સુરતની લો કોલેજમાં ચાલતી પોલમપોલ છતી થઈ:વી.ટી. ચોક્સી લો કોલેજમાં નાપાસ થયેલા વિદ્યાર્થીના બે માર્ક વધારી પાસ કરી દેવાયો, છબરડો બહાર આવતા યુનિ.એ તપાસનો આદેશ આપ્યો

વીર નર્મદ દક્ષિણ ગુજરાત યુનિવર્સિટી સંલગ્ન વી.ટી. ચોકસી લો કોલેજમાં કાયદાની જ અધ્યાપન પરંપરાની મજાક ઉડાવતી ગંભીર ઘટના પ્રકાશમાં આવી છે. એક વિદ્યાર્થીને ગેરકાયદેસર રીતે રેકોર્ડમાં ફેરફાર કરીને ફર્સ્ટ ક્લાસ સાથે પાસ કરાવવામાં આવ્યો છે. આ ઘટના ફક્ત યુનિવર્સિટીની પરીક્ષા સિસ્ટમની પ્રામાણિકતા પર જ નહીં, પણ સંપૂર્ણ શૈક્ષણિક વ્યવસ્થાની નૈતિકતા પર સવાલો ઉઠાવે છે. VNSGUનો નાપાસ વિદ્યાર્થી 6 માસમાં ફર્સ્ટ ક્લાસ આવી જતા વિવાદ સર્જાયો છે. નાપાસ વિદ્યાર્થી ફર્સ્ટ ક્લાસ સાથે પાસ થયો!
એપ્રિલ 2024માં કાયદા ફેકલ્ટીની છઠ્ઠી સેમેસ્ટરની પરીક્ષાઓ યોજાઈ હતી, જેમાંથી એક વિદ્યાર્થી નાપાસ થયો હતો. રિઅસેસમેન્ટ અને રિચેકિંગના પરિણામોમાં પણ વિદ્યાર્થીનું નામ નહીં હતું. પરંતુ અચાનક જ, આ વિદ્યાર્થીના માર્ક્સ સુધારાયા અને તે ફર્સ્ટ ક્લાસ સાથે પાસ થયો. કોલેજ સંચાલકો દ્વારા યુનિવર્સિટીને પત્ર લખીને આ ફેરફાર માટે ભલામણ કરવામાં આવી હતી, જેમાં વિદ્યાર્થીના ઇન્ટરનલ વાયવા માર્ક્સ ગેરકાયદેસર રીતે વધારવામાં આવ્યા હતા. પરીક્ષા વિભાગે રેકોર્ડની યોગ્ય તપાસ કર્યા વિના, સુધારેલા પરિણામો જાહેર કરી દીધા. ગેરકાયદેસર રીતે માર્ક્સ વધારવાના સબૂત
વિદ્યાર્થીને પ્રોફેશનલ એથિક્સની આંતરિક વાયવા પરીક્ષામાં 20માંમાંથી 6 માર્ક્સ મળ્યા હતા, જ્યારે પાસ થવા માટે 8 માર્ક્સ ફરજિયાત હતા. સંચાલકોએ આ માર્ક્સમાં ઑવરરાઈટ કરીને 8 કરી નાખ્યા અને યુનિવર્સિટી પાસે ભૂલ તરીકે રજૂ કર્યું. આ પદ્ધતિથી પરિણામમાં ફેરફાર કરીને વિદ્યાર્થીને ફર્સ્ટ ક્લાસનો દરજ્જો આપ્યો. શિક્ષણ પ્રણાલી સામે મોટો પ્રશ્ન
આ ઘટનાથી એ સ્પષ્ટ થાય છે કે કાયદાની કોલેજમાં નિયમિત અને ગેરકાયદેસર રીતે માર્ક્સ વધારવાનો ભયાનક તંત્ર કાર્યરત છે. એક વિદ્યાર્થી માટે આવી વ્યવસ્થાનો દુરુપયોગ થયો હોય ત્યારે અગાઉના વિદ્યાર્થીઓ માટે પણ ગેરરીતિઓ થઈ હોવાની પૂરી શક્યતા છે. કુલપતિએ તપાસનો આદેશ આપ્યો
કુલપતિ કિશોરસિંહ ચાવડા એ જણાવ્યું હતું કે, વી.ટી ચોકસી લો કોલેજમાં સચાલકોનું ઓફીસ રેકોર્ડમાં ચેડાં કરવાનું ધ્યાને આવ્યું છે. લો ફેકલ્ટીની છઠ્ઠા સેમેસ્ટર ની પરીક્ષા યોજાઈ હતી. ઓફીસ રેકોર્ડમાં 6 માર્ક્સ સુધારીને 8 કરી દેવાયા છે. બાદમાં યુનિ. ને માર્ક્સ મુકવામાં ભૂલ થઈ હોવાનું જાણ કરી હતી.કોલેજ સંચાલકની આમ ભૂલ છે.જે તે પ્રાધ્યાપક વિરુદ્ધ કાર્યવાહી કરાશે. જે તે પરીક્ષા સુધી પ્રાધ્યાપક ને દૂર રાખશે.એમપીઇસી આ અંગે નિર્ણય લેશે.