જ્યોર્જિયાના ગુડૌરીમાં એક રેસ્ટોરન્ટમાં 11 ભારતીય સહિત 12 લોકોનાં મોત થયા છે. 12મો વ્યક્તિ જ્યોર્જિયાનો છે. પોલીસના જણાવ્યા અનુસાર, આ તમામ રેસ્ટોરન્ટના બીજા માળે એક રૂમમાં સૂતા હતા. ત્યારે કાર્બન મોનોક્સાઇડ લીક થવાને કારણે તેમનો શ્વાસ રૂંધાયો હતો. પોલીસે જણાવ્યું કે પ્રારંભિક તપાસમાં તેમના શરીર પર હિંસા કે ઈજાના કોઈ નિશાન જોવા મળ્યા નથી. જ્યોર્જિયાની રાજધાની ત્બિલિસી સ્થિત ભારતીય દૂતાવાસે આ ઘટના પર શોક વ્યક્ત કર્યો છે. દૂતાવાસે કહ્યું, ‘અમે સ્થાનિક અધિકારીઓ સાથે મળીને કામ કરી રહ્યા છીએ જેથી મૃતદેહોને જલ્દીથી ભારત મોકલી શકાય.’ જ્યોર્જિયાના ગૃહ મંત્રાલયે કહ્યું કે ઘટનાની તપાસ કરવામાં આવી રહી છે. સીએનએન અનુસાર, કામદારોના પલંગની નજીક એક જનરેટર મળી આવ્યું હતું અને કદાચ પાવર કટ થયા પછી ચાલુ કરવામાં આવ્યું હતું. આનાથી ગેસ નીકળ્યો. મૃત્યુ પામેલા લોકોની ઓળખ હજુ સુધી જાહેર કરવામાં આવી નથી. હાલમાં ગુડૌરીમાં રાત્રે તાપમાન માઈનસ 15 ડિગ્રી સુધી નીચે જાય છે. હીટર વગર અહીં રાત વિતાવવી જીવલેણ બની શકે છે. આ કારણોસર, અહીં રહેતા લોકો રૂમ ગરમ કરવાની વ્યવસ્થા કરે છે. ગુડૌરી રશિયન સરહદની નજીક કાકેશસ પર્વતોની નજીક છે. તે દેશનું સૌથી મોટું અને સૌથી ઊંચું સ્કી રિસોર્ટ છે. મોટાભાગે યુરોપિયન પ્રવાસીઓ અહીં આવે છે. રિપોર્ટ અનુસાર, ગયા વર્ષે 3 લાખથી વધુ લોકો અહીં સ્કીઇંગ માટે આવ્યા હતા. ગુડૌરી રિસોર્ટ 7,200 ફૂટ (2,195 મીટર)ની ઊંચાઈ પર છે. અહીં 56 કિમી સુધી સ્કીઇંગ કરી શકાય છે. અહીં 10,750 ફૂટ (3,277 મીટર)ની ટોચ પરથી સ્કીઇંગ શરૂ કરી શકાય છે.
