ બદલ્યું છે. બાકીના સૈનિકોએ પોતાની ઓળખ ટ્રાન્સજેન્ડર તરીકે નોંધાવી છે. આ વખતે ટ્રમ્પે આ તમામ 15 હજાર ટ્રાન્સજેન્ડર્સને સેનામાંથી હટાવવાની વાત કરી છે. યુનિવર્સિટીઓએ વિદેશી વિદ્યાર્થીઓને પાછા આવવા કહ્યું
અમેરિકાની ઘણી યુનિવર્સિટીઓએ અહીં ભણતા અન્ય દેશોના વિદ્યાર્થીઓને ડોનાલ્ડ ટ્રમ્પના શપથ ગ્રહણ પહેલા પાછા ફરવાનું કહ્યું છે. ડોનાલ્ડ ટ્રમ્પ આવતા વર્ષે 20 જાન્યુઆરીએ રાષ્ટ્રપતિ પદ સંભાળશે. ચૂંટણી પ્રચાર દરમિયાન ટ્રમ્પે ગેરકાયદેસર ઈમિગ્રન્ટ્સને દેશમાંથી બહાર કાઢવા માટે મોટા પાયે અભિયાન ચલાવવાની વાત કરી હતી. બીબીસીના અહેવાલ મુજબ, હાલમાં અમેરિકામાં 4 લાખથી વધુ વિદેશી વિદ્યાર્થીઓ નોંધાયેલા છે જેમની પાસે તેમના દસ્તાવેજો નથી. આવી સ્થિતિમાં તેમને ગેરકાયદે ઈમિગ્રન્ટ્સ વિરુદ્ધ ટ્રમ્પના પગલાંનો સામનો કરવો પડી શકે છે. આ સિવાય ટ્રમ્પ H1-B વિઝા પ્રોગ્રામ સાથે જોડાયેલા નિયમોને વધુ કડક કરી શકે છે. ટ્રમ્પે તેમના છેલ્લા કાર્યકાળ દરમિયાન H-1B માટે યોગ્યતાના માપદંડને કડક બનાવ્યા હતા. આના કારણે H1-B વિઝા રિજેક્ટ થતી અરજીઓની સંખ્યામાં નોંધપાત્ર વધારો થયો છે. 2015 માં H1-B વિઝા સિરીઝમાં ફક્ત 6% અરજીઓ નકારી કાઢવામાં આવી હતી, જ્યારે 2019 માં આ આંકડો વધીને 24% થયો હતો. આ સિવાય ટ્રમ્પના પાછલા કાર્યકાળ દરમિયાન ટુરિસ્ટ અને ટૂંકા ગાળાના વિઝાની પ્રક્રિયા પણ લાંબી થઈ હતી. 2017માં અમેરિકાના ટૂરિસ્ટ વિઝા મેળવવામાં 28 દિવસનો સમય લાગ્યો હતો. 2022માં આ સમયગાળો વધીને 88 દિવસ થઈ ગયો.